તા.૮/૧૦/૨૦૨૬
વાત્સલ્યમ્ સમાચાર
૧૭ જાતના ૮૫૦ રોપાઓનું વાવેતર કરાયું
જન્મદિવસ અને લગ્નની વર્ષગાંઠ જેવા શુભ પ્રસંગોએ વૃક્ષ વાવી તેનું જતન કરીએ
ગ્લોબલ વોર્મિંગના પડકાર સામે વૃક્ષારોપણ અને પ્રાકૃતિક ખેતી જ શ્રેષ્ઠ ઉપાય
Rajkot: રાજ્યપાલ શ્રી આચાર્ય દેવવ્રતજીએ રાજકોટ તાલુકાના ગઢકા ગામે ‘એક પેડ મા કે નામ ૩.૦’ અભિયાન હેઠળ વૃક્ષારોપણ કરી પર્યાવરણ જતનનો સંદેશ આપ્યો હતો. વડાપ્રધાન શ્રી નરેન્દ્રભાઈ મોદી દ્વારા પ્રકૃતિના સંરક્ષણ અને માતૃવંદનાના અનોખા સમન્વય સાથે શરૂ કરાયેલા રાષ્ટ્રવ્યાપી જન અભિયાનના સંકલ્પને સાકાર કરવાના ઉદ્દેશ્યથી યોજાયેલા આ ગરિમાપૂર્ણ અવસરે રાજ્યપાલશ્રીના હસ્તે વિશેષરૂપે ‘બહેડા’ના રોપનું વાવેતર કરવામાં આવ્યું હતું.
આ તકે રાજ્યપાલશ્રીએ જણાવ્યું હતું કે, હાલ સમગ્ર વિશ્વ સામે ગ્લોબલ વોર્મિંગ સૌથી ગંભીર પ્રશ્ન છે. નેપાળ અને સ્પેન જેવા દેશોમાં કુદરતી આફતો અને અતિવૃષ્ટિના કારણે થયેલી ભયાનક તારાજીના ઉદાહરણો ટાંકીને તેમણે જણાવ્યું હતું કે, ખેતરોમાં વાપરવામાં આવતા રાસાયણિક ખાતરો, યુરિયા, ડી.એ.પી. અને જંતુનાશક દવાઓ આપણી સમગ્ર પ્રકૃતિને બરબાદ કરી રહી છે.
તેમણે ભારપૂર્વક જણાવ્યું હતું કે, આ વૈશ્વિક સંકટમાંથી બચવાનો શ્રેષ્ઠ ઉપાય વૃક્ષારોપણ અને પ્રાકૃતિક ખેતી છે. ભારતીય સંસ્કૃતિમાં પીપળાને પિતૃ સમાન, વડને દાદા અને તુલસીને માતા તરીકે પૂજવામાં આવે છે, જે આપણી પ્રકૃતિ પ્રત્યેની આદરભાવના દર્શાવે છે.
રાજ્યપાલશ્રીએ ઉપસ્થિત સૌ નાગરિકોને આહ્વાન કર્યું હતું કે, આપણા પરિવારમાં બાળકોના જન્મદિવસ કે લગ્નની વર્ષગાંઠ જેવા કોઈપણ શુભ પ્રસંગો અને તહેવારો પર એક વૃક્ષ અવશ્ય વાવવું જોઈએ અને પોતાના સ્વજનની જેમ તેનું જતન કરી ઉછેરવું જોઈએ.
આ તકે રાજ્યપાલશ્રીએ વૃક્ષારોપણ કરનાર તમામ ગ્રામજનો, વિદ્યાથીઓ, વન વિભાગ અને વહિવટી તંત્રને અભિનંદન પાઠવ્યા હતા.
અત્રે નોંધનીય છે કે, રાજકોટ તાલુકાના ગઢકા ગામે સામાજિક વનીકરણ વિભાગના સહયોગથી યોજાયેલા આ અભિયાન હેઠળ પર્યાવરણની રક્ષા માટે કુલ ૧૭ જાતના અંદાજે ૮૫૦ રોપાઓનું વાવેતર કરવામાં આવ્યું છે. આ કાર્યક્રમમાં રાજ્યપાલશ્રીના હસ્તે વાવેતર કરાયેલ ‘બહેડા’ વૃક્ષનું આયુર્વેદમાં અત્યંત મહત્ત્વ છે. હરડે, બહેડું અને આમળાથી બનતા ‘ત્રિફળા’ના મુખ્ય ઘટક તરીકે બહેડું શરદી, ખાંસી, પાચનક્રિયા સુધારવા તેમજ વાળના સ્વાસ્થ્ય માટે ઉત્તમ ઔષધિ છે.
આ અવસરે વાંકાનેરના ધારાસભ્ય શ્રી જીતુભાઈ સોમાણી, જિલ્લા કલેક્ટર શ્રી ડો. ઓમ પ્રકાશ, જિલ્લા વિકાસ અધિકારી શ્રી અનંદુ સુરેશ ગોવિંદ, આસિસ્ટન્ટ કલેકટર શ્રી ટીના કલ્યાણ, ડી.સી.એફ. શ્રી યુવરાજસિંહ ઝાલા સહિત વિવિધ વિભાગના અધિકારીશ્રીઓ-અગ્રણીશ્રીઓ તેમજ વિવિધ શાળાઓના વિદ્યાર્થીઓ- શિક્ષકો ઉપસ્થિત રહ્યા હતા.
