MALIYA:માળિયાના દહીંસરામાં ડુપ્લીકેટ ઇંગ્લિશ દારૂની ફેક્ટરી ઝડપાઈ
મોરબી LCBનો મોટો દરોડો બજારમાં પહોંચે તે પહેલાં બનાવટી દારૂનો જથ્થો ઝડપાયો, નકલી બ્રાન્ડના લેબલ-બોટલ અને કેમિકલ સહિત મુદ્દામાલ કબજે
મોરબી જિલ્લામાં દારૂબંધીના કાયદાને પડકારતા તત્વો સામે પોલીસની કાર્યવાહી વચ્ચે માળિયા તાલુકાના દહીંસરા ગામેથી ડુપ્લીકેટ ઇંગ્લિશ દારૂ બનાવતી કથિત ફેક્ટરી ઝડપાતા ચકચાર મચી છે. મોરબી ક્રાઇમ બ્રાન્ચ/LCBની ટીમે બાતમીના આધારે દરોડો પાડી બનાવટી દારૂના ગોરખધંધાનો પર્દાફાશ કર્યો હોવાનું જાણવા મળે છે.
પ્રાથમિક માહિતી મુજબ દહીંસરા ગામે નકલી બ્રાન્ડના નામે ઇંગ્લિશ દારૂ તૈયાર કરી તેને બજારમાં સપ્લાય કરવાની તૈયારી ચાલી રહી હતી. પોલીસે સ્થળ પરથી અંદાજે ૨૦ પેટી જેટલો બનાવટી દારૂ, ઉપરાંત કેમિકલ, ખાલી બોટલો, સ્ટીકરો અને અન્ય સામગ્રી કબજે કરી હોવાનું જાણવા મળે છે. જથ્થો બજારમાં પહોંચે તે પહેલાં જ પોલીસના હાથે ઝડપાઈ જતા મોટા પ્રમાણમાં બનાવટી દારૂના સપ્લાયને અટકાવવામાં આવ્યો હોવાનો દાવો છે.
આ કાર્યવાહીમાં અજયસિંહ ભાવુભા જાડેજા, મહેશ ઉર્ફે મુન્નો કાંજિયા, કર્મરાજસિંહ ઝાલા, રામદેવસિંહ ઝાલા, વિક્કી ઉર્ફે કાનો સિંધવ અને વિક્રમ ધંધુકિયા સહિતના શખ્સોની સંડોવણી અંગે પોલીસે કાર્યવાહી હાથ ધરી હોવાનું જાણવા મળે છે. જોકે આરોપીઓની ચોક્કસ સંખ્યા અને તેમની ભૂમિકા અંગેની સત્તાવાર વિગતો પોલીસની પત્રકાર પરિષદ બાદ સ્પષ્ટ થશે.
ભાવનગર બાદ મોરબીમાં ફરી નકલી દારૂનું નેટવર્ક – તાજેતરમાં ભાવનગર અને અમદાવાદ સાથે જોડાયેલા ડુપ્લીકેટ ઇંગ્લિશ દારૂના પ્રકરણોએ રાજ્યભરમાં ચર્ચા જગાવી છે. એવા સમયે ઉદ્યોગનગરી મોરબી જિલ્લામાં જ નકલી ઇંગ્લિશ દારૂ બનાવવાની ફેક્ટરી ઝડપાવાની ઘટના અનેક સવાલો ઉભા કરે છે. ખાસ કરીને તૈયાર દારૂમાં ઉપયોગમાં લેવાતું કેમિકલ ક્યાંથી આવતું હતું, નકલી બોટલ-લેબલ ક્યાંથી મેળવવામાં આવતા હતા અને તૈયાર જથ્થો કયા વિસ્તારમાં સપ્લાય થવાનો હતો તે તપાસનો મહત્વનો મુદ્દો બન્યો છે.
માત્ર સ્થાનિક સ્તરે નકલી દારૂ તૈયાર થતો હતો કે તેની પાછળ કોઈ મોટું સપ્લાય નેટવર્ક કાર્યરત હતું તે અંગે પણ પોલીસ તપાસ કરી રહી છે. જો તપાસમાં સપ્લાય ચેઇનના અન્ય કડીઓ સામે આવે તો આ દરોડો મોરબી જિલ્લામાં નકલી દારૂના નેટવર્ક સામેની વધુ મોટી કાર્યવાહીનું સ્વરૂપ ધારણ કરી શકે છે.
7 ઓક્ટોબરે પોલીસની પત્રકાર પરિષદમાં ચિત્ર વધુ સ્પષ્ટ થશે મોરબી જિલ્લા પોલીસ વડાની સૂચનાથી 7 ઓક્ટોબર, 2026ના રોજ બપોરે 12 વાગ્યે પત્રકાર પરિષદ યોજાનાર હોવાનું જણાવાયું છે. આ પત્રકાર પરિષદમાં દહીંસરાની કથિત ડુપ્લીકેટ દારૂ ફેક્ટરી, ઝડપાયેલો મુદ્દામાલ, આરોપીઓની ભૂમિકા, દારૂ ક્યાં સપ્લાય કરવાનો હતો તેમજ સમગ્ર નેટવર્કમાં અન્ય કોઈ વ્યક્તિની સંડોવણી છે કે કેમ તે અંગે પોલીસ તરફથી વિસ્તૃત માહિતી આપવામાં આવે તેવી શક્યતા છે.
7 સપ્ટેમ્બરે પોલીસની પત્રકાર પરિષદમાં ચિત્ર વધુ સ્પષ્ટ થશ – હાલ સમગ્ર મામલે પોલીસની સત્તાવાર જાહેરાતની રાહ જોવાઈ રહી છે. પત્રકાર પરિષદ બાદ જ ઝડપાયેલા જથ્થાની ચોક્કસ કિંમત, આરોપીઓની સંખ્યા, બનાવટી દારૂ બનાવવાની પદ્ધતિ અને સપ્લાય નેટવર્ક અંગેની અધિકૃત વિગતો બહાર આવશે.
