યોગેશ કાનાબાર રાજુલા
મહિલાઓ, દીકરીઓ અને બાળાઓનું પુષ્પવર્ષા સાથે સન્માન; ૨૦૨૭માં ૧૭મા રાસોત્સવમાં ૧૭ વિશેષ ભેટ આપવાનો સંકલ્પ
રાજુલા: રાજુલા ખાતે બ્રહ્મસમાજ યુવા સંગઠન દ્વારા સતત ૧૬મા વર્ષે બ્રહ્મ રાસોત્સવ–૨૦૨૬નું ભવ્ય આયોજન કરવામાં આવ્યું હતું. ઔદીચ્ય બ્રહ્મસમાજની વાડી ખાતે યોજાયેલા આ ધાર્મિક અને સાંસ્કૃતિક મહોત્સવમાં માતૃશક્તિ, દીકરીઓ અને નાની બાળાઓનું વિશેષ સન્માન કરી મહિલા સશક્તિકરણ અને સામાજિક એકતાનો સંદેશ આપવામાં આવ્યો હતો.
રાસોત્સવ દરમિયાન જગદંબાના સ્વરૂપ સમાન મહિલાઓ, દીકરીઓ અને બાળાઓ પર પુષ્પવર્ષા કરી તેમનું સન્માન કરવામાં આવ્યું હતું. આ ઉપરાંત સમાજના આગેવાનો, શ્રેષ્ઠીઓ અને અન્ય વ્યક્તિઓને પણ સન્માનિત કરી સમાજમાં દરેકના યોગદાનને બિરદાવવામાં આવ્યું હતું.
કાર્યક્રમમાં વિવિધ ઇનામો અને પ્રોત્સાહક ભેટો દ્વારા નાની બાળાઓથી લઈને મહિલાઓ સુધી સૌનો ઉત્સાહ વધારવામાં આવ્યો હતો. ધાર્મિક આસ્થા સાથે સંસ્કાર, સમરસતા અને સામાજિક એકતાને પ્રાધાન્ય આપતા આ આયોજનને ઉપસ્થિત લોકોએ બિરદાવ્યું હતું.
૨૦૨૭માં ૧૭ વિશેષ ભેટ સાથે સન્માનનો સંકલ્પ
બ્રહ્મસમાજ યુવા સંગઠન દ્વારા સતત ૧૬ વર્ષથી જાળવવામાં આવતી આ પરંપરાને વધુ ભવ્ય બનાવવાના હેતુથી આગામી વર્ષ ૨૦૨૭માં યોજાનારા ૧૭મા બ્રહ્મ રાસોત્સવમાં મહિલાઓ, દીકરીઓ અને બાળાઓને ૧૭ વિશેષ ભેટ આપીને સન્માનિત કરવાનો સંકલ્પ વ્યક્ત કરવામાં આવ્યો છે. આ પહેલનો મુખ્ય હેતુ માતૃશક્તિ અને દીકરીઓને પ્રોત્સાહન આપી તેમનો આત્મવિશ્વાસ, પ્રતિભા અને ગૌરવ વધારવાનો છે.
ભક્તિભાવ સાથે માતાજીને વિદાય
રાસોત્સવના અંતિમ તબક્કે માતાજીને ભાવભીની વિદાય આપવામાં આવી હતી. સમગ્ર કાર્યક્રમ દરમિયાન ભક્તિ, આનંદ અને સામાજિક સમરસતાનો માહોલ જોવા મળ્યો હતો.
બ્રહ્મસમાજ યુવા સંગઠન, રાજુલા દ્વારા આયોજિત આ રાસોત્સવ સમાજમાં મહિલા સન્માન, દીકરીઓના પ્રોત્સાહન અને એકતાની ભાવનાને મજબૂત બનાવતી પ્રેરણાદાયી પહેલ બની રહ્યો છે. આયોજનને સફળ બનાવવા સહયોગ આપનાર દાતાશ્રીઓ, સેવાભાવીઓ, સમાજના આગેવાનો, વડીલો અને કાર્યકરોના યોગદાનને પણ બિરદાવવામાં આવ્યું હતું.
