MORBI:મોરબીના પંચાસર રોડ પરથી એક્ટિવામાં દારૂ-બિયરની હેરાફેરી કરતો શખ્સ ઝડપાયો
એક્ટિવા અને દારૂ સહિત કુલ રૂ. ૫૪,૪૦૦/-નો મુદ્દામાલ જપ્ત સીટી એ ડિવિઝન પોલીસે પ્રોહિબિશન એક્ટ હેઠળ ગુનો નોંધી તપાસ હાથ ધરી
મોરબી:શહેરમાં દારૂબંધીના કડક અમલ વચ્ચે મોરબી સીટી એ ડિવિઝન પોલીસે પંચાસર રોડ પરથી એક્ટિવા સ્કૂટરમાં વિદેશી દારૂ અને બિયરની હેરાફેરી કરતા એક યુવકને ઝડપી પાડ્યો છે. પોલીસે વાહન તથા દારૂ સહિતનો મુદ્દામાલ કબજે કરી માલ સપ્લાય કરનાર અન્ય એક આરોપી સામે પણ કાયદેસરની કાર્યવાહી હાથ ધરી છે.
પોલીસ પેટ્રોલિંગ દરમિયાન પંચાસર રોડ પર આવેલા સત્યમ હોલ નજીકથી શંકાસ્પદ હાલતમાં પસાર થતાં એક નંબર પ્લેટ વગરના એક્ટિવાને અટકાવવામાં આવ્યું હતું. સ્કૂટરની ડેકીની તલાશી લેતાં તેમાંથી એબસોલ્યુટ વોડકા બ્રાન્ડની બે બોટલ (કિંમત રૂ. ૩,૮૦૦/-) તેમજ ટુબર્ગ પ્રીમિયમ સ્ટ્રોંગ બિયરના પાંચ ટીન (કિંમત રૂ. ૬૦૦/-) મળી કુલ રૂ. ૪,૪૦૦/-નો નશાકારક જથ્થો મળી આવ્યો હતો.
ઝડપાયેલ આરોપી અને મુદ્દામાલની વિગત:ઝડપાયેલ આરોપી: યશ હિતેષભાઈ શર્મા (ઉં.વ. ૨૨, રહે. શેરી નં. ૨, કુબેરનગર, નવલખી રોડ, મોરબી) ફરાર આરોપી: ઓમદેવસિંહ ઉર્ફે મોમભા (રહે. કુબેરનગર, મોરબી) જપ્ત કરાયેલ મુદ્દામાલ: વિદેશી દારૂ અને બિયર (કિંમત રૂ. ૪,૪૦૦/-) તથા એક્ટિવા (કિંમત રૂ. ૫૦,૦૦૦/-) મળી કુલ રૂ. ૫૪,૪૦૦/-
પકડાયેલા યુવકની પ્રાથમિક પૂછપરછમાં આ દારૂ-બિયરનો જથ્થો ઓમદેવસિંહ ઉર્ફે મોમભા પાસેથી મેળવ્યો હોવાની કબૂલાત મળતાં પોલીસે તેને વોન્ટેડ જાહેર કર્યો છે. સીટી એ ડિવિઝન પોલીસે બંને વિરુદ્ધ પ્રોહિબિશન એક્ટ હેઠળ ગુનો દાખલ કરી આગળની તપાસ શરૂ કરી છે.
