વાત્સલ્યમ સમાચાર
મદન વૈષ્ણવ-ડાંગ
ડાંગ જિલ્લાનાં આહવા,વઘઈ અને સુબીર એમ ત્રણેય તાલુકાઓમાં વરસાદની રમઝાટ સાથે ઠેર ઠેર મટકી ફોડનાં કાર્યક્રમ યોજી શ્રીકૃષ્ણના જન્મોત્સવની ઉજવણી ભાવિક ભક્તો દ્વારા કરવામાં આવી હતી.ત્યારે “હાથી ઘોડા પાલખી,જય કનૈયા લાલ કી ” નો નાદ ગુંજી ઉઠ્યો હતો.
ડાંગ જિલ્લાના આહવા,સુબીર,સાપુતારા અને વઘઈ ખાતે શ્રીકૃષ્ણના જન્મોત્સવની ભવ્ય ઉજવણી કરવામાં આવી હતી. ત્યારે વરસાદની રમઝટ વચ્ચે ઠેર ઠેર મટકી ફોડ ના કાર્યક્રમનું આયોજન કરવામાં આવ્યું હતુ. તેમજ સમગ્ર ડાંગ જિલ્લામાં ધાર્મિક કાર્યક્રમનું આયોજન કરાયુ હતુ.રાત્રિના બરાબર બાર વાગ્યાના ટકોરે “નંદ ઘેર આનંદ ભયો, જય કનૈયા લાલ કી”ના નાદ સાથે ભગવાન શ્રીકૃષ્ણના જન્મોત્સવની વધામણી કરવામાં આવી હતી.
ડાંગ જિલ્લાના કૃષ્ણ મંડળો દ્વારા મટકી ફોડ ના કાર્યક્રમો યોજવામાં આવ્યા હતા. નાના બાળકોએ ભગવાન શ્રીકૃષ્ણની આકર્ષક વેશભૂષા ધારણ કરીને મટકી ફોડના કાર્યક્રમમાં ભાગ લીધો હતો.મંદિરોમાં આકર્ષક હિંડોળા સાથે ભગવાન શ્રીકૃષ્ણની હિંડોળા પાલખીઓને સજાવવામાં આવી હતી. મંદિરોમાં શ્રીકૃષ્ણ ભજન મંડળો દ્વારા ધૂન ભજનની રમઝટ બોલાવવામાં આવી હતી. મંદિરોમાં શ્રીકૃષ્ણના જન્મની વધામણી અને ભક્તિભાવ સાથે મહાઆરતી કરવામાં આવી હતી.ડાંગ જિલ્લામાં કોઈ અનિચ્છનીય બનાવો ન બને તે માટે મટકીફોડનાં કાર્યક્રમમાં ચુસ્ત બંદોબસ્ત ગોઠવવામાં આવ્યો હતો..
