વાત્સલ્યમ્ સમાચાર
ભરત બોરીચા – જૂનાગઢ
જૂનાગઢ : જિલ્લામાં નશીલા પદાર્થોની બદી નેસ્તનાબૂદ કરવા હાથ ધરાયેલી ઝુંબેશ અંતર્ગત જૂનાગઢ એન્ટી નાર્કોટિક્સ વિંગ (ANW) દ્વારા મેંદરડા-ઈવનગર રોડ પરથી પ્રતિબંધિત કોડીન યુક્ત કફ સિરપની બોટલો સાથે એક શખ્સને ઝડપી પાડવામાં આવ્યો છે.
એન્ટી નાર્કોટિક્સ વિંગને મળેલી ચોક્કસ બાતમીના આધારે મેંદરડા-ઈવનગર રોડ પર આવેલ રઘુવીર માર્બલ સામે વોચ ગોઠવવામાં આવી હતી. આ દરમિયાન બર્ગમેન વાહન (નંબર GJ-11-CM-2027) પર કેફી ઔષધીય દ્રવ્યનો જથ્થો લઈને જૂનાગઢ તરફ નીકળેલા શકીલ ઉર્ફે કારો ગફ્ફાર શાહમદાર નામના શખ્સને અટકાવી તલાશી લેવાઈ હતી.
તલાશી દરમિયાન તેના કબજામાંથી ‘CODITOR-T’ (Codeine Phosphate and Triprolidine Hydrochloride) કફ સિરપની ૧૦૦ એમએલની સીલબંધ ૩૦ બોટલ, મોબાઈલ ફોન અને વાહન મળી કુલ રૂ. ૬૦,૯૪૦/- નો મુદ્દામાલ જપ્ત કરવામાં આવ્યો હતો. આ મામલે મેંદરડા પોલીસ સ્ટેશનમાં એન.ડી.પી.એસ. (NDPS) એક્ટ હેઠળ ગુનો દાખલ કરી આગળની તપાસ હાથ ધરવામાં આવી છે.
