MORBI;મોરબી મહેન્દ્રનગર રોડ પર સિરામિકની ઓફિસમા વિદેશી દારૂ બોટલો સાથે એક ઝડપાયો
મોરબી શહેરમાં કાયદો અને વ્યવસ્થાને વધુ કડક બનાવવાની દિશામાં પોલીસે એક મોટી કાર્યવાહી કરી છે. મોરબી-હળવદ રોડ પર આવેલા એક કોમ્પ્લેક્સમાં ચાલતી સિરામિકની ઓફિસમાં ગેરકાયદેસર રીતે વિદેશી દારૂનું વેચાણ થઈ રહ્યું હોવાની બાતમીના આધારે પોલીસે દરોડો પાડીને એક શખ્સને ઝડપી લીધો છે. પોલીસે સ્થળ પરથી સૂટકેસમાં છુપાવેલો રૂ. 30 હજારથી વધુ કિંમતનો વિદેશી દારૂનો જથ્થો જપ્ત કરી ધોરણસરની કાર્યવાહી હાથ ધરી છે.
પ્રાપ્ત વિગતો અનુસાર, મોરબી સિટી બી ડિવિઝન પોલીસની ટીમ મહેન્દ્રનગર ચોકડી પાસે પેટ્રોલીંગ અને હાજર હતી, તે દરમિયાન તેમને ચોક્કસ ખાનગી બાતમી મળી હતી કે, વાવડી રોડ પર રહેતો ભાવિનભાઈ કાનજીભાઈ મકવાણા (ઉં.વ. ૨૬) નામનો શખ્સ મહેન્દ્રનગર હળવદ રોડ પર ઈન્ડિયન ઓઈલ પંપ સામે આવેલા ‘ઈન્દ્ર પ્લાઝા’ ખાતે પોતાની ઓફિસમાં ઈંગ્લિશ દારૂનો જથ્થો રાખીને તેનું વેચાણ કરી રહ્યો છે.આ બાતમીના આધારે પોલીસે તાત્કાલિક ઈન્દ્ર પ્લાઝાના બીજા માળે આવેલી દુકાન નંબર ૨૧૦ (જેની બહાર ‘મિશ્રા સિરામિક’ લખેલું હતું) ત્યાં દરોડો પાડ્યો હતો.
સૂટકેસમાંથી મળી આવી વિદેશી દારૂની બોટલો પોલીસે દુકાનની અંદર પ્રવેશ કરીને સઘન તપાસ કરતા ઓફિસના અંદરના રૂમમાંથી એક સફેદ રંગની સૂટકેસ મળી આવી હતી. પોલીસે આ સૂટકેસ ખોલીને તપાસ કરતા તેમાંથી અલગ-અલગ બ્રાન્ડની વિદેશી દારૂની બોટલોનો જથ્થો મળી આવ્યો હતો:બ્લેન્ડર પ્રાઈડ: ૧૯ બોટલ જેમસન (Jameson): ૨ બોટલ
બ્લેક એન્ડ વાઈટ: ૩ બોટલ કુલ જથ્થો: ૨૪ નંગ વિદેશી દારૂની બોટલો કુલ રૂ. 30,614 નો મુદ્દામાલ જપ્ત પોલીસે સ્થળ પરથી દારૂની બોટલો સહિત કુલ રૂ. ૩૦,૬૧૪ ની કિંમતનો વિદેશી દારૂનો મુદ્દામાલ જપ્ત કર્યો છે.
આ મામલે પકડાયેલ આરોપી ભાવિનભાઈ કાનજીભાઈ મકવાણા વિરુદ્ધ મોરબી સિટી બી ડિવિઝન પોલીસ મથકે પ્રોહિબિશન એક્ટની કલમ ૬૫(એ)(એ) તથા ૧૧૬-બી મુજબ ગુનો નોંધીને આગળની કાયદેસરની કાર્યવાહી હાથ ધરવામાં આવી છે. શહેરમાં સિરામિક ઓફિસની આડમાં ચાલતી આવી ગેરકાયદે પ્રવૃત્તિઓ પર પોલીસની લાલ આંખથી બુટલેગરોમાં ફફડાટ ફેલાઈ ગયો છે.
