GUJARATMEHSANAVIJAPUR

ગુજરાતી સાહિત્યમાં સંશોધન’ વિષય પર પિલવાઈ કોલેજમાં ગૌરવપૂર્ણ અને વિશિષ્ટ રાષ્ટ્રીય પરિસંવાદ યોજાયો

ગુજરાતી સાહિત્યમાં સંશોધન’ વિષય પર પિલવાઈ કોલેજમાં ગૌરવપૂર્ણ અને વિશિષ્ટ રાષ્ટ્રીય પરિસંવાદ યોજાયો
વાત્સલ્યમ સમાચાર
સૈયદજી બુખારી વિજાપુર
સાહિત્ય અકાદમી, દિલ્હી દ્વારા ગુજરાત સાહિત્ય અકાદમી, ગાંધીનગર અને આર્ટસ, સાયન્સ અને કોમર્સ કોલેજ , પિલવાઈ ના ગુજરાતી વિભાગના ઉપક્રમે 25મી જાન્યુઆરી ને ગુરુવારના રોજ ‘ગુજરાતી સાહિત્યમાં સંશોધન ‘ વિષય પર એક ગરિમાપૂર્ણ અને અર્થસભર પરિસંવાદ યોજાયો હતો આ પરિસંવાદના ઉદ્ઘાટન સત્રમાં એકેડેમિક સ્ટાફ કોલેજના પૂર્વ ડાયરેક્ટર અને સેવાનિવૃત્ત પ્રોફેસર પ્રસાદ બ્રહ્મભટ્ટે તેમના ઉદ્ઘાટન પ્રવચનમાં સંશોધનની વિભાવના, સમસ્યાઓ અને ઉકેલો વિશે અભ્યાસપૂર્ણ વ્યાખ્યાન આપ્યું હતું. હેમચંદ્રાચાર્ય ઉત્તર ગુજરાત યુનિવર્સિટીના પૂર્વ કુલપતિ અને હરિસિંહ ગૌર સાગર સેન્ટ્રલ યુનિવર્સિટીના કુલાધિપતિ ( ચાન્સેલર ) પ્રોફેસર બળવંત જાનીએ એક સંશોધક તરીકેની તેમની કેફિયતમાં રસપ્રદ અનુભવો કહીને શ્રોતાઓને મંત્રમુગ્ધ કર્યા હતા. બીજરૂપ વક્તવ્યમાં ડો. બળવંત જાનીએ પુરોગામી સંશોધકોની સજ્જતાની વાત સાથે પુરોગામી સંશોધકોના કેટલાક વિગતદોષ પણ નીડરતાથી બતાવ્યા હતા. પરિસંવાદની પ્રથમ બેઠકમાં કચ્છ યુનિ. નાં પ્રો. દર્શના ધોળકિયાએ ‘ મધ્યકાલીન ગુજરાતી સાહિત્યમાં સંશોધન ‘ વિશે ઝીણવટપૂર્વક અને રસપ્રદ વ્યાખ્યાન આપ્યું હતું. વીર નર્મદ દ.ગુ.યુનિ.ના પ્રો. નરેશ શુક્લએ ‘આંતરવિદ્યાકીય સંશોધન ‘ વિશે અભ્યાસપૂર્ણ વક્તવ્ય આપ્યું હતું. જ્યારે સૂરજબા મહિલા આર્ટ્સ કોલેજના આચાર્ય હસિત મહેતાએ વર્તમાન સંશોધનની અને સંશોધકોની ઉણપો તરફ અંગુલિનિર્દેશ કરીને માર્મિક વ્યાખ્યાન આપ્યું હતું. પરિસંવાદની બીજી બેઠકમાં લઘુકથા સર્જક અને લોકસાહિત્યના સંશોધક પ્રેમજી પટેલે ‘લોકસાહિત્યના સંશોધનની સમસ્યાઓ અને તેના ઉકેલો ‘ પર સુંદર ઉદાહરણ આપીને વાત કરી હતી. વાર્તાકાર, વિવેચક અને સંશોધક પ્રભુદાસ પટેલે ‘આદિવાસી સાહિત્યનું સંશોધન ‘ વિશે રસપ્રદ અને મનનીય વક્તવ્ય આપ્યું હતું. આ બેઠકના અધ્યક્ષ અને ઉત્તર ગુજરાતના જાણીતા સંશોધક અમૃત પટેલે સંશોધનની વર્તમાન સ્થિતિનો ખ્યાલ આપ્યો હતો. તેમણે વિદેશની યુનિ.ઓમાં થતાં સંશોધનોની સાર્થકતાનો ઉલ્લેખ કરીને આપણાં સંશોધનોની તુલના કરી હતી.સાહિત્ય અકાદમી, દિલ્હીના ક્ષેત્રીય કાર્યાલય મુંબઈના પ્રભારી ઓમ પ્રકાશ નાગરે સ્વાગત વક્તવ્ય આપીને પરિસંવાદની સફળતા અને સાર્થકતા ઈચ્છી હતી. કોલેજના આચાર્ય સંજય શાહે કોલેજની ગતિ – પ્રગતિનો સંક્ષિપ્ત ચિતાર રજૂ કરીને વક્તા અને શ્રોતાઓને આવકાર આપ્યો હતો. કેળવણી મંડળના મંત્રી એડવોકેટ પ્રવીણકુમાર વ્યાસ અને મૂકેશસિંહ વિહોલે પ્રસંગોચિત અને પ્રોત્સાહક ઉદબોધન કરીને પરિસંવાદને શુભેચ્છા પાઠવી હતી.
પરિસંવાદમાં મુંબઈ યુનિવર્સિટી ઉપરાંત ગુજરાત રાજ્યની 11 યુનિવર્સિટીના 130 જેટલા અધ્યાપકો અને પીએચ.ડી. ના શોધછાત્રો જોડાયા હતા. તદુપરાંત 100 જેટલાં શોધપત્રો રજૂ થયાં હતાં.પરિસંવાદના સંયોજક યશોધર હ. રાવલે આજના સમયમાં આવા પરિસંવાદની ઉપયોગિતા વિશે માર્મિક વાત કરીને ઉદ્ઘાટન સત્રનું સુપેરે સંચાલન કર્યું હતું. પરિસંવાદની પ્રથમ અને બીજી બેઠકનું સંચાલન ગુજરાતી વિભાગના અધ્યાપકો ધીરુભાઈ પટેલ અને દિલીપ ધોરિયાએ કર્યું હતું. સાંપ્રત સમયમાં એક વિશિષ્ટ વિષય પર યોજાયેલો આ
પરિસંવાદ અનેક રીતે અર્થસભર બની રહ્યો હતો. ઉપસ્થિત શ્રોતાઓએ આવા પરિસંવાદોની અગત્ય પિછાણી હતી.
ગુજરાતી વિભાગ દ્વારા આયોજિત આ રાષ્ટ્રીય પરિસંવાદને સફળ બનાવવા માટે કોલેજ ના પ્રાધ્યાપકો દ્વારા મહેનત કરી હતી

Back to top button
error: Content is protected !!