કેશોદ – જૂનાગઢ વેરાવળ બાયપાસ પાસે આવેલી ન્યુ એરા પ્રોફેસર એકેડેમી ખાતે ગણિત-વિજ્ઞાન પ્રદર્શનનું આયોજન કરવામાં આવ્યું હતું. પ્રદર્શનમાં 500થી વધુ વિદ્યાર્થીઓએ ઉત્સાહભેર ભાગ લઈ વિવિધ વિષયો પર 100થી વધુ કૃતિઓ રજૂ કરી હતી. સૌર ઊર્જા, પવન ઊર્જા, જળસંચય, પર્યાવરણ સંરક્ષણ, રોબોટિક્સ, અવકાશ વિજ્ઞાન અને આર્ટિફિશિયલ ઇન્ટેલિજન્સ (એઆઈ) જેવા વિષયોને આવરી લેતી કૃતિઓએ ઉપસ્થિત મહેમાનો અને વાલીઓનું ધ્યાન ખેંચ્યું હતું.પ્રદર્શનનું ઉદ્ઘાટન જૂનાગઢ જિલ્લા સ્વનિર્ભર શાળા સંચાલક મંડળના પ્રમુખ જી.પી. કાઠી, ઉપપ્રમુખ અમુભાઈ પાનસુરીયા, પર્યાવરણવિદ રેવતુભા રાયજાદા, ભારત વિકાસ પરિષદની ટીમ તથા શાળાના સંચાલક પ્રો.પ્રવીણ ગજેરા દ્વારા દીપ પ્રાગટ્ય કરીને કરવામાં આવ્યું હતું.પ્રદર્શનમાં વિદ્યાર્થીઓએ જુદા જુદા વિષયો અને થીમ આધારિત મોડેલ્સ તથા વૈજ્ઞાનિક કૃતિઓ રજૂ કરી પોતાની સર્જનાત્મકતા અને સંશોધનવૃત્તિનું પ્રદર્શન કર્યું હતું. કેટલાક વિદ્યાર્થીઓએ સૌર પેનલ દ્વારા વીજળી ઉત્પન્ન કરવાની પ્રક્રિયા, વરસાદી પાણીના સંગ્રહ અને શુદ્ધિકરણની પદ્ધતિ, સ્માર્ટ ટ્રાફિક સિસ્ટમ, સ્વચાલિત સિંચાઈ પ્રણાલી તથા માનવ શરીરની વિવિધ પ્રણાલીઓના કાર્યને મોડેલ દ્વારા સમજાવ્યું હતું. ગણિત વિભાગમાં ભૌમિતિક આકારો, વૈદિક ગણિત, સંભાવના, માપન અને દૈનિક જીવનમાં ગણિતના ઉપયોગને લગતી કૃતિઓ રજૂ કરવામાં આવી હતી. વક્તાઓએ જણાવ્યું હતું કે, વિદ્યાર્થીઓમાં વૈજ્ઞાનિક અભિગમ વિકસે, નવીન વિચારોને પ્રોત્સાહન મળે અને બાળકો આવી પ્રવૃત્તિઓમાં વધુને વધુ ભાગ લે તેવા હેતુથી આ પ્રકારના પ્રદર્શનોનું આયોજન મહત્ત્વપૂર્ણ છે. પ્રયોગો અને મોડેલ્સ દ્વારા વિદ્યાર્થીઓને પાઠ્યપુસ્તકના જ્ઞાનને વ્યવહારુ જીવન સાથે જોડવાની તક મળે છે. આવી પ્રવૃત્તિઓથી સમસ્યા ઉકેલવાની ક્ષમતા, ટીમવર્ક અને સંશોધનવૃત્તિનો પણ વિકાસ થાય છે. આ પ્રસંગે મોટી સંખ્યામાં વાલીઓ, વિવિધ શાળાના વિદ્યાર્થીઓ અને મહેમાનો ઉપસ્થિત રહ્યા હતા. પ્રદર્શનની કૃતિઓનું મૂલ્યાંકન જલ્પેશ ડોબરિયા, રાજેશ મારુ, અક્ષર વઘાસિયા અને નીરજ ચૂડાસમાએ નિર્ણાયક તરીકે કર્યું હતું. બે અલગ-અલગ વિભાગોમાં વિદ્યાર્થીઓને પ્રથમ, દ્વિતીય અને તૃતીય ક્રમાંક આપી પ્રોત્સાહિત કરવામાં આવ્યા હતા. શ્રેષ્ઠ કૃતિઓ રજૂ કરનાર વિદ્યાર્થીઓને પ્રમાણપત્રો અને ઇનામો આપી સન્માનિત કરવામાં આવ્યા હતા. સમગ્ર કાર્યક્રમનું સંચાલન આનંદ બથિયાએ કર્યું હતું. પ્રદર્શને વિદ્યાર્થીઓને પોતાની પ્રતિભા રજૂ કરવા અને વિજ્ઞાન તથા ગણિતના વિષયોને પ્રાયોગિક રીતે સમજવા માટે ઉપયોગી મંચ પૂરું પાડ્યું હતું. વિદ્યાર્થીઓ અને વાલીઓએ પ્રદર્શનને ઉત્સાહપૂર્વક નિહાળી આયોજકો તથા શાળાના શિક્ષકોની કામગીરીને બિરદાવી હતી. આભાર વિધિ ચિંતન પનારા દ્વારા કરવામાં આવી હતી
રિપોર્ટર : અનિરૂધસિંહ બાબરીયા – કેશોદ
