વાત્સલ્યમ સમાચાર
મદન વૈષ્ણવ
ખેરગામમાં રસ્તાઓ, ગ્રામ પંચાયત ભવન, રેસ્ટ હાઉસ, આંગણવાડી કેન્દ્ર અને ગેસ આધારિત સ્મશાનભૂમિ સહિત છ વિકાસકાર્યો હાથ ધરાશે
નવસારી જિલ્લાના ચીખલી અને ખેરગામ તાલુકામાં ગ્રામ્ય વિસ્તારોની માળખાકીય સુવિધાઓને વધુ મજબૂત બનાવવા તથા નાગરિકોને આધુનિક સુવિધાઓ પૂરી પાડવાના હેતુથી કુલ રૂ. ૫૯૬.૨૬ લાખના વિવિધ વિકાસકાર્યોનું ખાતમુહૂર્ત કરવામાં આવ્યું હતું. રાજ્યના આદિજાતિ વિકાસ, ખાદી, કુટીર અને ગ્રામોદ્યોગ વિભાગના કેબિનેટ મંત્રીશ્રી નરેશભાઈ પટેલ તથા નવસારી જિલ્લા પંચાયતનાં પ્રમુખ શ્રીમતી નિરાલીબેન નાયકના હસ્તે વિવિધ વિકાસકાર્યોનો પ્રારંભ કરવામાં આવ્યો હતો. આ વિકાસકાર્યોમાં ચીખલી તાલુકાના વાડ ખાતે રૂ. ૨૦૦ લાખના ખર્ચે કોઝવે થ્રી પુલનું નિર્માણ તેમજ ખેરગામ તાલુકામાં કુલ રૂ. ૩૯૬.૨૬ લાખના ખર્ચે છ વિવિધ વિકાસકાર્યોનો સમાવેશ થાય છે. રસ્તાઓનું નવીનીકરણ, ગ્રામ પંચાયત ભવન, રેસ્ટ હાઉસ, આંગણવાડી કેન્દ્ર અને ગેસ આધારિત સ્મશાનભૂમિ જેવી સુવિધાઓના નિર્માણથી ગ્રામ્ય વિસ્તારોના વિકાસને નવી ગતિ મળશે.ચીખલી તાલુકાના વાડ-કાવલાખડક જંક્શનથી ખેરગામ-પાંજુઝ રોડ પર રૂ. ૨૦૦ લાખ એટલે કે રૂ. બે કરોડના અંદાજિત ખર્ચે કોઝવે થ્રી પુલના નિર્માણકાર્યનું ખાતમુહૂર્ત કરવામાં આવ્યું હતું. આ પુલનું નિર્માણ પૂર્ણ થતાં સંબંધિત માર્ગ પર અવરજવર વધુ સુગમ બનવાની અને સ્થાનિક લોકોને પરિવહનની સુવિધામાં લાભ મળવાની અપેક્ષા છે.
ગ્રામીણ વિસ્તારોમાં માર્ગ અને પુલની સુવિધા સ્થાનિક નાગરિકો, વિદ્યાર્થીઓ, ખેડૂતો તથા વાહનચાલકો માટે મહત્ત્વપૂર્ણ બની રહે છે. આ પ્રકલ્પથી વિસ્તારની માર્ગવ્યવસ્થાને વધુ સુદૃઢ બનાવવાની દિશામાં મહત્વપૂર્ણ પગલું ભરાયું છે. ખેરગામ ખાતે યોજાયેલા મુખ્ય કાર્યક્રમમાં તાલુકાના વિવિધ છ વિકાસકાર્યોનું ખાતમુહૂર્ત કરવામાં આવ્યું હતું. આ કાર્યો અંતર્ગત રસ્તાઓ, સ્મશાનભૂમિ, આંગણવાડી, ગ્રામ પંચાયત ભવન અને રેસ્ટ હાઉસ જેવી સુવિધાઓ ઊભી કરવામાં આવશે. ખેરગામ તાલુકામાં હાથ ધરાનારા વિકાસકાર્યોની વિગતો નીચે મુજબ છે. ન્યુ ગુજરાત પેટર્ન ૧૦ ટકા રાજ્ય કક્ષા ફંડ હેઠળ ખેરગામની સ્મશાનભૂમિ ખાતે ગેસ આધારિત સગડી તથા શેડ અને રૂમના નિર્માણ માટે રૂ. ૮૦ લાખની જોગવાઈ કરવામાં આવી છે. આ સુવિધાથી અંતિમવિધિ માટેની વ્યવસ્થામાં આધુનિકતા અને સુગમતા લાવવાનો પ્રયાસ કરવામાં આવશે.
