WAKANER :વાંકાનેર ઢુવા કેમ્પ ખાતે પોલીસની સરાહનીય કામગીરી: વિખૂટા પડેલા ૧૨ વર્ષના બાળકનું ગણતરીના કલાકોમાં પરિવાર સાથે મિલન
વાંકાનેર તાલુકા પોલીસની સતર્કતા, 112 હેલ્પલાઇન અને સ્થાનિક સ્તરે સંકલિત પ્રયાસોથી પરપ્રાંતીય પરિવારના ચહેરા પર ફરી ખુશી નવરાત્રીના પર્વ દરમિયાન વાંકાનેરથી કચ્છ તરફ જતા પદયાત્રીઓ માટે માર્ગમાં ઠેર-ઠેર સેવાકીય કેમ્પો ધમધમી રહ્યા છે. ભક્તોની સેવા સાથે મોરબી જિલ્લા પોલીસ પણ સુરક્ષા અને માનવતાની ફરજમાં સતત એલર્ટ જોવા મળી રહી છે. તેનું જીવંત ઉદાહરણ તા. 6 ઓક્ટોબર, 2026ના રોજ ઢુવા નજીક બનેલી ઘટનામાં સામે આવ્યું હતું. ઢુવા નજીકના એક સેવાકીય કેમ્પમાં બપોરે આશરે 1:30 વાગ્યાના સુમારે 12 વર્ષનો બાળક વાલી-વારસદારથી વિખૂટો પડી ગયેલો જોવા મળ્યો હતો. ઘટનાની જાણ ઇમરજન્સી હેલ્પલાઇન 112 મારફતે થતાં બાળકને વાંકાનેર તાલુકા પોલીસ મથકે પહોંચાડવામાં આવ્યો હતો.
બાળક હિન્દીભાષી અને મૂળ અન્ય રાજ્યનો હોવાથી તેના પરિવાર સુધી પહોંચવું પોલીસ માટે સામાન્ય પડકાર નહોતો. પરંતુ તાલુકા પોલીસ ઇન્સ્પેક્ટર બી.વી. પટેલની સૂચના હેઠળ ટીમે તાત્કાલિક કાર્યવાહી શરૂ કરી અને બાળકને તેના પરિવાર સાથે મિલન કરાવવાનું લક્ષ્ય રાખ્યું.
ઢુવા બીટના એએસઆઈ સુરેશભાઈ ચાવડાએ સ્થાનિક સંપર્કો, માધ્યમો તથા વિવિધ હેલ્પલાઈનનો સહારો લઈ બાળક સાથે હિન્દીમાં વાતચીત કરી. બાળક પાસેથી મળતી વિગતોના આધારે તેના મૂળ વતન અને પરિવાર અંગે કડીઓ મેળવવાની કામગીરી શરૂ થઈ. સતત આશરે ત્રણ કલાકની મહેનત અને સંકલન બાદ બાળકના વાલી-વારસદાર સુધી પોલીસ પહોંચી શકી.
અંતે પરિવારને વાંકાનેર તાલુકા પોલીસ મથકે બોલાવી બાળકને સુરક્ષિત રીતે માતા-પિતાને સોંપવામાં આવ્યો. લાંબા સમયથી પોતાના પુત્રની શોધમાં ચિંતિત માતા-પિતાની આંખોમાં પુત્રને સામે જોઈ હર્ષના આંસુ છલકાયા હતા.આ કામગીરીમાં પીએસઆઈ ડી.વી. ખાંભલા, સી-ટીમના હેડ કોન્સ્ટેબલ હંસાબેન દેવજીભાઈ, પોલીસ કોન્સ્ટેબલ હિરલબેન દિનેશભાઈ, ઢુવા બીટના એએસઆઈ સુરેશભાઈ ચાવડા, પોલીસ કોન્સ્ટેબલ રાજેન્દ્રસિંહ સહિતની ટીમે મહત્વની ભૂમિકા ભજવી હતી.ફરજથી આગળ વધીને માનવતા સુધી પહોંચતી ખાખી આ ઘટના માત્ર એક બાળકને પરિવાર સુધી પહોંચાડવાની કામગીરી નથી. પદયાત્રીઓની ભીડ, સેવાકીય કેમ્પો અને તહેવારના માહોલ વચ્ચે એક બાળક વિખૂટું પડે ત્યારે તેને પોતાના પરિવાર સુધી પહોંચાડવા માટે પોલીસની તાત્કાલિક પ્રતિસાદ ક્ષમતા કેટલી મહત્વની બને છે તેનું આ ઉદાહરણ છે.
ભાષા અલગ, રાજ્ય અલગ અને પરિવાર સુધી પહોંચવાની કડી અસ્પષ્ટ હોવા છતાં પોલીસે હાર ન માની. 112થી શરૂ થયેલી મદદ, સ્થાનિક પોલીસની સતર્કતા, માનવીય સંવાદ અને સતત પ્રયત્નોનું પરિણામ પરિવારના મિલનરૂપે આવ્યું.
નવરાત્રીના પવિત્ર માહોલમાં સેવાકીય કેમ્પો ભક્તોને પાણી-ભોજન જેવી સુવિધા આપી રહ્યા છે ત્યારે વાંકાનેર તાલુકા પોલીસની આ કામગીરી એ સુરક્ષા સેવાને માનવતાની ઉષ્મા સાથે જોડી છે. આવા પ્રસંગો પોલીસ અને પ્રજા વચ્ચે વિશ્વાસનો સેતુ વધુ મજબૂત બનાવે છે.
