MORBI:મોરબી લાલપર ગામની સીમમાં હોટલ સચાલક પર છરી વડે હુમલો
મોરબી તાલુકા પોલીસ સ્ટેશનમાં આરોપી પવન ઉર્ફે પવા કોળી વિરુદ્ધ ગુનો નોંધાયો
મોરબીના લાલપર ગામની સીમમાં આવેલી હોટલ પર ચાની દુકાન કે હોટલ ચલાવતા એક આધેડ પર સ્પા સંચાલકે બોલાચાલીની અદાવતમાં છરીથી જીવલેણ હુમલો કર્યાની ઘટના સામે આવી છે. આ બનાવ અંગે ભોગ બનનારે મોરબી તાલુકા પોલીસ સ્ટેશનમાં ફરિયાદ નોંધાવતા પોલીસે કાયદેસરની કાર્યવાહી હાથ ધરી છે.
પ્રાપ્ત માહિતી અનુસાર, મોરબી શહેરમાં સામાકાંઠે આવેલી ઉમા ટાઉનશીપ સોસાયટીમાં રહેતા અને હોટલ ચલાવી પોતાના પરિવારનું ગુજરાન ચલાવતા જિનેન્દ્રભાઈ છગનભાઈ હિંગરાજિયા (ઉ.વ. ૫૩) લાલપર ગામની સીમમાં પોતાની હોટલ ચલાવે છે. ગતરોજ તેઓ પોતાની હોટલ પર હાજર હતા, તે દરમિયાન આરોપી પવન ઉર્ફે પવો કોળી (રહે. મોરબી) હોટલની સામે જ કોઈ સ્ત્રી સાથે બોલાચાલી કરી રહ્યો હતો.
આ ઝઘડો જોઈને જિનેન્દ્રભાઈ વચ્ચે પડ્યા હતા અને બંનેને સમજાવવાનો પ્રયાસ કર્યો હતો. મામલો થાળે પડ્યા બાદ જિનેન્દ્રભાઈ પોતાની હોટલ તરફ પરત ફરી રહ્યા હતા, ત્યારે ઉશ્કેરાયેલા આરોપી પવન ઉર્ફે પવાએ પાછળથી આવીને પોતાની પાસે રહેલી છરી વડે જિનેન્દ્રભાઈ પર હુમલો કરી દીધો હતો. આરોપીએ ફરિયાદીના ડાબા પગમાં ઘૂંટણની ઉપર સાથળના ભાગે છરીનો ઘા ઝીંકી દીધો હતો, જેના કારણે તેમને ગંભીર ઇજા પહોંચતા ૧૨ થી ૧૩ ટાંકા આવ્યા હોવાનું જાણવા મળ્યું છે.
ઈજાગ્રસ્ત જિનેન્દ્રભાઈ હિંગરાજિયાની ફરિયાદના આધારે મોરબી તાલુકા પોલીસે આરોપી પવન ઉર્ફે પવા કોળી વિરુદ્ધ ગુનો નોંધીને આગળની કાયદેસરની તજવીજ હાથ ધરી છે. આ ઘટનાને પગલે આસપાસના વિસ્તારમાં ચકચાર મચી જવા પામી છે.
