MORBI:Dr. અને Adv. ની જેમ હવે શિક્ષકો માટે “Tr.” ની સત્તાવાર ઓળખ આપો: મોરબી શિક્ષક સંઘનું આવેદનપત્ર
શિક્ષકની વ્યાવસાયિક ઓળખને સન્માન અને ગૌરવ મળે તે માટે મોરબીથી ઉઠી માંગ
શિક્ષક એટલે માત્ર શિક્ષણ આપનાર વ્યક્તિ નહીં, પરંતુ ભાવિ પેઢીના ઘડવૈયા, સંસ્કારદાતા અને રાષ્ટ્રનિર્માણના પાયાના શિલ્પી. શિક્ષકની આ વિશિષ્ટ ભૂમિકા અને વ્યાવસાયિક ઓળખને સમાજમાં વધુ ગૌરવપૂર્ણ સ્થાન મળે તેવા હેતુથી ગુજરાત રાજ્ય શિક્ષણ સેવા વર્ગ-3 (નો.ક.) કર્મચારી મંડળ, ગાંધીનગર – મોરબી ઘટક તથા સરકારી માધ્યમિક અને ઉચ્ચતર માધ્યમિક શિક્ષક સંઘ, મોરબી દ્વારા રાજ્યના શિક્ષકોના નામ આગળ “Tr.” (Teacher) ઉપસર્ગના સત્તાવાર ઉપયોગને મંજૂરી આપવા માટે શિક્ષણ મંત્રીશ્રી સમક્ષ રજૂઆત કરવામાં આવી છે.
આ ઉપરાંત આ માંગ અંગેનું આવેદનપત્ર જિલ્લા શિક્ષણ અધિકારી કચેરી, મોરબી ખાતે રૂબરૂ આપવામાં આવ્યું હતું અને શિક્ષકોની આ લાગણીને સરકારના સંબંધિત તંત્ર સુધી પહોંચાડી જરૂરી કાર્યવાહી કરવા વિનંતી કરવામાં આવી છે.
“Dr.”, “Adv.” અને “Prof.”ની જેમ શિક્ષક માટે “Tr.”ની ઓળખની માંગ
રજૂઆતમાં જણાવાયું છે કે સમાજમાં વિવિધ ક્ષેત્રોમાં વિશિષ્ટ વ્યાવસાયિક ઓળખ ધરાવતા વ્યક્તિઓના નામ આગળ “Dr.”, “Adv.”, “Prof.” જેવા ઉપસર્ગોનો ઉપયોગ કરવામાં આવે છે. આ ઉપસર્ગો માત્ર સંબોધન પૂરતા મર્યાદિત નથી, પરંતુ સંબંધિત વ્યક્તિની વ્યાવસાયિક ઓળખ, વિશેષતા અને સામાજિક જવાબદારીનું પ્રતિનિધિત્વ કરે છે.
તે જ રીતે શિક્ષકનું સ્થાન પણ સમાજમાં અનન્ય છે. શિક્ષક વિદ્યાર્થીઓને માત્ર પાઠ્યપુસ્તકનું જ્ઞાન આપતા નથી, પરંતુ જ્ઞાન, સંસ્કાર, શિસ્ત, મૂલ્યો, કૌશલ્ય, આત્મવિશ્વાસ અને જવાબદારીની ભાવનાનું સિંચન કરે છે. એક સારા શિક્ષકના માર્ગદર્શનથી ઘડાયેલી પેઢી જ સમાજ અને રાષ્ટ્રના ભવિષ્યનું નિર્માણ કરે છે.
આથી શિક્ષકની આ વિશિષ્ટ ભૂમિકાને અનુરૂપ તેમના નામ આગળ “Tr.” (Teacher) ઉપસર્ગના સત્તાવાર ઉપયોગને માન્યતા આપવામાં આવે તેવી રજૂઆત કરવામાં આવી છે.
“Tr.” માત્ર ઉપસર્ગ નહીં, શિક્ષકના ગૌરવની ઓળખ
સંગઠન દ્વારા ભારપૂર્વક જણાવવામાં આવ્યું છે કે “Tr.” ઉપસર્ગનો હેતુ કોઈ અન્ય વ્યવસાયની સમકક્ષતા દર્શાવવાનો નથી, પરંતુ શિક્ષકના વ્યવસાયની આગવી ઓળખ અને ગૌરવને સન્માન આપવાનો છે.
