તાઇવાનમાં ટાયફૂન ચાંપીએ ભારે તબાહી મચાવી છે. શનિવારે આ વાવાઝોડાને કારણે એક વ્યક્તિનું મોત થયું છે, જ્યારે 527 લોકો ઘાયલ થયા છે. ભારે પવન અને મુશળધાર વરસાદને કારણે અનેક વૃક્ષો ધરાશાયી થયાં છે અને વીજળી પુરવઠો ખોરવાયો છે. નબળું પડ્યા બાદ વાવાઝોડું હવે ઉત્તર તરફ ચીનના દરિયાકાંઠા તરફ આગળ વધી રહ્યું છે.
તાઇવાનના સેન્ટ્રલ વેધર એડમિનિસ્ટ્રેશન (CWA)ના જણાવ્યા અનુસાર, ચાંપી અગાઉ સુપર ટાયફૂન તરીકે વર્ગીકૃત થયું હતું અને આ વર્ષે પ્રશાંત મહાસાગરમાં આવેલા સૌથી શક્તિશાળી વાવાઝોડાંમાં તેનું નામ સામેલ હતું. નબળું પડવા છતાં શનિવારે તેના કેન્દ્ર નજીક પવનની ઝડપ લગભગ 126 કિમી પ્રતિ કલાક નોંધાઈ હતી. હવામાન વિભાગે જણાવ્યું કે શનિવારે વહેલી સવારે વાવાઝોડું તાઇવાનના ઉત્તરપૂર્વીય દરિયાકાંઠા નજીકથી પસાર થયું હતું. ત્યાર બાદ તે ટાપુથી લગભગ 150 કિમી પૂર્વમાં હતું. આગાહી મુજબ, ચાંપી ઉત્તર તરફ વળીને ચીનના દરિયાકાંઠા તરફ આગળ વધશે અને ત્યાર બાદ દક્ષિણ જાપાન તરફ જશે.
તાઇવાનના ફાયર વિભાગના જણાવ્યા અનુસાર, લિયુચીઉ ટાપુ પર દરિયાના મોજાંમાં તણાઈ જવાથી એક વ્યક્તિનું મોત થયું હતું. ભારે પવન અને મુશળધાર વરસાદ દરમિયાન અન્ય 527 લોકો ઘાયલ થયા હતા. વીજળી કંપની તાઇપાવરે જણાવ્યું કે વાવાઝોડાને કારણે 1.67 લાખથી વધુ ઘરોમાં વીજળી પુરવઠો બંધ થઈ ગયો હતો. જોકે, મોટાભાગનાં ઘરોમાં વીજળી ફરી શરૂ કરી દેવામાં આવી હતી.
