વાત્સલ્યમ સમાચાર
મદન વૈષ્ણવ
નવસારી જિલ્લા વહીવટી તંત્ર દ્વારા વરિષ્ઠ નાગરિકો અને દિવ્યાંગજનોના જીવનને વધુ સરળ અને સુવિધાજનક બનાવવાની દિશામાં હાથ ધરાયેલી સંવેદનશીલ કામગીરીને રાજ્યના મુખ્યમંત્રી ભૂપેન્દ્રભાઈ પટેલે બિરદાવી છે. જિલ્લા કલેક્ટર મનીષ ગુરવાનીના માર્ગદર્શન હેઠળ હાથ ધરાયેલી આ પ્રજાલક્ષી કામગીરી બદલ મુખ્યમંત્રીએ શુભેચ્છા પત્ર પાઠવી અભિનંદન વ્યક્ત કર્યા છે. વહીવટમાં સંવેદનશીલતા અને સમાજના જરૂરિયાતમંદ વર્ગો પ્રત્યેની પ્રતિબદ્ધતાનું આ કાર્ય નોંધપાત્ર બન્યું છે.
વડાપ્રધાન નરેન્દ્રભાઈ મોદીના ‘વિકસિત ભારત @ ૨૦૪૭’ના સંકલ્પ અને સમાવેશી સુશાસનની ભાવનાને સાકાર કરવાના હેતુથી નવસારી જિલ્લામાં જિલ્લા મિનરલ ફાઉન્ડેશન (DMF) ગ્રાન્ટ, ‘રાષ્ટ્રીય વયોશ્રી યોજના’ અને ‘ADIP’ યોજનાનું સંકલન કરવામાં આવ્યું હતું. આ યોજનાઓના માધ્યમથી વરિષ્ઠ નાગરિકો અને દિવ્યાંગજનોને તેમની જરૂરિયાત મુજબ સહાયક સાધનો ઉપલબ્ધ કરાવવાની કામગીરી હાથ ધરવામાં આવી
જિલ્લા કલેક્ટર મનીષ ગુરવાનીના નેતૃત્વ હેઠળ સમગ્ર નવસારી જિલ્લામાં કુલ ૧૩ એસેસમેન્ટ કેમ્પ યોજવામાં આવ્યા હતા. આ કેમ્પોમાં ૭,૦૦૦થી વધુ વરિષ્ઠ નાગરિકો અને દિવ્યાંગજનોની શારીરિક તપાસ કરવામાં આવી હતી. ત્યારબાદ લાભાર્થીઓની જરૂરિયાતને ધ્યાનમાં રાખીને વ્હીલચેર, મોટરાઇઝ્ડ ટ્રાઇસિકલ, શ્રવણયંત્ર સહિતનાં ૩૦,૦૦૦થી વધુ સહાયક સાધનોનું વિતરણ કરવામાં આવ્યું હતું.
આ કામગીરીથી જરૂરિયાતમંદ નાગરિકોને દૈનિક જીવનમાં વધુ સુગમતા મળે, તેમની ગતિશીલતા વધે અને તેઓ વધુ આત્મનિર્ભર બની શકે તે દિશામાં મહત્વપૂર્ણ પ્રયાસ થયો છે. સરકારી યોજનાઓનો લાભ છેવાડાના લાભાર્થીઓ સુધી પહોંચાડવા માટે જિલ્લા વહીવટી તંત્ર દ્વારા કરવામાં આવેલા સંકલિત આયોજનની મુખ્યમંત્રીએ પ્રશંસા કરી છે.
નવસારી જિલ્લાના ચીખલી તાલુકામાં ALIMCOના સહયોગથી ‘પ્રધાનમંત્રી દિવ્યાશા વયોશ્રી કેન્દ્ર’ની કાયમી સ્થાપના કરવાનો પ્રસ્તાવ પણ આ કામગીરીનું મહત્વપૂર્ણ પાસું છે. આ કેન્દ્રની સ્થાપનાથી વરિષ્ઠ નાગરિકો અને દિવ્યાંગજનોને વર્ષ દરમિયાન જરૂરિયાત મુજબ સહાયક સાધનો મેળવવામાં સરળતા રહેવાની અપેક્ષા છે.
મુખ્યમંત્રીએ આ પ્રસ્તાવને વિશેષ આવકાર આપતાં જિલ્લા કલેક્ટર મનીષ ગુરવાનીની વહીવટી કુશળતા, આયોજનશક્તિ અને સંવેદનશીલ કાર્યશૈલીને બિરદાવી છે. કાયમી કેન્દ્રની પહેલથી લાભાર્થીઓને સહાયક સાધનો મેળવવા માટે વધુ સુલભ વ્યવસ્થા ઊભી થવાની દિશામાં આશા વ્યક્ત કરવામાં આવી છે.
સરકારી યોજનાઓનું અસરકારક સંકલન, જરૂરિયાતમંદ લોકોની ઓળખ અને તેમને ઉપયોગી સાધનો ઉપલબ્ધ કરાવવાની કામગીરીથી નવસારી જિલ્લા વહીવટી તંત્રની પ્રજાભિમુખ અભિગમને પ્રોત્સાહન મળ્યું છે. મુખ્યમંત્રી દ્વારા પાઠવવામાં આવેલા અભિનંદન પત્રથી જિલ્લા વહીવટી તંત્રના પ્રયાસોને બળ મળ્યું છે.
વરિષ્ઠ નાગરિકો અને દિવ્યાંગજનોને માત્ર યોજનાના લાભાર્થી તરીકે નહીં, પરંતુ સન્માનપૂર્વક અને વધુ સ્વતંત્ર જીવન જીવી શકે તેવા નાગરિકો તરીકે સહાય કરવાનો આ અભિગમ સમાવેશી વિકાસની દિશામાં મહત્વપૂર્ણ છે. નવસારી જિલ્લામાં હાથ ધરાયેલી આ કામગીરી સમાજના જરૂરિયાતમંદ વર્ગો સુધી સરકારી યોજનાઓનો લાભ પહોંચાડવાના પ્રયાસનું પ્રેરક ઉદાહરણ બની છે.
