દેવભૂમિ દ્વારકા જિલ્લાના મત વિસ્તારના મતદારો આધારકાર્ડ અને ચૂંટણીકાર્ડ લિંકઅપ કરાવી શકશે

સંબંધિત મતદારોની મુલાકાત લઈ બુથ લેવલ ઓફિસરો દ્વારા લિંકઅપ પ્રક્રિયા શરૂ કરાઇ

***

માહિતી બ્યુરો – દેવભૂમિ દ્વારકા

મુખ્ય નિર્વાચીન અધિકારીશ્રી, ગુજરાત રાજ્ય તરફથી મળેલ સૂચના મુજબ મતદારયાદીના પ્રમાણીકરણ હેતુ મુજબ દરેક મતદારના ચૂંટણીકાર્ડને તેના આધાર નંબર સાથે લિંકઅપ કરાવવા જરૂરી હોવાથી, જેને ધ્યાનમાં લઇને દેવભૂમિ દ્વારકા જિલ્લાના મત વિસ્તારના તમામ બુથ લેવલ ઓફિસરશ્રી દ્વારા મતદારોના ઘરે- ઘરે જઈને સંબંધિત મતદારની સહમતી મેળવી તેમના આધાર નંબર ચુંટણી કાર્ડ સાથે લિંકઅપ કરવા માટે લિંકઅપ પ્રક્રિયા ચાલુ છે.

જે-તે સંબંધિત મતદાર જો તેમનું આધાર કાર્ડ તેમના ચુંટણી કાર્ડ સાથે જાતે જ જો લિંકઅપ કરવા માંગતા હોય, તો તેમના સ્માર્ટફોન મારફત વોટર હેલ્પલાઇન એપ્લિકેશનની મદદથી કરી શકે છે દેવભૂમિ દ્વારકા જિલ્લાના મત વિસ્તારના તમામ બી.એલ.ઓ.શ્રી દ્વારા સંબંધિત મતદારોની મુલાકાત લઈ તેમના આધારકાર્ડ તેમના ચૂંટણીકાર્ડ સાથે લિંકઅપ કરવાની પ્રક્રિયા હાથ ધરવામાં આવી છે. ચૂંટણી કાર્ડ સાથે આધાર કાર્ડની વિગતો જોડવા માટે મહિનાના પ્રથમ રવિવારે પોતાના મતદાન મથક ખાતે બી.એલ.ઓ.શ્રી હાજર હશે ત્યાં પણ મતદારો આધાર નંબર ચુંટણી કાર્ડ સાથે લિંકઅપ કરાવી શકશે.

મતદારોને તેમના આધાર નંબર ચૂંટણીકાર્ડ નંબર સાથે લિંકઅપ કરવા માટે બી.એલ.ઓ.શ્રીને જરૂરી સાથ-સહકાર આપવા માટે મતદાર નોંધણી અધિકારી, અને પ્રાંત અધિકારીશ્રી, દ્વારા અનુરોધ કરવામાં આવ્યો છે.