એચ પી ગેસ સિલિન્ડર ડિલિવરીમાં ‘વધારાની વસૂલાત’નો આક્ષેપ! ₹970ના સિલિન્ડર માટે ₹1100 લેવાયા છે

વાત્સલ્યમ સમાચાર પ્રવિણભાઇ ચૌહાણ વાવ થરાદ

આસોદર ખાતે આવેલ HP ગેસ સિલિન્ડરના પોઈન્ટ અને ગોડાઉનને લઈને ગ્રાહકોમાં વધારાની વસૂલાત અંગે ચર્ચા અને આક્ષેપો સામે આવ્યા છે. આસોદર ખાતે HP ગેસનો પોઈન્ટ હોવાથી આસપાસના ગામોના ગ્રાહકો સિલિન્ડરની બોટલ લેવા માટે અહીં આવતા હોવાનું જાણવા મળે છે. જોકે, ગ્રાહકોના આક્ષેપ મુજબ સિલિન્ડરની નિર્ધારિત કિંમત કરતાં વધુ રકમ વસૂલવામાં આવતી હોવાના કારણે હવે સમગ્ર મામલો ચર્ચાના કેન્દ્રમાં આવ્યો છે.

₹970ના સિલિન્ડર સામે ₹1100ની માંગ?

ગ્રાહકોનો આક્ષેપ છે કે ₹970ની કિંમતના ગેસ સિલિન્ડર માટે ₹1100 સુધીની રકમ લેવામાં આવી હોવાની ફરિયાદો સામે આવી છે. એટલે કે સિલિન્ડરની કિંમત કરતાં આશરે ₹130 વધુ વસૂલવામાં આવ્યા હોવાનો દાવો કરવામાં આવી રહ્યો છે.

સવાલ એ છે કે જો ₹970 સિલિન્ડરની કિંમત છે તો ₹130ની વધારાની રકમ શા માટે? આ રકમ કયા નિયમ હેઠળ લેવામાં આવે છે? શું આ ડિલિવરી ચાર્જ છે કે અન્ય કોઈ ચાર્જ? અને જો ચાર્જ લેવામાં આવે છે તો ગ્રાહકને તેની સત્તાવાર બિલ-રસીદ કેમ આપવામાં આવતી નથીઆસોદર ખાતે HP ગેસનું પોઈન્ટ અને ગોડાઉન આવેલું છે, જ્યાં આસપાસના ગ્રાહકો પોતે ગેસની બોટલ લેવા માટે પહોંચતા હોવાની માહિતી છે. જો ગ્રાહક પોતે ગોડાઉન અથવા પોઈન્ટ પરથી સિલિન્ડર લઈ જાય છે, તો વધારાની રકમ લેવામાં આવે છે કે નહીં અને લેવામાં આવે તો તેનું કારણ શું છે—તે અંગે સ્પષ્ટતા જરૂરી બની છે.

“અમે કોઈ પોઈન્ટ આપ્યો નથી” — સંચાલકની સ્પષ્ટતા

આ અંગે જેતડા ભવાની ગેસ સિલિન્ડરના સંચાલકને પૂછતા તેમણે જણાવ્યું હતું કે, “અમે કોઈ પોઈન્ટ આપ્યો નથી.”

સંચાલકના આ નિવેદન બાદ હવે ગ્રાહકો પાસેથી જો ખરેખર વધારાની રકમ લેવામાં આવી રહી હોય તો તે કોના દ્વારા, કયા હિસાબે અને કયા નિયમ હેઠળ લેવામાં આવી રહી છે? તેવો સીધો સવાલ ઊભો થયો છે.

પુરવઠા વિભાગ અને સંબંધિત અધિકારીઓ દ્વારા નિષ્પક્ષ તપાસ કરવામાં આવે તેવી માંગ ઉઠી રહી છે. ગેસ સિલિન્ડરની સત્તાવાર કિંમત, ડિલિવરી ચાર્જ અને ગ્રાહકો પાસેથી વસૂલવામાં આવતી અન્ય કોઈપણ રકમ અંગે નિયમોની ચકાસણી કરવામાં આવે તો સમગ્ર મામલો સ્પષ્ટ થઈ શકે છે.