નર્મદા : ABVP દ્વારા સ્વયંસિદ્ધ સંમેલનનું આયોજન; 200 જેટલી વિદ્યાર્થી બહેનોએ ઉત્સાહભેર ભાગ લીધો
રાજપીપળા : જુનેદ ખત્રી
અખિલ ભારતીય વિદ્યાર્થી પરિષદ (ABVP) નર્મદા જિલ્લા દ્વારા તા. 15 ઓક્ટોબર, 2026ના રોજ ડૉ. બાબાસાહેબ આંબેડકર હૉલ ખાતે સ્વયંસિદ્ધા છાત્ર સંમેલનનું આયોજન કરવામાં આવ્યું હતું. આ સંમેલનમાં નર્મદા જિલ્લાના વિવિધ વિસ્તારોમાંથી આશરે 200 જેટલી વિદ્યાર્થી બહેનોએ ઉત્સાહભેર ભાગ લીધો હતો.
કાર્યક્રમમાં મુખ્ય અતિથિ તરીકે નર્મદા જિલ્લામાં ફરજ બજાવતાં પી.આઈ. એમ. એમ. મૌર્ય મેડમ વિશેષ ઉપસ્થિત રહ્યાં હતાં. તેમણે ઉપસ્થિત વિદ્યાર્થી બહેનોને સામાજિક જાગૃતિ, મહિલા સુરક્ષા અને મહિલાઓના અધિકારો અંગે વિસ્તૃત માર્ગદર્શન પૂરું પાડ્યું હતું. તેમણે વિદ્યાર્થી બહેનોને સમાજમાં જાગૃત રહીને પોતાના અધિકારો અને સુરક્ષા પ્રત્યે સજાગ રહેવા માટે પ્રેરિત કર્યાં હતાં.
આ સંમેલનનો મુખ્ય ઉદ્દેશ વિદ્યાર્થી બહેનોમાં સામાજિક જાગૃતિ કેળવવી, મહિલા સુરક્ષા અંગે સમજ વિકસાવવી તથા તેમનામાં આત્મવિશ્વાસ અને આત્મનિર્ભરતાની ભાવના મજબૂત કરવાનો હતો.
ABVP નર્મદા જિલ્લા દ્વારા વિદ્યાર્થી બહેનોના સર્વાંગી વિકાસ, સશક્તિકરણ અને સામાજિક જાગૃતિને પ્રોત્સાહન આપવાના હેતુથી આયોજિત આ સંમેલન પ્રેરણાદાયી રહ્યું હતું.
