રિપોર્ટર
હિતેન્દ્ર ગોસાઈ
અમદાવાદ
અમદાવાદ, તા. 7
વડાપ્રધાન નરેન્દ્ર મોદીના જાહેર જીવન અને જનસેવાના 25 વર્ષ પૂર્ણ થવાના અવસરે ‘જન સેવાથી રાષ્ટ્ર સેવા’ના સંદેશ સાથે ‘વિકસિત ભારત સંકલ્પ અભિયાન’ અંતર્ગત અમદાવાદના રિવરફ્રન્ટ ખાતે ‘સેવા જ્યોતિ યાત્રા’નું આયોજન કરવામાં આવ્યું હતું. આ કાર્યક્રમમાં મુખ્યમંત્રી ભૂપેન્દ્ર પટેલ સહભાગી થયા હતા. રાજ્યભરમાં જનસેવા, સુશાસન અને રાષ્ટ્રનિર્માણની ભાવનાને ઉજાગર કરવા માટે અમદાવાદ સહિત તમામ જિલ્લાઓ અને મહાનગરોમાં પણ ‘સેવા જ્યોતિ યાત્રા’ યોજવામાં આવી હતી.
વડાપ્રધાન નરેન્દ્ર મોદીના જાહેર જીવનના 25 વર્ષ દરમિયાન જનસેવા અને રાષ્ટ્રસેવાના સંકલ્પને ઉજાગર કરતી આ યાત્રા દ્વારા સેવા, સમર્પણ અને રાષ્ટ્રનિર્માણનો સંદેશ નાગરિકો સુધી પહોંચાડવામાં આવ્યો હતો. કાર્યક્રમ દરમિયાન મોટી સંખ્યામાં નાગરિકો અને આગેવાનોએ ઉપસ્થિત રહી યાત્રામાં સહભાગી બની હતી.
આ પ્રસંગે વડાપ્રધાન નરેન્દ્ર મોદીએ વર્ચ્યુઅલ માધ્યમથી ઉપસ્થિતોને સંબોધન કર્યું હતું. તેમના સંબોધનને મુખ્યમંત્રી ભૂપેન્દ્ર પટેલ સહિત મહાનુભાવો અને ઉપસ્થિત નાગરિકોએ નિહાળ્યું હતું. સંબોધન દરમિયાન ‘વિકસિત ભારત @2047’ના નિર્માણ માટે દેશના નાગરિકોને સહભાગી બનવા માટે આહ્વાન કરવામાં આવ્યું હતું.
મુખ્યમંત્રી ભૂપેન્દ્ર પટેલે અમદાવાદ ખાતે આયોજિત ‘સેવા જ્યોતિ યાત્રા’ના માધ્યમથી ‘વિકસિત ભારત’ના નિર્માણની યાત્રામાં નાગરિકોની સહભાગિતાનું મહત્વ દર્શાવ્યું હતું. તેમણે સેવા અને રાષ્ટ્રનિર્માણની ભાવનાને આગળ વધારવા માટે સૌને સાથે મળીને કાર્ય કરવા માટે સંદેશ આપ્યો હતો.
વડાપ્રધાન નરેન્દ્ર મોદીના વર્ચ્યુઅલ સંબોધન બાદ ઉપસ્થિત મહાનુભાવોએ ‘સેવા જ્યોત’ પ્રજ્જવલિત કરી હતી. ત્યારબાદ કાર્યક્રમમાં ઉપસ્થિત તમામ મહાનુભાવો અને નાગરિકોએ ‘વિકસિત ભારત’ના નિર્માણ માટેના શપથ લીધા હતા. આ દરમિયાન કાર્યક્રમ સ્થળે રાષ્ટ્રનિર્માણ અને જનસેવાનો સંદેશ ગુંજ્યો હતો.
