તા.02/10/2026/ બાવળિયા ઉમેશભાઇ સુરેન્દ્રનગર
સુરેન્દ્રનગર: ઝાલાવાડના મુખ્ય મથક એવા સુરેન્દ્રનગર શહેરના હાર્દ સમાન મુખ્ય રસ્તા પર મોડી સાંજે અચાનક અફરાતફરી અને ભયનો માહોલ સર્જાયો હતો. દારૂના પૂર્ણ નશામાં ધૂત બે શખ્સોએ જાહેર માર્ગ પર આવીને મોટે મોટેથી બૂમાબૂમ કરી ભારે હોબાળો મચાવ્યો હતો. આ ઘટનાને પગલે ત્યાંથી પસાર થતા વાહનચાલકો અને રાહદારીઓ થંભી ગયા હતા અને લોકોના ટોળા એકઠા થઈ ગયા હતા. જાહેર રસ્તા પર નશાખોરોનું બિભત્સ વર્તન પ્રાપ્ત માહિતી અનુસાર, શહેરના ગીચ અને સતત ધમધમતા મુખ્ય માર્ગ પર બે શખ્સો દારૂ પીધેલી હાલતમાં આવી પહોંચ્યા હતા. નશામાં ભાન ભૂલેલા આ શખ્સોએ રસ્તાની વચ્ચે ઉભા રહીને અસભ્ય વર્તન કરવાનું અને બૂમો પાડવાનું શરૂ કર્યું હતું. નશાખોરોના આ હંગામાને કારણે વાહનવ્યવહાર ખોરવાયો હતો અને મહિલાઓ તેમજ પરિવાર સાથે નીકળેલા રાહદારીઓમાં ભારે અસુરક્ષા અને ચિંતાની લાગણી ફેલાઈ ગઈ હતી. બનાવ અંગે સ્થાનિક નાગરિકો દ્વારા તાત્કાલિક ૧૧૨ પોલીસ કંટ્રોલ રૂમને જાણ કરવામાં આવી હતી. ઘટનાની ગંભીરતા સમજીને ૧૧૨ ની પોલીસ વાન ગણતરીની મિનિટોમાં જ સ્થળ પર ધસી આવી હતી. પોલીસે ત્વરિત કાર્યવાહી કરીને સ્થિતિ પર કાબૂ મેળવ્યો હતો અને હોબાળો મચાવી રહેલા નશાખોરો પૈકી એક શખ્સને કોર્ડન કરીને ઝડપી પાડ્યો હતો. પોલીસની આ સમય સૂચકતા અને ઝડપી કામગીરીના કારણે કોઈ મોટી અપ્રિય ઘટના કે માથાકૂટ થતાં અટકી ગઈ હતી. જાહેર અને મુખ્ય માર્ગો પર આ પ્રકારે નશાખોરો દ્વારા કરવામાં આવતા હોબાળાને પગલે શહેરની કાયદો અને વ્યવસ્થાની સ્થિતિ સામે ગંભીર સવાલો ઊભા થયા છે. સુરેન્દ્રનગરના જાગૃત નાગરિકો અને વેપારીઓ માંગ કરી રહ્યા છે કે સાંજના અને રાત્રીના સમયે શહેરના મુખ્ય માર્ગો, ચોક અને ભીડભાડ વાળા વિસ્તારોમાં પોલીસનું નાઈટ પેટ્રોલિંગ સઘન બનાવવામાં આવે, જેથી આવા અસામાજિક તત્વો પર લગામ લગાવી શકાય. હાલમાં પોલીસે નશાની હાલતમાં ઝડપાયેલા શખ્સ વિરુદ્ધ પ્રોહિબિશન એક્ટ હેઠળ ગુનો નોંધી કાયદેસરની કાર્યવાહી હાથ ધરી છે, જ્યારે ફરાર થઈ ગયેલા અન્ય એક શખ્સની શોધખોળ શરૂ કરી છે.
