રિપોર્ટર
હિતેન્દ્ર ગોસાઈ
અમદાવાદ
ધૂણતા યુવકે કુટુંબી વૃદ્ધાનું નામ જાહેર કરતાં વિજ્ઞાન જાથામાં રજૂઆત, ખોટો આરોપ મૂક્યાની કબૂલાત બાદ જાહેરમાં માફી માગી
ડાકણ-ચુડેલ જેવા આરોપો મૂકવા કાયદેસર ગુનો હોવાનું જાથાએ સમજાવ્યું
અમદાવાદઃ ભારતમાં 21મી સદીમાં પણ ડાકણ-ચુડેલ, ભારે નજર, કોઈના ખાવા-પીવામાં કંઈક કરી દેવું જેવી અંધશ્રદ્ધાની પ્રથાઓ જોવા મળે છે. આવો જ એક બનાવ ભાવનગર જિલ્લાના મહુવા ખાતે સામે આવ્યો હતો. પિતૃકાર્ય અને શાંતિ યજ્ઞની ધાર્મિક વિધિ દરમિયાન ધૂણતા એક યુવકે પોતાના કુટુંબની વૃદ્ધા કમુબેન પર ડાકણ-ચુડેલ તથા ભારે નજર જેવા ગંભીર આરોપો મૂક્યા હતા. આ મામલે ભારત જન વિજ્ઞાન જાથાએ મહુવા પોલીસની મદદથી સમગ્ર ઘટનાનો પર્દાફાશ કર્યો હતો.
વિજ્ઞાન જાથા સમક્ષ રજૂઆત થતાં તપાસ હાથ ધરવામાં આવી હતી. તપાસ દરમિયાન આરોપો અંગે કોઈ આધારભૂત પુરાવા સામે આવ્યા ન હતા. અંતે યુવક અમન કનુભાઈ ખોડીફાસે પોતે ધૂણતા સમયે કમુબેનનું નામ બોલાઈ ગયું હોવાનું સ્વીકારી, પોતાના આરોપો ખોટા અને બેબુનિયાદ હોવાનું કબૂલ્યું હતું. તેણે જાહેરમાં કમુબેન અને તેમના પરિવારની માફી પણ માંગી હતી.
પિતૃકાર્યની વિધિમાં વૃદ્ધા પર આરોપ
મળતી માહિતી મુજબ રાજકોટ સ્થિત વિજ્ઞાન જાથાના કાર્યાલયમાં મહુવા તેમજ અમદાવાદના સિંધુ ભવન રોડ વિસ્તારમાં રહેતા મિલાપ રામજીભાઈ ખોડીફાસ રૂબરૂ પહોંચ્યા હતા. તેમણે પોતાની માતા કમુબેન અંગે સમગ્ર ઘટનાની જાણકારી આપી હતી.
મહુવા જાદરા રોડ, બેબીલેન્ડ પાસે રહેતા અમન કનુભાઈ ખોડીફાસના ઘરે તેમના પિતા કનુભાઈના મોક્ષાર્થે પિતૃકાર્ય, શાંતિ યજ્ઞ, માંડવા સહિતની ધાર્મિક વિધિનું આયોજન કરવામાં આવ્યું હતું. આ દરમિયાન અમન આશરે 30થી 60 મિનિટ સુધી ધૂણ્યો હતો. ધૂણતી વખતે તેણે પોતાના ઘરની અશાંતિનું મુખ્ય કારણ કમુબેન હોવાનું જાહેર કર્યું હતું.
આ સાથે કમુબેન પર ભારે નજર, કંઈક કરી નાખવું તેમજ ડાકણ-ચુડેલ જેવા આરોપો મૂકવામાં આવ્યા હતા. આ વાતની જાણ પરિવારના અન્ય સભ્યોને થતાં સમગ્ર પરિવારમાં ચિંતા અને અશાંતિનો માહોલ સર્જાયો હતો.