MMGSY રિસરફેસિંગ યોજના હેઠળ ખેરગામ સરસીયા કૂણિયા છત મંદિરથી સામર કૂણિયા થઈ પાંજુઝ રોડને જોડતા માર્ગના રિસરફેસિંગ માટે રૂ. ૧૦૦ લાખ એટલે કે રૂ. એક કરોડનો ખર્ચ કરવામાં આવશે. માર્ગનું નવીનીકરણ થતાં સ્થાનિક લોકોની અવરજવર વધુ સુવિધાજનક બનશે.
MMGSY રિસરફેસિંગ યોજના હેઠળ તાડ કૂણિયા અને સામર કૂણિયાને જોડતા માર્ગ માટે રૂ. ૪૦ લાખની ફાળવણી કરવામાં આવી છે. આ માર્ગના કામથી આસપાસનાં ગામો વચ્ચેની કનેક્ટિવિટી વધુ મજબૂત બનાવવામાં મદદ મળશે.
મુખ્યમંત્રી આદિમજૂથ સર્વાંગી ઉત્કર્ષ યોજના અંતર્ગત ખેરગામ તાલુકાના મિશન ખાતે નવા આંગણવાડી કેન્દ્રના મકાનના નિર્માણ માટે રૂ. ૧૩ લાખનો ખર્ચ કરવામાં આવશે. આંગણવાડી કેન્દ્રના નવા મકાનથી બાળકોને પૂરક પોષણ, પ્રાથમિક સંભાળ અને બાળવિકાસલક્ષી પ્રવૃત્તિઓ માટે યોગ્ય માળખાકીય સુવિધા ઉપલબ્ધ કરાવવામાં મદદ મળશે. CDP-5 યોજના અંતર્ગત ખેરગામ ખાતે નવી ગ્રામ પંચાયત બિલ્ડીંગના નિર્માણ માટે રૂ. ૪૦ લાખની ફાળવણી કરવામાં આવી છે. નવા પંચાયત ભવનથી સ્થાનિક વહીવટી કામગીરી, ગ્રામજનોને મળતી સેવાઓ અને પંચાયતને લગતા કામકાજ માટે વધુ સુવિધાજનક માળખું ઉપલબ્ધ થશે.
ખેરગામ ખાતે નવા રેસ્ટ હાઉસના નિર્માણ માટે રૂ. ૧૨૩.૨૬ લાખ એટલે કે રૂ. ૧.૨૩ કરોડથી વધુની જોગવાઈ કરવામાં આવી છે. આ પ્રકલ્પ તાલુકામાં આવનારા મહેમાનો અને સત્તાવાર કામગીરી માટે જરૂરી સુવિધાઓ ઊભી કરવામાં ઉપયોગી બનશે. આ પ્રસંગે કેબિનેટ મંત્રીશ્રી નરેશભાઈ પટેલે જણાવ્યું હતું કે, પંચાયત ભવન, રેસ્ટ હાઉસ, ગુણવત્તાયુક્ત રસ્તાઓ અને સ્મશાનભૂમિ જેવી આધુનિક સુવિધાઓના નિર્માણથી ગ્રામ્ય વિસ્તારોનું માળખાકીય માળખું વધુ મજબૂત બનશે. આવા વિકાસકાર્યો નાગરિકોના રોજિંદા જીવનમાં સકારાત્મક પરિવર્તન લાવવામાં મદદરૂપ બનશે. ગ્રામ્ય વિસ્તારોમાં પાયાની સુવિધાઓનો વિકાસ થાય તે માટે માર્ગો, જાહેર સુવિધાઓ અને સ્થાનિક સ્વરાજ્યની સંસ્થાઓને લગતાં માળખાંનું નિર્માણ મહત્ત્વપૂર્ણ છે. ચીખલી અને ખેરગામ તાલુકામાં હાથ ધરવામાં આવેલા આ વિકાસકાર્યોના પરિણામે સ્થાનિક નાગરિકોને વિવિધ ક્ષેત્રોમાં સુવિધાઓનો લાભ મળવાની આશા છે. પંચાયત માર્ગ અને મકાન પેટા વિભાગ, ચીખલી દ્વારા આયોજિત આ કાર્યક્રમમાં સ્થાનિક પદાધિકારીઓ, સંબંધિત અધિકારીઓ તથા મોટી સંખ્યામાં ગ્રામજનો ઉપસ્થિત રહ્યા હતા. કેબિનેટ મંત્રીશ્રી નરેશભાઈ પટેલ અને જિલ્લા પંચાયત પ્રમુખ શ્રીમતી નિરાલીબેન નાયકના હસ્તે થયેલા ખાતમુહૂર્ત સાથે ચીખલી અને ખેરગામ તાલુકાના વિવિધ વિકાસકાર્યોને આગળ ધપાવવાની દિશામાં મહત્વપૂર્ણ શરૂઆત કરવામાં આવી હતી.
