MORBI:ચેતજો! ગૂગલ પરથી કસ્ટમર કેર નંબર મેળવતા પહેલાં 100 વાર વિચારજો, મોરબીના પોલીસકર્મી પણ બન્યા સાયબર ક્રાઈમનો શિકાર
મોરબી:સામાન્ય નાગરિકો જ નહીં, પરંતુ કાયદાના રક્ષકો પણ સાયબર માફિયાઓની જાળમાં ફસાઈ રહ્યા હોવાનો કિસ્સો મોરબીમાં પ્રકાશમાં આવ્યો છે. મોરબી સિટી એ ડિવિઝન પોલીસ મથકમાં ફરજ બજાવતા એક પોલીસ કર્મચારી ગૂગલ સર્ચમાંથી કસ્ટમર કેર નંબર શોધવાની ભૂલમાં ₹94,000થી વધુની રકમ ગુમાવી બેઠા છે.
અટવાયેલી રકમ: રોયલ પાર્ક સોસાયટીમાં રહેતા અને સિટી એ ડિવિઝન પોલીસ સ્ટેશનમાં ફરજ બજાવતા પોલીસકર્મી આનંદકુમાર ભીમજીભાઈ દેગામાએ ગત તા. 5 સપ્ટેમ્બરના રોજ પોતાના એક્સિસ બેંકના સેલેરી એકાઉન્ટમાંથી એસબીઆઈના કાર લોન ખાતામાં ₹15,000 ટ્રાન્સફર કર્યા હતા.
નકલી કસ્ટમર કેર: નાણાં જમા ન થતાં તેમણે સમસ્યાના ઉકેલ માટે ગૂગલ પર સર્ચ કરીને એક્સિસ બેંકના કસ્ટમર કેરનો નંબર મેળવ્યો હતો.
વિડીયો કોલ અને યુપીઆઈ ફ્રોડ: સંપર્ક કરતાં સામેવાળા ગઠિયાએ વોટ્સએપ પર વિડીયો કોલ કર્યો હતો અને પોતાનો ચહેરો છુપાવી રાખ્યો હતો. તેણે અટવાયેલા નાણાં પરત અપાવવાનું કહી ફોન-પેમાં એક યુપીઆઈ આઈડી નાખી પિનકોડ એન્ટર કરાવ્યો હતો.ખાતામાંથી રકમ ગાયબ: પ્રોસેસ પૂર્ણ થતાંની સાથે જ પોલીસકર્મીના ખાતામાંથી ₹75,655 અને ₹18,983 મળી કુલ ₹94,678 ઉપડી ગયા હતા.આસામના બેંક ખાતામાં રકમ ટ્રાન્સફર પોતાની સાથે છેતરપિંડી થઈ હોવાનું સમજાતાં આનંદકુમારે તુરંત સાયબર હેલ્પલાઈન ૧૯૩૦ પર સંપર્ક કર્યો હતો. પ્રાથમિક તપાસમાં આ નાણાં આસામના બારપેટા સ્થિત કેનેરા બેંકના એક ખાતામાં ટ્રાન્સફર થયા હોવાનું સામે આવ્યું છે.આ સમગ્ર મામલે છેતરપિંડી આચરનાર મોબાઈલ નંબર ધારકો તેમજ બેંક ખાતાધારક વિરુદ્ધ મોરબી સિટી એ ડિવિઝન પોલીસ મથકે ગુનો નોંધી આગળની કાયદેસરની તપાસ હાથ ધરવામાં આવી છે.
