CEC જ્ઞાનેશ કુમાર બરાબરના ફસાયા છે. SIR વિવાદ અને ચૂંટણીમાં ગોટાળાના મામલે વિપક્ષ રસ્તા પર ઉતર્યો છે. મંગળવારે રાજધાની દિલ્હીમાં ઈન્ડિયા ગઠબંધનના 140થી વધુ સાંસદોએ સંસદથી રસ્તાઓ સુધી કૂચ શરૂ કરી હતી.
વિરોધ કૂચમાં અનેક વિપક્ષી પક્ષોના નેતાઓ અને સાંસદો જોડાયા છે. પોલીસે ચૂંટણી ગૃહ નજીક બેરિકેડ ઉભા કર્યા છે, જેનાથી ઇન્ડિયા બ્લોકના નેતાઓને રોકી દેવામાં આવ્યાં હતા. રાહુલ ગાંધી અને પ્રિયંકા ગાંધી સહિત અનેક વિપક્ષી સાંસદોએ ત્યાં ધરણા પ્રદર્શન કર્યા હતા.
ચૂંટણી પંચના મુખ્યાલયથી આશરે 200 મીટર દૂર પ્રદર્શનકારીઓ ધરણા કરી રહ્યા છે . સાંસદો સીઈસી જ્ઞાનેશ કુમાર વિરુદ્ધ “મત ચોર” ના નારા લગાવી રહ્યા છે. વિરોધને ધ્યાનમાં રાખીને ચૂંટણી ગૃહ અને આસપાસના વિસ્તારોમાં સુરક્ષા વધારી દેવામાં આવી છે. ઘટનાસ્થળે મોટી સંખ્યામાં પોલીસ કર્મચારીઓ તૈનાત છે.
RAF (રેપિડ એક્શન ફોર્સ) ના જવાનો મોટી સંખ્યામાં હાજર છે. દિલ્હી પોલીસ હવે દરેક વિરોધ પ્રદર્શનમાં બોડી કેમેરા પહેરી રહી છે. નવી દિલ્હી વિસ્તારના DCP સચિન શર્મા પણ બોડી કેમેરા પહેરીને ફરજ પર છે.
નવી દિલ્હી જિલ્લામાં કાયદો અને વ્યવસ્થા જાળવવા માટે 3,000 થી વધુ પોલીસ કર્મચારીઓને તૈનાત કરવામાં આવ્યા છે. પુરુષોની 27 કંપનીઓ અને મહિલાઓની ચાર કંપનીઓ તૈનાત કરવામાં આવી છે. એક પોલીસ કંપનીમાં સામાન્ય રીતે 100-115 કર્મચારીઓ હોય છે. સંસદ ભવન, સંસદ માર્ગના ગોળાકાર નજીક અને નિર્વાચન સદન સહિત મુખ્ય સ્થળોએ સુરક્ષા દળો તૈનાત કરવામાં આવ્યા છે.
ઈન્ડિયા ગઠબંધનના નેતાઓએ કહ્યું કે અમે પગપાળા કૂચ કરવા માંગીએ છીએ; અમારી પાસે કોઈ હથિયાર નથી. અમે ફક્ત ચૂંટણી પંચની ઓફિસમાં જઈને જ્ઞાનેશ કુમારને રાજીનામું આપવા માંગીએ છીએ, અને તેઓ દેશના દુશ્મન છે.
‘લોકશાહી બચાવો’, ‘મારો મત બચાવો’ – આવા પોસ્ટરો સાથે, ‘INDIA’ ગઠબંધનના વિપક્ષી સાંસદો મુખ્ય ચૂંટણી કમિશનર જ્ઞાનેશ કુમાર વિરુદ્ધ સૂત્રોચ્ચાર કરી રહ્યા છે અને કથિત મત ચોરીના મુદ્દે તેમના રાજીનામાની માંગ કરી રહ્યા છે. મંગળવારે સવારે સંસદની બહાર એકઠા થયેલા વિપક્ષી સાંસદોએ રાજધાનીમાં આવેલા ચૂંટણી પંચના મુખ્યાલય ‘નિર્વાચન સદન’ તરફ કૂચ કરી હતી. લોકસભામાં વિપક્ષના નેતા રાહુલ ગાંધી અન્ય સાંસદો સાથે હાલ ચૂંટણી પંચની કચેરીની બહાર બેઠા છે અને ચૂંટણી કમિશનરોને મળવાની માંગ કરી રહ્યા છે.
રાહુલ ગાંધીએ આકરા પ્રહારો કરતાં જણાવ્યું હતું કે, ‘અમે માત્ર ચૂંટણી પંચને મળીને એ કહેવા માંગીએ છીએ કે તમે વોટ ચોરી કરી છે. સાંસદો ચૂંટણી કમિશનરને મળશે અને તેમણે મળવું જ પડશે. દેશના અવાજનું અપમાન કરવામાં આવ્યું છે. જ્યાં સુધી મળવા દેવામાં નહીં આવે ત્યાં સુધી અમે ત્યાંથી હટીશું નહીં.’ જોકે, લાંબા હોબાળા બાદ આખરે પોલીસે રાહુલ અને પ્રિયંકા ગાંધી સહિતના નેતાઓની અટકાયત કરી લીધી હતી.
