દિલ્હીમાં પ્રદર્શનોમાં સામેલ થવાને લઈને સ્પેશિયલ એક્ઝિક્યુટિવ મેજિસ્ટ્રેટ એટલે કે SEM દ્વારા AISAની રાષ્ટ્રીય અધ્યક્ષ નેહા બોરાને નોટિસ જારી કરવામાં આવી હતી, અને તેમની પાસે ‘પીસ બોન્ડ’ પર સહી કરવા માટે કહેવામાં આવ્યું હતું. નેહાએ આ નોટિસ વિરુદ્ધ દિલ્હી હાઈકોર્ટનો દરવાજો ખટખટાવ્યો હતો, પરંતુ હાઈકોર્ટે તેમની અરજી ફગાવી દીધી હતી. એવું માનવામાં આવી રહ્યું હતું કે, હાઈકોર્ટમાંથી ઝટકો મળ્યા બાદ નેહા બોરા હવે પીસ બોન્ડ ભરી દેશે, પરંતુ નેહાએ તેના પર સહી કરવાનો સ્પષ્ટ ઇનકાર કરી દીધો છે.
મુખ્ય ચૂંટણી કમિશનર જ્ઞાનેશ કુમાર વિરુદ્ધ થયેલા પ્રદર્શનોમાં નેહા સતત સક્રિય રહી છે. પીસ બોન્ડ પર સહી ન કરવા અંગે વાત કરતા તેમણે કહ્યું કે, આ બોન્ડ તેમના સૈદ્ધાંતિક અને સંવિધાનિક અધિકારોને છીનવી રહ્યો છે, તેથી તે તેના પર સહી નહીં કરે. તેમણે સ્પષ્ટ કર્યું કે, દેશમાં ક્યાંય પણ શાંતિપૂર્ણ પ્રદર્શન કરવાથી લોકોને રોકવા માટે આ બોન્ડનો ઉપયોગ કરવામાં આવી રહ્યો છે, અને ન તો તે પોતે કે, ન તો AISA નો કોઈ સભ્ય આ બોન્ડ પર સહી કરશે.