રજૂઆતમાં જણાવાયું હતું કે કમુબેન નિર્દોષ છે અને તેઓ લાંબા સમયથી અલગ રહે છે. બંને પરિવારો વચ્ચે ખાસ વ્યવહાર કે સંબંધ પણ નથી. તેમ છતાં તેમના પર આ પ્રકારના ગંભીર આરોપ મૂકાતા પરિવાર મુશ્કેલીમાં મુકાયો હતો.
કનુભાઈ ખોડીફાસનું વર્ષ 2015માં અવસાન થયું હોવાનું પણ રજૂઆતમાં જણાવાયું હતું. તેથી તેમના મોક્ષાર્થે યોજાયેલી ધાર્મિક વિધિ દરમિયાન કોઈ અન્ય વ્યક્તિના જીવનમાં અશાંતિનું કારણ બને તેવી વાતો કરવી કેટલાય પ્રશ્નો ઊભા કરતી હતી.
વિજ્ઞાન જાથાએ હાથ ધરી તપાસ
વિજ્ઞાન જાથાના રાજ્ય ચેરમેન એડવોકેટ જયંત પંડયાએ સમગ્ર ઘટનાની રજૂઆતને ગંભીરતાથી લઈ તપાસ હાથ ધરી હતી. તપાસ દરમિયાન વૃદ્ધા કમુબેન પર મૂકવામાં આવેલા આરોપો અંગે કોઈ સજ્જડ પુરાવા રજૂ થઈ શક્યા નહોતા.
જાથા દ્વારા સ્પષ્ટ કરવામાં આવ્યું હતું કે કોઈપણ વ્યક્તિ, ખાસ કરીને મહિલા પર ડાકણ, ચુડેલ અથવા અંધશ્રદ્ધા આધારિત ખોટા આરોપો મૂકવાથી તેના સામાજિક જીવન અને પરિવાર પર ગંભીર અસર પડી શકે છે. આવા આરોપો માત્ર અંધશ્રદ્ધાને પ્રોત્સાહન આપતા નથી પરંતુ કાયદાકીય મુશ્કેલી પણ ઊભી કરી શકે છે.
મામલાની ગંભીરતા ધ્યાનમાં લઈ જાથાના ચેરમેન જયંત પંડયાએ ગાંધીનગરના ઉચ્ચ અધિકારીઓ, ભાવનગર આઈ.જી.પી., પોલીસ અધિક્ષક તથા કલેક્ટરને પત્ર પાઠવી મહુવા પોલીસ સ્ટેશન તરફથી જરૂરી પોલીસ બંદોબસ્તની માંગણી કરી હતી.
તેના પગલે ભાવનગર કંટ્રોલ દ્વારા મહુવા ટાઉન પોલીસના પી.આઈ. બી.એમ. કરમટાને જરૂરી સૂચનાઓ આપવામાં આવી હતી. મહુવા પોલીસે જાથાના કાર્યક્રમ માટે એ.એસ.આઈ. એચ.એ. કપાસી, પોલીસ કોન્સ્ટેબલ અરવિંદભાઈ ચુડાસમા, પી.આર. ભાદરકા સહિતના પોલીસ કર્મચારીઓની ફાળવણી કરી હતી.
જાથાની ટીમ મહુવા પહોંચી
રાજકોટથી વિજ્ઞાન જાથાના ચેરમેન જયંત પંડયાના નેતૃત્વ હેઠળ રોમિત રાજદેવ, ગુલાબસિંહ ચૌહાણ, સાહિલ રાજદેવ, ખુમાણ બંધુઓ, ભક્તિબેન રાજગોર, ભાનુબેન શેઠીયા સહિતના કાર્યકરો અને સ્ટાફ મહુવા પોલીસ સ્ટેશન પહોંચ્યા હતા.
પોલીસ સ્ટેશનમાં હાજર અધિકારીઓ સાથે સમગ્ર મામલે રૂબરૂ ચર્ચા કર્યા બાદ જાથાની ટીમ પોલીસ બંદોબસ્ત સાથે જાદરા રોડ પર આવેલા અમન કનુભાઈ ખોડીફાસના ઘરે પહોંચી હતી.
