વાત્સલ્યમ્ સમાચાર,
પૂજા ઠક્કર – મુંદરા કચ્છ.
ઘરથી દૂર, પણ ઘર જેવો અહેસાસ: મુંદરામાં અદાણી ગ્રૂપ દ્વારા આધુનિક સુવિધાઓસભર નવી ઓપરેટર કોલોનીનું લોકાર્પણ
📊 મુખ્ય આંકડાઓ પર એક નજર:
* ૨,૦૦૦ કર્મચારીઓ માટે હાલમાં સેન્ટ્રલી એરકન્ડિશન્ડ (AC) રહેઠાણની આધુનિક સુવિધા ઉપલબ્ધ.
* ૨ મહિનામાં ક્ષમતા વધારીને ૬૦૦૦ કર્મચારીઓ સુધી લઈ જવાનું આયોજન.
* ૪ સમયનું પૌષ્ટિક ભોજન: ન્યુટ્રિશનિસ્ટ દ્વારા તૈયાર કરેલા મેનુ મુજબ શુદ્ધ અને પૌષ્ટિક આહારની વ્યવસ્થા સાથે મુંદરામાં કર્મચારી કલ્યાણનો નવો અધ્યાય શરૂ
સ્થાનિક મધ્યમ વર્ગના પરિવારનું પોતાના ઘરનું સ્વપ્ન થશે સાકાર
મુંદરા,તા.૪ નવેમ્બર ૨૦૨૬:
અદાણી ગ્રૂપના ચેરમેન શ્રી ગૌતમભાઈ અદાણીના દૂરંદેશી વિઝન અને ‘People First’ અભિગમ અંતર્ગત મુંદરા ખાતે કર્મચારીઓ માટે વૈશ્વિક ધોરણોની અત્યાધુનિક ઓપરેટર કોલોનીનું નિર્માણ કરવામાં આવ્યું છે. સંસ્થાની સાચી તાકાત તેના કર્મચારીઓ હોય છે અને તેમની સુખાકારી તથા સુરક્ષા એ જ પ્રગતિનો સાચો પાયો છે તે વિચાર સાથે આ ભગીરથ પહેલ કરવામાં આવી છે.
હાઈ-ફાઈ અને આધુનિક સુવિધાઓની વિશેષતાઓ:
* વાતાનુકૂલિત (AC) રહેઠાણ: કર્મચારીઓને આરામદાયક જીવનશૈલી પૂરી પાડવા માટે સેન્ટ્રલ એરકન્ડિશનિંગ, ડિજિટલ ડોર એક્સેસ અને ફ્રી વાઈ-ફાઈ જેવી સુવિધાઓ ઉપલબ્ધ છે.
* ઉચ્ચ સ્તરીય સુરક્ષા: સમગ્ર પરિસરમાં સીસીટીવી કેમેરા, ફાયર એલાર્મ સિસ્ટમ અને સજ્જ સુરક્ષા વ્યવસ્થા ગોઠવવામાં આવી છે.
* આરોગ્ય અને પોષણ: નિષ્ણાત ન્યુટ્રિશનિસ્ટ દ્વારા તૈયાર કરાયેલ મેનુ આધારે દરરોજ ચાર સમયનું પૌષ્ટિક ભોજન કેન્ટીનમાં પીરસવામાં આવે છે. સાથે જ હાઈજિન અને સેન્ટ્રલ વોશિંગ એરિયાની ખાસ કાળજી રાખવામાં આવી છે.
* તબીબી સેવાઓ: કોલોનીમાં જ મેડિકલ સેન્ટર કાર્યરત છે, જ્યાં પૂર્ણ સમય ડૉક્ટર અને નર્સિંગ સ્ટાફ ઉપલબ્ધ રહે છે.
* મનોરંજન અને ફિટનેસ: કામકાજ બાદ માનસિક હળવાશ માટે ખુલ્લી જગ્યાઓ, વિશાળ રમતગમતનું મેદાન તથા વિવિધ મનોરંજન પ્રવૃત્તિઓની સુવિધાઓ પણ ઉપલબ્ધ છે.
આ કોલોની માત્ર રહેવાની જગ્યા નથી, પરંતુ પોતાના પરિવારથી દૂર રહીને ફરજ બજાવતા કર્મચારીઓ માટે સુરક્ષિત, સ્વસ્થ અને ઘર જેવું હૂંફાળું વાતાવરણ પૂરું પાડતું ઉત્તમ ઉદાહરણ બની રહેશે.
સ્થાનિક મધ્યમ વર્ગના પરિવારનું સ્વપ્ન સાકાર થશે:
નોંધનીય છે કે અત્યાર સુધી અદાણી ગ્રૂપમાં કામ કરતા હજારો કર્મચારીઓ અને તેમના પરિવારો મુંદરા શહેર અને બારોઈ સોસાયટી વિસ્તારમાં ભાડાના મકાનોમાં રહેતા હતા જેના કારણે છેલ્લા કેટલાક વર્ષોથી સ્થાનિક સ્તરે મકાનોના ભાડા આસમાને પહોંચી ગયા હતા અને મધ્યમ વર્ગના પરિવારો માટે રહેવું મુશ્કેલ બન્યું હતું. હવે ૨,૦૦૦ જેટલા કર્મચારીઓ નવી ઓપરેટર કોલોનીમાં શિફ્ટ થતાં ભાડૂઆતોને મોટી રાહત મળશે. આગામી બે મહિનામાં વધુ ૪,૦૦૦ કર્મચારીઓ આ કોલોનીમાં સ્થાનાંતરિત થશે જેનાથી તગડું ભાડું વસુલતા ધંધાદારી મકાન માલિકો માટે આકરા સ્પર્ધાત્મક પડકારો ઊભા થશે પરંતુ સાથે સાથે ભાડામાં ઘટાડો થતાં અને મકાનોના ભાવ નિયંત્રણમાં આવતાં મધ્યમવર્ગી પરિવાર પોતાનું ‘Dream Home’ (સ્વપ્નાનું ઘર) ખરીદીને વર્ષો જુના સપનાને સાકાર કરી શકશે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
