MORBI:મોરબી ફાયર વિભાગ સક્રિય: શાળા અને હોસ્પિટલમાં ફાયર સેફ્ટી ટ્રેનિંગ અપાઈ, ક્ષતિ ધરાવતી ઇમારતોને નોટિસ
મોરબી મહાનગરપાલિકાની અગ્નિશમન શાખા દ્વારા શહેરમાં આગ અને હોનારત જેવી દુર્ઘટનાઓ સામે સતર્કતા લાવવા માટે વિશેષ અભિયાન હાથ ધરવામાં આવ્યું છે. તા. ૦૭ ઓક્ટોબરથી ૧૩ ઓક્ટોબર દરમિયાન ફાયર વિભાગ દ્વારા શહેરની એક શાળામાં ૪૭૯ જેટલા વિદ્યાર્થીઓ તેમજ એક હોસ્પિટલમાં ૩૫ કર્મચારીઓને ફાયર પ્રિવેન્શન અને ઇમરજન્સી હેન્ડલિંગ અંગે વિશેષ તાલીમ આપવામાં આવી હતી.
તાલીમ દરમિયાન અગ્નિશમન સાધનોનો યોગ્ય ઉપયોગ કેવી રીતે કરવો અને કટોકટીના સમયે કેવા પ્રકારના પગલાં લેવા તે અંગે માર્ગદર્શન પૂરું પાડવામાં આવ્યું હતું. આ ઝુંબેશનો મુખ્ય ઉદ્દેશ્ય નાગરિકોમાં સુરક્ષા અંગે જાગૃતિ લાવી સંભવિત જાન-માલનું નુકસાન અટકાવવાનો છે.
તકેદારીના ભાગરૂપે ફાયર બ્રિગેડની ટીમ દ્વારા વિવિધ બિલ્ડીંગોમાં ફાયર સેફ્ટી સિસ્ટમ ઇન્સ્ટોલેશન તથા ફાયર સેફ્ટી સર્ટિફિકેટનું સ્થળ પર ચેકિંગ પણ કરવામાં આવ્યું હતું. તપાસ દરમિયાન નિયમોનું ઉલ્લંઘન અને ક્ષતિ ધરાવતી ઇમારતોને તાત્કાલિક અસરથી નોટિસ પાઠવી નિયમ મુજબ યોગ્ય વ્યવસ્થા ગોઠવવા કડક સૂચના આપવામાં આવી છે.
ઉલ્લેખનીય છે કે, આ સમયગાળા દરમિયાન મોરબી ફાયર વિભાગને ૪ ફાયર કોલ અને ૨ રેસ્ક્યુ કોલ મળ્યા હતા, જેમાં જવાનોએ સમયસૂચકતા વાપરી ત્વરિત કામગીરી કરી પરિસ્થિતિ કાબૂમાં લીધી હતી.
ઇમરજન્સી સમયે સંપર્ક કરો:કોઈપણ પ્રકારની આગ અથવા હોનારત જેવી આપત્તિ વખતે નાગરિકો મોરબી ફાયર અને ઈમરજન્સી સર્વિસના ટેલિફોન નંબર (૦૨૮૨૨) ૨૩૦૦૫૦, હેલ્પલાઇન નંબર ૧૦૧ અથવા ૧૧૨ પર તુરંત સંપર્ક કરી શકે છે.