જાથાના ચેરમેન જયંત પંડયાએ પરિવારના સભ્યોને સમગ્ર ઘટનાની જાણકારી આપીને કમુબેન પર મૂકવામાં આવેલા આરોપો અંગે પુરાવા રજૂ કરવા જણાવ્યું હતું.
આ દરમિયાન અમનની માતા તેમજ અન્ય બે મહિલાઓએ આરોપો અંગે પોતાની શંકા વ્યક્ત કરી હતી. તેમણે અગાઉથી કમુબેન તરફથી કંઈક કરી નાખવામાં આવ્યું હોવાની શંકા હોવાનું જણાવ્યું હતું. જાથાએ તેમને સમજાવ્યું હતું કે માત્ર શંકા અથવા અંધશ્રદ્ધાના આધારે કોઈ વ્યક્તિ પર ગંભીર આરોપ મૂકવા યોગ્ય નથી અને આવા આરોપો કાયદાકીય મુશ્કેલી ઊભી કરી શકે છે.
અમનની પત્ની સાથે પણ આ મુદ્દે ચર્ચા થઈ હતી. પોલીસમાં હાજર મહિલા કર્મચારીએ કાયદાકીય બાબતો સમજાવતાં વાતાવરણ શાંત થયું હતું. અમન ખેતી અને પેટ્રોલપંપના વ્યવસાય સાથે સંકળાયેલો હોવાથી તે થોડા સમય બાદ ઘરે આવવાનો હોવાનું પરિવાર તરફથી જણાવવામાં આવ્યું હતું.
આ દરમિયાન ગામના આગેવાનો તથા પરિવારના કેટલાક સભ્યોએ પણ જાથા સમક્ષ રજૂઆત કરી હતી અને એકવાર ભૂલ થઈ ગઈ હોવાથી મામલો માફી સાથે પૂર્ણ કરવા વિનંતી કરી હતી.
અમને આરોપ ખોટો હોવાનું સ્વીકાર્યું
થોડા સમય બાદ અમન કનુભાઈ, બાલાભાઈ મૂળજીભાઈ, ઈકબાલ સમા અને ભરતભાઈ બાલાભાઈ સહિતના લોકો જાથાના ચેરમેન જયંત પંડયા સમક્ષ રૂબરૂ આવ્યા હતા.
જાથાએ અમનને કમુબેન પર મૂકવામાં આવેલા આરોપો અંગે પુરાવા રજૂ કરવા જણાવ્યું હતું. આ દરમિયાન અમને પોતે 30થી 60 મિનિટ સુધી ધૂણ્યો હોવાની કબૂલાત કરી હતી. ધૂણતી વખતે શરીરમાં ધ્રુજારી અને થાકની સ્થિતિમાં કમુબેનનું નામ બોલાઈ ગયું હોવાનું તેણે જણાવ્યું હતું.
અમને સ્વીકાર્યું હતું કે કમુબેન નિર્દોષ છે અને તેમના પર મૂકવામાં આવેલા આરોપોનો કોઈ આધાર નથી. બંને પરિવારો વચ્ચે લાંબા સમયથી કોઈ ખાસ વ્યવહાર કે સંબંધ ન હોવાનું પણ સ્વીકારવામાં આવ્યું હતું.
પરિવારના સભ્યો દ્વારા વારંવાર જાથા સમક્ષ માફી આપવા વિનંતી કરવામાં આવી હતી. અમને પોતે પણ લેખિત કબુલાતનામું આપવા અને જાહેરમાં માફી માંગવા તૈયારી દર્શાવી હતી. આથી સમગ્ર મામલો શાંતિપૂર્ણ રીતે થાળે પડ્યો હતો.
કબુલાતનામું આપી માફી માંગી
અમને આપેલા કબુલાતનામામાં જણાવ્યું હતું કે પિતૃકાર્યની વિધિ દરમિયાન ધૂણતી વખતે કમુબેનનું નામ બોલાઈ ગયું હતું. તેણે પોતાના દ્વારા કરવામાં આવેલા આરોપોને ખોટા અને બેબુનિયાદ ગણાવી સ્વીકાર્યું હતું કે શરીરમાં ધ્રુજારી અને થાકની સ્થિતિમાં નિર્દોષ વ્યક્તિનું નામ બોલાઈ ગયું હતું.
