વાત્સલ્યમ સમાચાર
મદન વૈષ્ણવ
વાંસદા તાલુકાના ભીનાર ગામે હનુમાનજી મંદિર પાસે ધાર્મિક વિધિ યોજાઈ
વાંસદા: વાંસદા તાલુકાના ભીનાર ગામે હનુમાનજી મંદિર નજીક કાવેરી નદીના પવિત્ર કિનારે પિતૃ શ્રાદ્ધનું ધાર્મિક આયોજન કરવામાં આવ્યું હતું. ભીનાર સહિત આસપાસના ગામોના અંદાજિત 150 જેટલા શ્રદ્ધાળુઓએ ઉપસ્થિત રહી પિતૃઓનું શ્રદ્ધાપૂર્વક સ્મરણ કરી શ્રાદ્ધવિધિમાં ભાગ લીધો હતો.
આ ધાર્મિક શ્રાદ્ધવિધિ ઉનાઈ બ્રહ્માંડ બ્રાહ્મણ પિયાંશુભાઈ જોષી મહારાજ દ્વારા શાસ્ત્રોક્ત વિધિ અનુસાર કરાવવામાં આવી હતી. વહેલી સવારે 8 વાગ્યાથી શરૂ થયેલી શ્રાદ્ધવિધિ સવારે 11:30 કલાકે પૂર્ણ થઈ હતી.
કાવેરી નદીના પવિત્ર કિનારે યોજાયેલા આ ધાર્મિક કાર્યક્રમમાં મોટી સંખ્યામાં ગ્રામજનો અને શ્રદ્ધાળુઓ જોડાયા હતા. સમગ્ર કાર્યક્રમ દરમિયાન ભક્તિમય અને ધાર્મિક વાતાવરણ જોવા મળ્યું હતું. પિતૃઓની આત્મશાંતિ અને પરિવારની સુખ-સમૃદ્ધિ માટે શ્રદ્ધાળુઓએ ધાર્મિક વિધિમાં ભાગ લીધો હતો.
સ્થાનિક લોકો માટે આ આયોજન ધાર્મિક આસ્થા અને પરંપરાનું જતન કરતું મહત્વપૂર્ણ પ્રસંગ બન્યું હતું.
