તા.૦૩.૧૧.૨૦૨૬
વાત્સલ્યમ્ સમાચાર
અજય સાંસી દાહોદ
Dahod:દાહોદમાં દિવાળીના તહેવાર ટાણે જ ખાદ્ય પદાર્થોમાં ગંભીર ભેળસેળનો પર્દાફાશ! પ્રખ્યાત દુકાનમાંથી ગુલાબજાંબુ ખાતા એક જ પરિવારના ત્રણ સભ્યોની તબિયત લથડી.
દાહોદમાંથી એક ચોંકાવનારા સમાચાર સામે આવ્યા છે. દિવાળીના પવિત્ર તહેવાર પર જ્યાં લોકો મીઠાઈઓ વહેંચીને ખુશીઓ ઉજવતા હોય છે, ત્યાં જ દાહોદ શહેરમાંથી ગુણવત્તા વગરની અને ભેળસેળયુક્ત મીઠાઈ વેચાતી હોવાનો ગંભીર કિસ્સો સામે આવ્યો છે. શહેરની એક પ્રખ્યાત મીઠાઈની દુકાનમાંથી ગુલાબજાંબુ ખરીદીને ખાનાર એક જ પરિવારના ત્રણ સભ્યોની તબિયત અચાનક લથડતા લોકોમાં ભારે રોષ ફાટી નીકળ્યો છે.દાહોદ શહેરના એક પરિવારે દિવાળીની ઉજવણી માટે સ્થાનિક વિસ્તારની એક જાણીતી અને પ્રખ્યાત મીઠાઈની દુકાનમાંથી ગુલાબજાંબુ ખરીદ્યા હતા. ઘરે પરિવારના સભ્યોએ ઉત્સાહથી આ ગુલાબજાંબુ ખાધા, પરંતુ ખાવાની સાથે જ તેઓને અસ્વસ્થતા અનુભવાઈ હતી અને જોતજોતામાં ત્રણેય સભ્યોની તબિયત ગંભીર રીતે બગડી ગઈ હતી.આ અચાનક બનેલી ઘટનાથી પરિવારમાં ગભરાટ ફેલાઈ ગયો હતો અને તાત્કાલિક ધોરણે યોગ્ય સારવાર હાથ ધરવામાં આવી હતી. આ ઘટનાને પગલે પરિવાર અને આસપાસના લોકોમાં ભારે આક્રોશ વ્યાપી ગયો છે.સ્થાનિક નાગરિકો અને પીડિત પરિવાર દ્વારા આક્ષેપ કરવામાં આવી રહ્યો છે કે તહેવારોના સમયે વધુ નફો કમાવાની લાલચે કેટલાક બેજવાબદાર વેપારીઓ લોકોના સ્વાસ્થ્ય સાથે ખુલ્લેઆમ ચેડાં કરી રહ્યા છે.આ ગંભીર ઘટના બાદ દાહોદના નાગરિકોમાં રોષ છે અને તેઓએ આરોગ્ય વિભાગ તથા ફૂડ એન્ડ ડ્રગ્સ ડિપાર્ટમેન્ટ પાસે તાત્કાલિક અસરથી કડક પગલાં લેવાની માંગ કરી છે. લોકોની પ્રબળ માંગ છે કે જવાબદાર અધિકારીઓ તુરંત સંબંધિત મીઠાઈની દુકાન પર દરોડા પાડે, ત્યાંથી ખોરાકના નમૂના (સેમ્પલ) લઈને લેબોરેટરીમાં તપાસ મોકલે અને નાગરિકોના સ્વાસ્થ્ય સાથે રમત રમનારા દુકાનદાર સામે કડકમાં કડક કાનૂની કાર્યવાહી કરવામાં આવે.
