વાત્સલ્યમ સમાચાર પ્રવિણભાઇ ચૌહાણ વાવ થરાદ
વર્ષોની રાહ, અનેક રજૂઆતો અને લાંબી વહીવટી પ્રક્રિયા બાદ આખરે નાગલા ગામના ૩૭૧ પરિવારોનું પોતાના ઘરનું સપનું સાકાર થવાની દિશામાં મોટું પગલું ભરાયું છે. પુનર્વસનની આશા સાથે વર્ષોથી રાહ જોઈ રહેલા પરિવારોને પ્લોટની સનદોનું વિતરણ કરવામાં આવતાં ગામમાં ખુશીની લહેર ફરી વળી હતી. પરિવારોના હાથમાં પ્લોટની સનદ આવતાં વર્ષોની પ્રતીક્ષાનો અંત આવ્યો હતો.
નાગલા ગામમાં પુનર્વસનની પ્રક્રિયા વર્ષ ૨૦૧૬-૧૭માં શરૂ થઈ હતી, પરંતુ જમીન અને વહીવટી મંજૂરીઓની જટિલતાને કારણે આ પ્રશ્ન વર્ષો સુધી ફાઈલો વચ્ચે અટવાયેલો રહ્યો હતો. ગ્રામજનોની આ સમસ્યાને ગંભીરતાથી લઈને થરાદના ધારાસભ્ય અને ગુજરાત વિધાનસભાના અધ્યક્ષ શંકરભાઈ ચૌધરીએ અંગત રસ દાખવી સતત રજૂઆતો અને ફોલોઅપ કર્યા હતા. તેમના પ્રયાસોના પરિણામે ૧૩ ઓગસ્ટ ૨૦૨૩ના રોજ રાજ્ય સરકાર દ્વારા પુનર્વસન યોજનાને અંતિમ મંજૂરી મળી હતી.
ત્યારબાદ વહીવટી તંત્ર દ્વારા જરૂરી કાયદાકીય પ્રક્રિયાઓ પૂર્ણ કરવામાં આવતાં જિલ્લા વિકાસ અધિકારી કલ્પેશ શર્માના અધ્યક્ષસ્થાને યોજાયેલા કાર્યક્રમમાં કુલ ૩૭૧ લાભાર્થી પરિવારોને પ્લોટની સનદોનું વિતરણ કરાયું હતું. આ પ્રસંગે લાભાર્થી પરિવારોમાં ભારે ઉત્સાહ જોવા મળ્યો હતો.
ગામના આગેવાન જીવરાજભાઈ પટેલે જણાવ્યું હતું કે, ટેકનિકલ કારણોસર જે લાભાર્થીઓ બાકી રહી ગયા છે તેમને પણ ટૂંક સમયમાં જરૂરી વહીવટી પ્રક્રિયા પૂર્ણ કરી લાભ અપાવવાના પ્રયાસો કરવામાં આવશે. સાથે જ પુનર્વસન વિસ્તારમાં રોડ, રસ્તા, પાણી સહિતની પ્રાથમિક સુવિધાઓ ઉપલબ્ધ કરાવવા પણ કામગીરી હાથ ધરાશે.
સરપંચ દેવશીભાઈ પટેલે જણાવ્યું હતું કે, એક જ દિવસમાં ૩૭૧ પરિવારોને પ્લોટની સનદોનું વિતરણ કરીને ગુજરાતમાં પ્રેરણારૂપ દાખલો બેસાડવામાં આવ્યો છે. વર્ષોથી અટવાયેલા પ્રશ્નનો ઉકેલ લાવી ગરીબ પરિવારોને પોતાના આશિયાણાનું સપનું પૂરું કરવાની તક આપવા બદલ તેમણે શંકરભાઈ ચૌધરીનો સમગ્ર નાગલા ગામ વતી આભાર વ્યક્ત કર્યો હતો.
કાર્યક્રમમાં થરાદ પ્રાંત અધિકારી સાજન મેર, તાલુકા વિકાસ અધિકારી રાજેશભાઈ જોશી, સરપંચ દેવશીભાઈ પટેલ, અગ્રણી સરદારસિંહ વાઘેલા, હિતેશભાઈ પટેલ સહિત સ્થાનિક આગેવાનો, વહીવટી અધિકારીઓ અને મોટી સંખ્યામાં ગ્રામજનો ઉપસ્થિત રહ્યા હતા.