અકસ્માતમાં ઇજાગ્રસ્ત દર્દીને સારવાર સાથે રૂ. બે લાખની રોકડ અને કીમતી વસ્તુઓ પરત કરી ૧૦૮ની ટીમે પ્રામાણિકતાનું ઉદાહરણ પૂરું પાડ્યું

રિપોર્ટર

હિતેન્દ્ર ગોસાઈ

અમદાવાદ

ગુજરાતમાં ૧૦૮ ઇમરજન્સી એમ્બ્યુલન્સ સેવા કટોકટીના સમયે નાગરિકોને તાત્કાલિક આરોગ્યસેવા પૂરી પાડવામાં મહત્ત્વની ભૂમિકા ભજવી રહી છે. રાજ્યના છેવાડાના ગામડાંથી લઈને શહેરી વિસ્તારો સુધી અકસ્માત કે અન્ય આરોગ્યલક્ષી કટોકટીમાં ૧૦૮ની સેવા નાગરિકો માટે મદદરૂપ બની રહી છે. તાજેતરમાં અમદાવાદમાં ૧૦૮ની ટીમે સમયસર સારવાર પૂરી પાડવાની સાથે પ્રામાણિકતા અને માનવતાનું પ્રેરક ઉદાહરણ પૂરું પાડ્યું હતું.

પ્રાપ્ત વિગતો અનુસાર, ૧૫ ઓક્ટોબર, ૨૦૨૬ના રોજ સાંજે ૬:૨૧ કલાકે વૈષ્ણોદેવીથી ઝુંડાલ તરફ જતા માર્ગ પર અકસ્માતની ઘટના બની હતી. આ અંગે ૧૦૮ ઇમરજન્સી સેવાને જાણ કરવામાં આવતાં જ EMT નીલમ ચૌહાણ અને પાઇલટ જલદીપભાઈ પરમાર તાત્કાલિક ઘટનાસ્થળે પહોંચી ગયા હતા. ટીમે ઘટનાસ્થળે પરિસ્થિતિનો તાગ મેળવી ઇજાગ્રસ્તને તાત્કાલિક સારવાર આપવાની કામગીરી શરૂ કરી હતી.

આ અકસ્માતમાં ભુપતભાઈ મનુભાઈ કાઠેરિયાને માથાના ભાગે ગંભીર ઇજા થઈ હતી અને તેઓ બેભાન અવસ્થામાં હતા. ૧૦૮ની ટીમે તેમને જરૂરી પ્રાથમિક સારવાર આપ્યા બાદ વધુ સારવાર માટે સોલા સિવિલ હોસ્પિટલ ખાતે ખસેડ્યા હતા. કટોકટીની આ સ્થિતિમાં દર્દીને સમયસર તબીબી સહાય મળી રહે તે માટે ટીમે તાત્કાલિક કામગીરી કરી હતી.

દર્દીને હોસ્પિટલ પહોંચાડવાની કામગીરી દરમિયાન તેમની પાસે રહેલી રોકડ રકમ અને અન્ય કીમતી વસ્તુઓની સુરક્ષા અંગે પણ ૧૦૮ની ટીમે જવાબદારીપૂર્વક કામગીરી કરી હતી. દર્દી પાસે અંદાજે રૂ. બે લાખની રોકડ રકમ સહિતની કીમતી વસ્તુઓ હોવાથી ટીમે તેમના સગાં-સંબંધીઓનો સંપર્ક કરવાનો પ્રયાસ કર્યો હતો, જેથી આ વસ્તુઓ સુરક્ષિત રીતે તેમને પરત સોંપી શકાય.

ત્યારબાદ દર્દીના મિત્ર સંજયભાઈ હોસ્પિટલ ખાતે પહોંચ્યા હતા. ૧૦૮ની ટીમે તેમને દર્દીનો એક મોબાઇલ ફોન, એક લંચ બોક્સ અને અંદાજે રૂ. બે લાખની રોકડ રકમ સહિતની કીમતી વસ્તુઓ પરત સોંપી હતી. આ રીતે ઇજાગ્રસ્તને તાત્કાલિક સારવાર પૂરી પાડવાની સાથે તેમની અંગત વસ્તુઓની સુરક્ષા જાળવીને ટીમે પોતાની ફરજ પ્રત્યેની નિષ્ઠા દર્શાવી હતી.

કટોકટીના સમયે દર્દીની સારવારને પ્રાથમિકતા આપવા ઉપરાંત તેમની રોકડ રકમ અને કીમતી વસ્તુઓની જવાબદારી નિભાવતી ૧૦૮ની ટીમની આ કામગીરી પ્રામાણિકતા અને માનવતાનું પ્રેરક ઉદાહરણ બની છે. ટીમની આ કામગીરીની હોસ્પિટલના સ્ટાફ તેમજ દર્દીના સગાં-સંબંધીઓ દ્વારા પ્રશંસા કરવામાં આવી હતી. ૧૦૮ના કર્મચારીઓની આ પહેલ દર્શાવે છે કે ઇમરજન્સી સેવા માત્ર તાત્કાલિક તબીબી સહાય પૂરી પાડવા પૂરતી સીમિત નથી, પરંતુ સંવેદનશીલતા, જવાબદારી અને પ્રામાણિકતા જેવા મૂલ્યો પણ તેની કામગીરીનો મહત્ત્વનો ભાગ છે.