રિપોર્ટર માધવ મકવાણા લીમખેડા
m
ભથવાડા ગામે બાતમીના આધારે વિદેશી દારૂનો જથ્થો ઝડપાયો, પીકઅપ બોલેરો સહિત લાખોનો મુદ્દામાલ કબજે
દાહોદ જિલ્લાના પીપલોદ પોલીસ સ્ટેશન વિસ્તારમાં દારૂની હેરાફેરી સામે પોલીસની કાર્યવાહીથી બુટલેગરોમાં ફફડાટ!
દાહોદ જિલ્લામાં દારૂબંધીના કાયદાનો કડક અમલ કરાવવા પોલીસ તંત્ર સક્રિય બન્યું છે. ત્યારે પીપલોદ પોલીસ સ્ટેશનની ટીમે બાતમીના આધારે ભથવાડા ગામ નજીક હાઇવે રોડ પર વાહન ચેકિંગ દરમિયાન વિદેશી દારૂનો જથ્થો ઝડપી પાડ્યો છે. પોલીસની આ કાર્યવાહીએ દારૂની હેરાફેરી કરનારાઓમાં ફફડાટ ફેલાવ્યો છે.
પ્રાપ્ત વિગતો અનુસાર, પોલીસ અધિકારીઓની સૂચના અને માર્ગદર્શન હેઠળ પીપલોદ પોલીસ સ્ટેશનના પોલીસ સબ ઇન્સ્પેક્ટર એન.એન. પરમાર તથા પોલીસ સ્ટાફ પેટ્રોલિંગમાં હતા. તે દરમિયાન મળેલી બાતમીના આધારે વાહન ચેકિંગ હાથ ધરવામાં આવ્યું હતું. જેમાં મધ્યપ્રદેશના નંબર MP11 G2554 ધરાવતી પીકઅપ બોલેરો ગાડીમાંથી ભારતીય બનાવટનો વિદેશી દારૂ અને બિયરની બોટલોનો જથ્થો મળી આવતાં પોલીસ દ્વારા કાર્યવાહી કરવામાં આવી હતી.
લાખોનો મુદ્દામાલ કબજે
પોલીસે વિદેશી દારૂ અને બિયરના જથ્થા ઉપરાંત પીકઅપ બોલેરો ગાડી, રોકડ રકમ તથા મોબાઇલ ફોન સહિત કુલ અંદાજિત રૂ. 10,94,120નો મુદ્દામાલ કબજે કર્યો હોવાનું પ્રેસનોટમાં જણાવાયું છે.
એક આરોપી પકડાયો, અન્ય આરોપીની શોધખોળ
પોલીસની પ્રેસનોટ મુજબ, આ કેસમાં એક આરોપીને પકડી પાડવામાં આવ્યો છે, જ્યારે અન્ય એક આરોપી પકડવાનો બાકી હોવાનું જણાવાયું છે. સમગ્ર મામલે પોલીસ દ્વારા કાયદેસરની કાર્યવાહી હાથ ધરવામાં આવી છે.
પીપલોદ પોલીસની કામગીરી ચર્ચામાં
દારૂબંધીના કાયદાના અમલ માટે પોલીસ દ્વારા કરવામાં આવેલી આ કાર્યવાહી મહત્વપૂર્ણ માનવામાં આવે છે. જોકે, દારૂની હેરાફેરી પાછળ અન્ય કોઈ વ્યક્તિઓ સંકળાયેલી છે કે કેમ અને દારૂનો જથ્થો ક્યાંથી લાવવામાં આવ્યો હતો તે અંગે વધુ તપાસમાં વિગતો સામે આવી શકે છે.
હવે જોવાનું એ રહેશે કે તપાસ દરમિયાન દારૂની હેરાફેરીના નેટવર્ક અંગે વધુ શું વિગતો બહાર આવે છે