તેણે વધુમાં જણાવ્યું હતું કે તેમના ઘરે કરવામાં આવેલી શાંતિ યજ્ઞની વિધિ તેમના માટે અશાંતિનું કારણ બની ગઈ હતી. અમને રામજીભાઈ પરિવાર તેમજ સમાજની જાહેરમાં માફી માંગી હતી અને ભવિષ્યમાં આવી ભૂલ ફરી નહીં થાય તેવી ખાતરી આપી હતી. તેણે સૌની હાજરીમાં કબુલાતનામા પર સહી પણ કરી હતી.
ખોટા આરોપો સામે કાયદાકીય ચેતવણી
વિજ્ઞાન જાથાના ચેરમેન જયંત પંડયાએ જણાવ્યું હતું કે કોઈપણ મહિલા અથવા વ્યક્તિ પર ડાકણ, ચુડેલ, ભારે નજર અથવા કંઈક કરી નાખ્યું હોવા જેવા ખોટા આરોપો મૂકવા ગંભીર બાબત છે. આવા આરોપો માટે આધારભૂત પુરાવા જરૂરી છે અને ખોટા આરોપોના કારણે વ્યક્તિની સામાજિક પ્રતિષ્ઠા તથા પરિવારના જીવન પર ગંભીર અસર થઈ શકે છે.
અમને સમગ્ર મામલો સ્વીકારી લીધો હોવાથી જાથાએ આગળની કાર્યવાહી ન કરવાનો નિર્ણય લીધો હતો. બાદમાં જયંત પંડયાએ મહુવા પોલીસ ઈન્સ્પેક્ટર બી.એમ. કરમટાને રૂબરૂ મળી સમગ્ર ઘટનાની જાણકારી આપી હતી. બંને પરિવારો તરફથી ફરિયાદ દાખલ કરવાની ઇચ્છા ન હોવાનું પણ પોલીસને જણાવાયું હતું.
પોલીસની કામગીરીની પ્રશંસા
સમગ્ર ઘટનામાં મહુવા પોલીસ દ્વારા આપવામાં આવેલા સહયોગ બદલ વિજ્ઞાન જાથાએ પોલીસ વિભાગનો આભાર માન્યો હતો. પોલીસ બંદોબસ્તના કારણે જાથાની ટીમ દ્વારા સમગ્ર મામલો શાંતિપૂર્ણ રીતે હાથ ધરવામાં આવ્યો હતો.
વિજ્ઞાન જાથા દ્વારા જણાવ્યા મુજબ આ તેમનો 1290મો સફળ પર્દાફાશ હતો. સમગ્ર કામગીરીમાં જાથાના ચેરમેન જયંત પંડયા, ગુલાબસિંહ ચૌહાણ, રોમિત રાજદેવ, સાહિલ રાજદેવ, ભાનુબેન શેઠીયા, ભક્તિબેન રાજગોર, ખુમાણ બંધુઓ સહિતના કાર્યકરો જોડાયા હતા.
મહુવા પોલીસ તરફથી હેડ કોન્સ્ટેબલ પી.આર. ભાદરકા, એ.એસ.આઈ. એચ.એ. કપાસી, પોલીસ કોન્સ્ટેબલ અરવિંદભાઈ ચુડાસમા સહિતના પોલીસ કર્મચારીઓએ કામગીરીમાં સહયોગ આપ્યો હતો.
આ ઘટનાએ ફરી એકવાર દર્શાવ્યું છે કે ધાર્મિક વિધિ કે વ્યક્તિગત માન્યતાના નામે કોઈ વ્યક્તિ પર આધારવિહોણા આરોપો મૂકવાથી પરિવાર અને સમાજમાં અશાંતિ ઊભી થઈ શકે છે. અંધશ્રદ્ધા કરતાં તથ્ય, પુરાવા અને કાયદાની સમજ સાથે કોઈપણ બાબતને જોવી જરૂરી છે.
