ડેમોક્રેટિક રિપબ્લિક ઓફ કોંગો (DR Congo) માં શનિવારે સવારે એક દુઃખદ વિમાન અકસ્માત સર્જાયો. આ અકસ્માતમાં સૈન્યના બે ઉચ્ચ અધિકારીઓ સહિત કુલ 14 લોકોના મોત નીપજ્યા છે. કોંગોની સેનાએ આ ઘટનાની સત્તાવાર પુષ્ટિ કરી છે. મૃતકોમાં સૈન્ય અદાલતના વડા લેફ્ટનન્ટ જનરલ મુતોમ્બો કાટાલાઈ તિયેંદે અને સશસ્ત્ર દળોના ઓડિટર જનરલ લેફ્ટનન્ટ જનરલ બાકુમી લિકુલિયાનો સમાવેશ થાય છે. આ સિવાય ડેલિગેશનના અન્ય સભ્યો અને પ્લેનના કેબિન ક્રૂ મેમ્બર્સ પણ આ દુર્ઘટનામાં માર્યા ગયા છે.
કોંગોની સેનાના પ્રવક્તા મેજર જનરલ એફોમી એકેંગે જણાવ્યું હતું કે, આ વિમાન દક્ષિણ-પશ્ચિમ કોંગોના કિકવિટ શહેરથી રાજધાની કિંશાશા તરફ પાછું ફરી રહ્યું હતું. તે દરમિયાન વિમાનમાં અચાનક ટેકનિકલ ખામી સર્જાઈ હતી. સ્થાનિક અધિકારીઓના જણાવ્યા અનુસાર, ટેકનિકલ સમસ્યા બાદ વિમાન ‘કેંગે’ વિસ્તારમાં દુર્ઘટનાગ્રસ્ત થઈને તૂટી પડ્યું હતું. વિમાનમાં સવાર તમામ 14 લોકોના ઘટનાસ્થળે જ મોત થયા હતા.
કોંગોની નાગરિક ઉડ્ડયન ઓથોરિટી અને સેનાએ આ દુર્ઘટનાની ઉચ્ચ સ્તરીય તપાસ શરૂ કરી દીધી છે. અકસ્માત પાછળ કઈ ચોક્કસ ટેકનિકલ ખામી જવાબદાર હતી તે તપાસ અહેવાલ આવ્યા બાદ જ સ્પષ્ટ થશે. આ અકસ્માત એવા સમયે થયો છે જ્યારે કોંગોની સેના દેશના પૂર્વીય ભાગમાં ‘M23’ જેવા બળવાખોર જૂથો સામે યુદ્ધ લડી રહી છે. આવા સંવેદનશીલ સમયે સેનાના બે ટોચના લેફ્ટનન્ટ જનરલોનું મોત થવું એ કોંગોની સેના માટે ખૂબ મોટો આંચકો માનવામાં આવે છે.
