વાત્સલ્યમ સમાચાર પ્રવિણભાઇ ચૌહાણ વાવ થરાદ 
થરાદ શહેરમાં માનવતા અને ઈમાનદારીની સુંદર મિસાલ સામે આવી છે. થરાદ ખાતે આવેલી ICI બેંકમાં સિક્યુરિટી ગાર્ડ તરીકે ફરજ બજાવતા પ્રવીણભાઈ સોલંકીને બેંક પરિસરમાં ભરતભાઈ ચૌધરીનું પાકીટ મળી આવ્યું હતું.
મળેલા પાકીટમાં મહત્વના ઓરિજિનલ દસ્તાવેજો તેમજ રોકડ રકમ હોવાનું જાણવા મળ્યું હતું. પાકીટ મળ્યા બાદ સિક્યુરિટી ગાર્ડ પ્રવીણભાઈ સોલંકીએ તેમાં રહેલી વસ્તુઓ પોતાના ઉપયોગમાં લેવાને બદલે પ્રામાણિકતા દાખવી પાકીટ તેના મૂળ માલિક ભરતભાઈ ચૌધરીને પરત કર્યું હતું.
પોતાનું પાકીટ અને તેમાં રહેલા જરૂરી દસ્તાવેજો તથા રોકડ રકમ સલામત રીતે પરત મળતાં ભરતભાઈ ચૌધરીએ પ્રવીણભાઈ સોલંકીનો આભાર વ્યક્ત કરી તેમની ઈમાનદારીને બિરદાવી હતી.
આ ઘટનાએ ફરી એકવાર સાબિત કર્યું છે કે ઈમાનદારી અને માનવતા આજે પણ સમાજમાં જીવંત છે. ફરજ દરમિયાન મળેલી વસ્તુને સાચા માલિક સુધી પહોંચાડનાર પ્રવીણભાઈ સોલંકીની ઈમાનદારીની આસપાસના લોકોમાં પણ પ્રશંસા થઈ રહી છે.
