સુરત :-પીપોદરા ગામમાં સ્વચ્છતા અને ગટર વ્યવસ્થાની સમસ્યા અંગે અગાઉ રજૂઆતો અને ફરિયાદો કરવામાં આવી હોવા છતાં સ્થિતિમાં ખાસ સુધારો જોવા મળતો નથી. ગામના વિવિધ વિસ્તારોમાં કચરાના ઢગલા યથાવત્ જોવા મળતા હોવાના કારણે સ્થાનિકોમાં તંત્રની કામગીરી સામે રોષ જોવા મળી રહ્યો છે.
ગામમાં કચરાના ઢગલાઓ સાથે ગટરનું ગંદુ પાણી રસ્તા પર ફરી વળતું હોવાની સમસ્યા પણ સામે આવી રહી છે. લાંબા સમય સુધી રસ્તા પર પાણી ભરાઈ રહેતા દુર્ગંધ ફેલાવા ઉપરાંત મચ્છરજન્ય રોગચાળાનું જોખમ ઊભું થવાની ચિંતા ગ્રામજનો વ્યક્ત કરી રહ્યા છે.
સ્થાનિકોના જણાવ્યા મુજબ, ગટરનું પાણી બહાર કાઢવા માટે મોટી ગટર વ્યવસ્થા હોવા છતાં યોગ્ય નિકાલ ન થવાથી ગંદુ પાણી રસ્તા પર જમા થાય છે. પરિણામે રાહદારીઓ તથા વાહનચાલકોને પણ મુશ્કેલીનો સામનો કરવો પડે છે.
ફરિયાદ છતાં કચરો હટ્યો નહીં, જવાબદારી કોણની?
પીપોદરા ગ્રામ પંચાયત દ્વારા અગાઉ સંબંધિત વિભાગને ગટર તથા સર્વિસ રોડની જગ્યામાં થયેલા કથિત અનધિકૃત દબાણો દૂર કરવા અંગે લેખિત રજૂઆત કરવામાં આવી હોવાનો દસ્તાવેજ પણ સામે આવ્યો છે. ગ્રામ પંચાયતે તાત્કાલિક કાર્યવાહી કરવાની માંગ કરી હતી.
પરંતુ સ્થાનિકોના કહેવા મુજબ, આજે પણ અનેક સ્થળોએ કચરો અને ગંદકીની સમસ્યા યથાવત્ છે. જેના કારણે સવાલ ઊભો થયો છે કે રજૂઆતો કાગળ પર જ રહેશે કે સ્થળ પર ખરેખર સફાઈ અને ગટર વ્યવસ્થાની કામગીરી થશે?
રસ્તા પર ગંદુ પાણી, આસપાસ કચરો—આરોગ્ય જોખમની ચિંતા
ગંદુ પાણી લાંબા સમય સુધી ભરાયેલું રહે અને તેની આસપાસ કચરો પડેલો હોય તો મચ્છર તથા અન્ય જીવાતોનો ઉપદ્રવ વધવાની શક્યતા રહે છે. સ્થાનિકોનું કહેવું છે કે ચોમાસા દરમિયાન સ્થિતિ વધુ ગંભીર બની શકે છે.
ગ્રામજનોની માંગ છે કે સંબંધિત અધિકારીઓ માત્ર કાગળ પરની કાર્યવાહી પૂરતી મર્યાદિત ન રહેતા સ્થળ પર તપાસ કરે, કચરાના ઢગલા તાત્કાલિક દૂર કરાવે, ગટરનાં પાણીના યોગ્ય નિકાલની વ્યવસ્થા કરે અને ગટર ઉપરના સંભવિત દબાણોની પણ તપાસ કરે.
હવે જોવાનું એ રહ્યું કે પીપોદરાની આ સમસ્યા અંગે જવાબદાર તંત્ર ક્યારે જાગે છે અને ગ્રામજનોને ગંદકી તથા ગટરનાં ગંદા પાણીમાંથી ક્યારે કાયમી રાહત મળે છે.
રિપોટર કલ્પેશ ધામેલીયા કામરેજ સુરત
