તારીખ ૦૯/૧૦/૨૦૨૬
સાજીદ વાઘેલા કાલોલ
નવરાત્રીના પાવન પર્વને ગણતરીના દિવસો બાકી રહ્યા છે ત્યારે કાલોલ ખાતે સમગ્ર શહેરમાં ગરબાના રંગે રંગાવા માટે તડામાર તૈયારીઓ શરૂ થઈ ગઈ છે. ત્યારે કાલોલ શહેર સ્થિત સુવર્ણ હોલ ખાતે હાઉસિંગ સોસાયટી યુવક મંડળ દ્વારા આયોજિત નવરાત્રી મહોત્સવની તૈયારીઓને આખરી ઓપ આપવામાં આવી રહ્યો છે. અને યુવક મંડળના સભ્યો દ્વારા છેલ્લા ઘણા દિવસોથી સુવર્ણ હોલ ખાતે સ્ટેજ ડેકોરેશન, લાઇટિંગ, સાઉન્ડ સિસ્ટમ અને મંડપ ડેકોરેશનનું કામ પૂરજોશમાં ચાલી રહ્યું છે. આ વર્ષે ખેલૈયાઓ માટે વિશેષ આકર્ષણો સાથે ભવ્ય અને દિવ્ય માતાજીના મંડપની થીમ રાખવામાં આવી છે. જ્યાં હાઉસિંગ સોસાયટી યુવક મંડળના આગેવાનોએ જણાવ્યું હતું કે, દર વર્ષની જેમ આ વર્ષે પણ પરંપરાગત ગરબાની સાથે સુરક્ષા અને વ્યવસ્થાને પ્રાધાન્ય આપવામાં આવશે. મહિલાઓ અને બાળકોની સુરક્ષા માટે વોલેન્ટિયર્સ, સીસીટીવી કેમેરા અને પાર્કિંગની સુવિધા પણ ઉભી કરવામાં આવી છે. ત્યારે નવરાત્રી દરમિયાન શ્રેષ્ઠ વેશભૂષા અને શ્રેષ્ઠ પ્રિન્સ-પ્રિન્સેસ જેવા શ્રેષ્ઠ ગરબાની તૈયારીઓને લઈને સ્થાનિક યુવાનોમાં અને ખેલૈયાઓમાં ભારે ઉત્સાહ જોવા મળી રહ્યો છે.
