સુરત: સુરત જિલ્લા કોંગ્રેસ સમિતિના સોશિયલ મીડિયા વિભાગમાં બારડોલી તાલુકાના કંટાળી ગામના શ્રી જ્યેશભાઈ ભરતભાઈ ઉમેરકરની મહામંત્રી તરીકે નિમણૂક કરવામાં આવી છે. આ નિમણૂક સુરત જિલ્લા કોંગ્રેસ પ્રમુખ શ્રી આનંદભાઈ ચૌધરીની ભલામણ તેમજ ગુજરાત પ્રદેશ કોંગ્રેસ પ્રમુખ શ્રી અમિતભાઈ ચાવડા, ગુજરાત વિધાનસભા કોંગ્રેસ પક્ષના નેતા ડૉ. તુષારભાઈ ચૌધરી અને ગુજરાત પ્રદેશ કોંગ્રેસ સોશિયલ મીડિયા ડિપાર્ટમેન્ટના ચેરમેન શ્રી ભૂમનભાઈ ભટ્ટની મંજૂરીથી કરવામાં આવી હોવાનું નિમણૂક પત્રમાં જણાવાયું છે.
સુરત જિલ્લા કોંગ્રેસ સોશિયલ મીડિયા વિભાગના પ્રમુખ શ્રી પ્રશાંતભાઈ ભંડારીએ જ્યેશભાઈ ઉમેરકરને મહામંત્રી તરીકેની જવાબદારી સોંપતાં વિશ્વાસ વ્યક્ત કર્યો છે કે તેઓ આ જવાબદારી નિષ્ઠાપૂર્વક નિભાવશે અને કોંગ્રેસ પક્ષના સંગઠનને વધુ મજબૂત તથા પ્રગતિશીલ બનાવવામાં મહત્વપૂર્ણ યોગદાન આપશે.
જ્યેશભાઈ ઉમેરકરની આ નિમણૂકથી કંટાળી ગામ સહિત બારડોલી તાલુકાના કોંગ્રેસ કાર્યકરો અને સમર્થકોમાં આનંદની લાગણી જોવા મળી રહી છે. નવી જવાબદારી સાથે તેઓ સોશિયલ મીડિયાના માધ્યમથી પક્ષની વિચારધારા, સંગઠનની પ્રવૃત્તિઓ અને જનતાના પ્રશ્નોને લોકો સુધી પહોંચાડવામાં સક્રિય ભૂમિકા ભજવશે તેવી અપેક્ષા વ્યક્ત કરવામાં આવી રહી છે.
આ નિમણૂક બદલ જ્યેશભાઈ ઉમેરકરને શુભેચ્છાઓ પાઠવવામાં આવી રહી છે. હવે તેઓ પોતાની નવી જવાબદારી કેવી રીતે નિભાવે છે અને સંગઠનને વધુ મજબૂત બનાવવા માટે કેવું યોગદાન આપે છે તેના પર સૌની નજર રહેશે.
રિપોટર કલ્પેશ ધામેલીયા કામરેજ સુરત
