MORBI:મોરબી LCB અને પેરોલ ફર્લો સ્ક્વોડની મોટી કાર્યવાહી: લૂંટ અને દારૂબંધીના ગુનામાં નાસતા ફરતા બે આરોપીઓ ઝડપાયા
મોરબી:સરહદી રેન્જ ભુજ દ્વારા નાસતા ફરતા આરોપીઓને પકડવા માટે શરૂ કરાયેલી વિશેષ ડ્રાઇવ અંતર્ગત મોરબી એલ.સી.બી. (LCB) તથા પેરોલ ફર્લો સ્ક્વોડની ટીમને મોટી સફળતા મળી છે. પોલીસે લૂંટ અને પ્રોહિબિશન (દારૂબંધી)ના ગુનામાં સંડોવાયેલા એક મહિલા સહિત કુલ બે વોન્ટેડ આરોપીઓની અટકાયત કરી કાયદેસરની કાર્યવાહી હાથ ધરી છે.
આઇ.જી.પી. સરહદી રેન્જ ભુજ દ્વારા રેન્જ વિસ્તારના જિલ્લાઓમાં નાસતા ફરતા તથા તપાસમાં બાકી રહેલા આરોપીઓને ઝડપી પાડવા તા. ૦૧/૧૦/૨૦૨૬ થી તા. ૧૫/૧૦/૨૦૨૬ સુધી ખાસ ઝુંબેશનું આયોજન કરવામાં આવ્યું છે. આ ડ્રાઇવ અન્વયે મોરબી એલ.સી.બી. અને પેરોલ ફર્લો સ્ક્વોડની ટીમ ટેકનિકલ સોર્સ, હ્યુમન ઇન્ટેલિજન્સ તેમજ બાતમીદારો મારફતે વોન્ટેડ શખ્સોના છુપાવાના સ્થળો શોધી રહી હતી.
આ દરમિયાન મળેલી ચોક્કસ બાતમીના આધારે પોલીસે બે અલગ-અલગ સ્થળોએ દરોડા પાડી નીચે મુજબના આરોપીઓને ઝડપી પાડ્યા હતા:
રણમલ ઉર્ફે મુખી દિલાવરભાઇ સામતાણી (ઉં.વ. ૪૩):
લૂંટના ગુનામાં ફરાર આ આરોપીને તેના રહેણાક મકાન ખીરઇ (તા. માળીયા-મીંયાણા, જિ. મોરબી) ખાતેથી ઝડપી પાડવામાં આવ્યો હતો. ત્યારબાદ આગળની કાર્યવાહી અર્થે તેને મોરબી તાલુકા પોલીસ સ્ટેશનને સોંપવામાં આવ્યો છે.
મુસ્કાનબેન અબ્બાસભાઈ કટીયા (ઉં.વ. ૨૧):
પ્રોહિબિશનના ગુનામાં નાસતી ફરતી આ મહિલા આરોપી (રહે. માળીયા વનાળીયા સોસાયટી, મોરબી-૨)ને મહિલા પોલીસ સ્ટાફની મદદથી મોરબીના ગ્રીન ચોક વિસ્તારમાંથી ઝડપી લેવામાં આવી હતી. આગળની કાયદેસરની તપાસ માટે તેને વાંકાનેર સિટી પોલીસ સ્ટેશનને સોંપવામાં આવી છે.
