તા.૦૬.૧૧.૨૦૨૬
વાત્સલ્યમ્ સમાચાર
અજય સાંસી દાહોદ 
Limkheda:લીમખેડાના પોલિસીમળ ગામમાં શોર્ટ સર્કિટથી ઘરમાં ભીષણ આગ, ગરીબ પરિવારનો તમામ સામાન બળીને ખાખ
દાહોદ જિલ્લાના લીમખેડા તાલુકાના પોલિસીમળ ગામે એક ગંભીર દુર્ઘટના સર્જાઈ છે. ગામના નિશાળ ફળિયામાં રહેતા બળવંતભાઈ હેમસિંગભાઈ પરમારના ઘરમાં શોર્ટ સર્કિટના કારણે અચાનક ભીષણ આગ ફાટી નીકળી હતી.જોતજોતામાં જ આગે વિકરાળ સ્વરૂપ ધારણ કરી લેતા આખો પરિવાર મુશ્કેલીમાં મુકાયો હતો. આ દુર્ઘટનામાં સદનસીબે કોઈ જાનહાની થઈ નથી, જે રાહતની વાત છે; પરંતુ ગરીબ પરિવારનું આખું ઘર અને ઘરવખરીનો તમામ સામાન આગમાં બળીને ખાખ થઈ ગયો છે.ઘરમાં આગ લાગ્યાની જાણ થતાં જ આસપાસના જાગૃત ગ્રામજનો તાત્કાલિક ઘટનાસ્થળે દોડી આવ્યા હતા. ગ્રામજનોએ પોતાની સૂઝબૂઝથી પાણીનો છટકાવ કરી આગ પર કાબૂ મેળવવાનો ભરપૂર પ્રયાસ કર્યો હતો. આ સાથે જ ઘટનાની ગંભીરતાને ધ્યાનમાં રાખીને દાહોદ નગરપાલિકાના ફાયર વિભાગને જાણ કરવામાં આવી હતી.માહિતી મળતા જ ફાયર ટીમ તાત્કાલિક ઘટનાસ્થળે દોડી આવી હતી અને ભારે જહેમત બાદ આગ પર સંપૂર્ણ કાબૂ મેળવ્યો હતો.અચાનક બનેલી આ દુર્ઘટનાના કારણે ગરીબ પરિવાર ખુલ્લા આકાશ નીચે આવી ગયો છે અને તેમને મોટું આર્થિક નુકસાન વેઠવાનો વારો આવ્યો છે. હાલ સ્થાનિક સ્તરેથીઆ પીડિત પરિવારને વહેલી તકે સરકારી સહાય મળે તેવી પ્રબળ માંગ ઉઠી રહી છે.
