સુરત મહાનગરપાલિકા સંચાલિત સુમન હાઈસ્કૂલ નંબર-30, પુણા તળાવ, પુણાગામ ખાતે શાળા વિકાસ સંકુલ-6 તાપી કક્ષાનું એસવીએસ બાળ વૈજ્ઞાનિક પ્રદર્શન-2026 ઉત્સાહભેર યોજાયું હતું. વિદ્યાર્થીઓમાં વૈજ્ઞાનિક અભિગમ, સંશોધનવૃત્તિ, સર્જનાત્મકતા અને નવીન વિચારસરણી વિકસાવવાના હેતુથી યોજાયેલા આ પ્રદર્શનમાં સંકુલની 35 શાળાઓએ ભાગ લીધો હતો. વિવિધ વિષયો પર આધારિત કુલ 75 વૈજ્ઞાનિક કૃતિઓ રજૂ કરવામાં આવી હતી, જેમાં 150 વિદ્યાર્થી-વિદ્યાર્થિનીઓ અને 75 માર્ગદર્શક શિક્ષકો જોડાયા હતા. આશરે 3,000 મુલાકાતીઓએ પ્રદર્શનની મુલાકાત લઈને વિદ્યાર્થીઓની પ્રતિભા નિહાળી હતી.
કાર્યક્રમના અધ્યક્ષ અને ઉદ્ઘાટક તરીકે સુરતનાં મેયર શ્રીમતી માયાબેન માવાણી ઉપસ્થિત રહ્યાં હતાં. મુખ્ય મહેમાન તરીકે કરંજ-162 વિધાનસભાના ધારાસભ્ય શ્રી પ્રવીણભાઈ ઘોઘારી, શ્રી મનસુખભાઈ નારીયા, સામાજિક કાર્યકર શ્રી રાઘવજીભાઈ વેકરીયા તથા સ્વામિનારાયણ મંદિરના સંત ભગવત સ્વામી ઉપસ્થિત રહ્યા હતા. અતિથિ વિશેષ તરીકે વોર્ડ નંબર-16ના કોર્પોરેટર શ્રી વિક્રમભાઈ દેગામા, શ્રી જગદીશભાઈ સુતરીયા, શ્રીમતી સંગીતાબેન પરમાર અને શ્રીમતી રીટાબેન પટોળીયા સહિત જિલ્લા શિક્ષણ અધિકારી કચેરીના એજ્યુકેશન ઇન્સ્પેક્ટર શ્રી ધર્મેન્દ્રસિંહ ચુડાસમા, આસિસ્ટન્ટ એજ્યુકેશન ઇન્સ્પેક્ટર શ્રી કરીમભાઈ સમનાણી તથા શાળાના બિલ્ડિંગના બાંધકામ સાથે સંકળાયેલા કોન્ટ્રાક્ટર શ્રી વિજયભાઈ રાજ્યગુરુ ઉપસ્થિત રહ્યા હતા.
કાર્યક્રમની શરૂઆત મેયરશ્રી માયાબેન માવાણીના હસ્તે દીપ પ્રાગટ્યથી થઈ હતી. ત્યારબાદ વિદ્યાર્થીનીઓએ પ્રાર્થના રજૂ કરી હતી. શાળા વિકાસ સંકુલ-6ના કન્વીનર તથા સુમન હાઈસ્કૂલ-30ના આચાર્ય શ્રી અશોકભાઈ ધામેલીયાએ મહાનુભાવોનું શાબ્દિક સ્વાગત કર્યું હતું. મહેમાનોનું પુસ્તક, શાલ અને પુષ્પગુચ્છ દ્વારા સન્માન કરવામાં આવ્યું હતું. ત્યારબાદ મેયરશ્રીના હસ્તે રિબન કટિંગ કરીને પ્રદર્શન ખુલ્લું મૂકવામાં આવ્યું હતું. મહાનુભાવોએ વિવિધ કૃતિઓનું નિરીક્ષણ કરી વિદ્યાર્થીઓ પાસેથી તેમની કાર્યપદ્ધતિ, ઉપયોગિતા અને વૈજ્ઞાનિક અભિગમ વિશે માહિતી મેળવી હતી.
પ્રદર્શનમાં લિટલ ફ્લાવર સ્કૂલ દ્વારા રજૂ કરાયેલી હોટ પેકમાં વપરાતા સિંગલ યુઝ પ્લાસ્ટિકના નિકાલ અંગેની કૃતિ વિશેષ આકર્ષણનું કેન્દ્ર બની હતી. પર્યાવરણ માટે પડકારરૂપ પ્લાસ્ટિકના કચરાના યોગ્ય વ્યવસ્થાપન અને તેના નુકસાન અંગે જાગૃતિ ફેલાવતી આ કૃતિએ મુલાકાતીઓનું ધ્યાન ખેંચ્યું હતું. વિદ્યાર્થીઓએ રોજિંદા જીવનમાં પ્લાસ્ટિકના યોગ્ય નિકાલ અને પર્યાવરણ સંરક્ષણની જરૂરિયાત સમજાવવાનો પ્રયાસ કર્યો હતો.
આ પ્રદર્શને વિદ્યાર્થીઓને પોતાની પ્રતિભા રજૂ કરવાની તક પૂરી પાડવાની સાથે જિજ્ઞાસા, તાર્કિક વિચારશક્તિ, સંશોધનવૃત્તિ અને સમસ્યાઓના ઉકેલ માટેની ક્ષમતાને પ્રોત્સાહન આપ્યું હતું. કાર્યક્રમને સફળ બનાવવા માટે આચાર્ય શ્રી અશોકભાઈ ધામેલીયા, સંકુલની તમામ 35 શાળાઓના આચાર્યશ્રીઓ, માર્ગદર્શક શિક્ષકો, વિદ્યાર્થીઓ તથા સમગ્ર આયોજન ટીમે નોંધપાત્ર યોગદાન આપ્યું હતું. આમ, સુમન હાઈસ્કૂલ-30 ખાતે યોજાયેલ બાળ વૈજ્ઞાનિક પ્રદર્શન-2026 વિજ્ઞાન, સર્જનાત્મકતા અને નવીન વિચારસરણીનો પ્રેરણાદાયી ઉત્સવ બની રહ્યું હતું.
રિપોટર કલ્પેશ ધામેલીયા કામરેજ સુરત
