MORBI:રાષ્ટ્રીય એકતા પર્વની ભવ્ય પરેડમાં મોરબીની વિદ્યાર્થીનીઓએ અદભુત નૃત્યકલા અને પ્રતિભાનું પ્રદર્શન કર્યું
પ્રધાનમંત્રીશ્રી નરેન્દ્ર મોદીની ઉપસ્થિતિમાં યોજાયેલ કાર્યક્રમમાં દિકરીઓએ કથક અને ભરતનાટ્યમ દ્વારા કલાના કામણ પાથર્યા
દેશના પ્રધાનમંત્રીશ્રી નરેન્દ્ર મોદીની ઉપસ્થિતિમાં સ્ટેચ્યુ ઓફ યુનિટી, એકતાનગર ખાતે યોજાયેલા રાષ્ટ્રીય એકતા પર્વની ભવ્ય ઉજવણીમાં એકતા પરેડ દરમિયાન મોરબીની વિદ્યાર્થીનીઓ દ્વારા ભરતનાટ્યમ અને કથક નૃત્યની અદભૂત અને અતિ સુંદર પ્રસ્તુતિ કરી હતી જે સમગ્ર મોરબી જિલ્લા માટે ગૌરવની વાત છે.
આ કાર્યક્રમમાં ભરતનાટ્યમ ટીમમાં વિનય ઇન્ટરનેશનલ સ્કૂલની ૧૨ વિદ્યાર્થીનીઓ અને ૧ શિક્ષક તથા કથક ટીમમાં ૯ વિદ્યાર્થીનીઓ અને ૧ શિક્ષક એમ કુલ મળીને ૨૧ વિદ્યાર્થીનીઓ અને ૨ શિક્ષકોએ ભારતીય શાસ્ત્રીય નૃત્યની સુંદર રજૂઆત દ્વારા ભારતીય સંસ્કૃતિ, પરંપરા અને રાષ્ટ્રીય એકતાની ભાવનાને ઉજાગર કરી હતી.
આ કાર્યક્રમમાં ભાગ લેનાર વિદ્યાર્થીઓએ પોતાના અનુભવ જણાવતા કહ્યું કે ત્યાં અમારા દરેક માટે યુવક સેવા અને સાંસ્કૃતિક પ્રવૃત્તિઓની કચેરી, ગાંધીનગર, મોરબી જિલ્લા યુવા વિકાસ અધિકારીશ્રીની કચેરી તથા સમગ્ર મોરબી જિલ્લા વહીવટી તંત્રના સંકલન સાથે રહેવા અને જમવાની ઉત્તમ વ્યવસ્થા કરવામાં આવી હતી તથા ભારતના વિવિધ રાજ્યોમાંથી પસંદગી પામેલા કલાકારો સાથે આ ભવ્ય રાષ્ટ્રીય મંચ પર પોતાની કલાનું પ્રદર્શન કરવું એ અમારા માટે એક યાદગાર અને ગૌરવપૂર્ણ અનુભવ રહ્યો હતો.
શિક્ષણ સાથે સંસ્કૃતિ અને કલાનું ઉત્કૃષ્ટ પ્રદર્શન કરવા બદલ શાળાના આચાર્યશ્રી, શિક્ષકશ્રીઓ તથા તમામ કોઓર્ડિનેટરશ્રીઓએ વિદ્યાર્થીનીઓને હાર્દિક અભિનંદન પાઠવ્યાં હતાં.