સેવા જ્યોતિ કળશ યાત્રાનો પ્રારંભ
શપથવિધિ બાદ ‘સેવા જ્યોતિ કળશ યાત્રા’નો પ્રારંભ કરવામાં આવ્યો હતો. જનસેવા, સુશાસન અને રાષ્ટ્રનિર્માણની ભાવનાને જન-જન સુધી પહોંચાડવાના ઉદ્દેશ સાથે યોજાયેલી આ યાત્રામાં નાગરિકોએ ઉત્સાહપૂર્વક ભાગ લીધો હતો. યાત્રા દરમિયાન વડાપ્રધાન નરેન્દ્ર મોદીની 25 વર્ષની જાહેર સેવા પ્રત્યે કૃતજ્ઞતા વ્યક્ત કરવામાં આવી હતી.
‘સેવા જ્યોતિ યાત્રા’ દ્વારા સેવા અને સમર્પણની ભાવનાને લોકો સુધી પહોંચાડવાની સાથે ‘વિકસિત ભારત @2047’ના લક્ષ્યને સાકાર કરવા માટે નાગરિકોની ભૂમિકા અંગે પણ જાગૃતિ લાવવાનો પ્રયાસ કરવામાં આવ્યો હતો. વિવિધ વિસ્તારોમાંથી પસાર થયેલી યાત્રામાં સ્થાનિક નાગરિકો અને કાર્યકરોએ ઉત્સાહપૂર્વક ભાગ લીધો હતો.
યાત્રા પૂર્ણ થયા બાદ મુખ્યમંત્રી ભૂપેન્દ્ર પટેલે ટાઉનહોલ નજીક સ્વામી વિવેકાનંદની પ્રતિમાને પુષ્પાંજલિ અર્પણ કરી હતી. તેમણે સ્વામી વિવેકાનંદના વિચારો અને રાષ્ટ્રનિર્માણની ભાવનાને સ્મરણ કરીને કાર્યક્રમને પૂર્ણ કર્યો હતો.
રાજ્યભરમાં યોજાઈ સેવા જ્યોતિ યાત્રા
અમદાવાદ ઉપરાંત રાજ્યના વિવિધ જિલ્લાઓ અને મહાનગરોમાં પણ ‘સેવા જ્યોતિ યાત્રા’નું આયોજન કરવામાં આવ્યું હતું. વિવિધ સ્થળોએ રાજ્યના મંત્રીઓ, સ્થાનિક આગેવાનો, પદાધિકારીઓ અને નાગરિકોની ઉપસ્થિતિમાં યાત્રાનું આયોજન કરવામાં આવ્યું હતું. આ કાર્યક્રમો દ્વારા જનસેવા, સુશાસન અને વિકસિત ભારતના સંકલ્પને લોકો સુધી પહોંચાડવામાં આવ્યો હતો.
અમદાવાદ ખાતે યોજાયેલા કાર્યક્રમમાં પશ્ચિમ બંગાળના મંત્રી અજયકુમાર પોદ્દાર, અમદાવાદના મેયર હિતેશભાઈ બારોટ, સ્થાનિક સાંસદ હસમુખભાઈ પટેલ, દિનેશભાઈ મકવાણા, શહેર અને જિલ્લાના ધારાસભ્યો, શહેર અધ્યક્ષ પ્રેરક શાહ, અધિક મુખ્ય સચિવ જયંતી રવિ, મ્યુનિસિપલ કમિશનર બંછાનિધિ પાની, મુખ્યમંત્રીના અધિક અગ્ર સચિવ ડૉ. વિક્રાંત પાંડે, કલેક્ટર ભવ્ય વર્મા સહિત ઉચ્ચ અધિકારીઓ, પદાધિકારીઓ અને અન્ય મહાનુભાવો ઉપસ્થિત રહ્યા હતા.
કાર્યક્રમ દરમિયાન ઉપસ્થિત નાગરિકોમાં પણ ઉત્સાહ જોવા મળ્યો હતો. ‘સેવા જ્યોતિ યાત્રા’ના માધ્યમથી જનસેવા અને રાષ્ટ્રસેવાના સંદેશને વધુ વ્યાપક બનાવવાનો પ્રયાસ કરવામાં આવ્યો હતો. રાજ્યના વિવિધ વિસ્તારોમાં યોજાયેલી આ યાત્રાઓ દ્વારા ‘વિકસિત ભારત @2047’ના સંકલ્પ સાથે નાગરિકોને જોડવાનો પ્રયાસ કરવામાં આવ્યો હતો.