શિક્ષક સમાજના સૌથી મહત્વપૂર્ણ માનવસંસાધનનું ઘડતર કરે છે. ડૉક્ટર સારા સ્વાસ્થ્યનું નિર્માણ કરે છે, ઇજનેર વિકાસના માળખાં ઊભાં કરે છે અને અન્ય વ્યવસાયિકો સમાજની વિવિધ જરૂરિયાતો પૂરી કરે છે; પરંતુ આ તમામ ક્ષેત્રો માટે જરૂરી માનવબળના ઘડતરમાં શિક્ષકની ભૂમિકા મૂળભૂત અને અવિભાજ્ય છે.
તેથી શિક્ષકને તેની વ્યાવસાયિક ઓળખ સાથે ગૌરવપૂર્ણ સંબોધન મળે તે શિક્ષક સમાજ માટે આત્મસન્માન અને પ્રેરણાનું પ્રતીક બની શકે છે.
રજૂઆતના મુખ્ય હેતુઓ:
• શિક્ષકોમાં આત્મગૌરવ અને વ્યાવસાયિક ગૌરવની ભાવના વધુ મજબૂત કરવી.
• સમાજમાં શિક્ષકના પવિત્ર અને જવાબદારીસભર વ્યવસાયની આગવી ઓળખ સ્થાપિત કરવી.
• શિક્ષકોના મનોબળમાં વધારો કરી તેમને વધુ ઉત્સાહપૂર્વક શિક્ષણકાર્ય માટે પ્રેરિત કરવા.
• નવી શિક્ષણ નીતિ – NEP-2020ના મૂલ્યોને અનુરૂપ શિક્ષકની કેન્દ્રીય ભૂમિકાને વધુ ગૌરવ આપવું.
• રાજ્યના શિક્ષક સમાજને એક સમાન અને ગૌરવપૂર્ણ વ્યાવસાયિક ઓળખ આપવી.
શિક્ષકના સન્માન માટે મોરબીથી ઉઠેલો અવાજ
શિક્ષક સમાજ ભાવિ પેઢીના ઘડતર સાથે સીધી રીતે જોડાયેલો છે. આજનો વિદ્યાર્થી આવતીકાલનો નાગરિક, અધિકારી, વૈજ્ઞાનિક, ડૉક્ટર, ઇજનેર, ઉદ્યોગસાહસિક કે નેતા બને છે; અને તેના ઘડતરની શરૂઆત શિક્ષકના વર્ગખંડથી થાય છે.
આથી શિક્ષકની ભૂમિકા માત્ર નોકરી કે વ્યવસાય સુધી મર્યાદિત ન રાખી તેને સમાજઘડતર સાથે જોડાયેલી ગૌરવપૂર્ણ વ્યાવસાયિક ઓળખ આપવામાં આવે તે જરૂરી હોવાનું સંગઠન દ્વારા રજૂઆતમાં જણાવાયું છે.
આ સંદર્ભે શિક્ષણ મંત્રીશ્રીને કરવામાં આવેલી રજૂઆત તથા જિલ્લા શિક્ષણ અધિકારી કચેરી, મોરબી ખાતે રૂબરૂ આપવામાં આવેલા આવેદનપત્રને ગંભીરતાથી ધ્યાને લઈ રાજ્યના તમામ શિક્ષકોના નામ આગળ “Tr.” (Teacher) ઉપસર્ગના સત્તાવાર ઉપયોગ માટે જરૂરી મંજૂરી આપી યોગ્ય કાર્યવાહી કરવામાં આવે તેવી શિક્ષક સમાજની લાગણી અને અપેક્ષા વ્યક્ત કરવામાં આવી છે.
“શિક્ષકનું ગૌરવ વધશે, તો શિક્ષણનું ગૌરવ વધશે અને શિક્ષણનું ગૌરવ વધશે તો રાષ્ટ્રનું ભવિષ્ય વધુ ઉજ્જવળ બનશે.”ગુજરાત રાજ્ય શિક્ષણ સેવા વર્ગ-3 (નો.ક.) કર્મચારી મંડળ, ગાંધીનગર – મોરબી ઘટક સરકારી માધ્યમિક અને ઉચ્ચતર માધ્યમિક શિક્ષક સંઘ, મોરબી
