અલીન્દ્રા ચોકડી પર લાકડાની હેરાફેરીનો પર્દાફાશ: કાલોલ મામલતદારની ટીમે ગેરકાયદેસર ટ્રેક્ટર જપ્ત કર્યું.

તારીખ ૦૧/૧૦/૨૦૨૬

સાજીદ વાઘેલા કાલોલ 

કાલોલ મામલતદાર અને તેમની ટીમ દ્વારા ગેરકાયદેસર વહન અને પ્રવૃત્તિઓ સામે ઝુંબેશ તેજ કરવામાં આવી છે. તે અંતર્ગત આજ રોજ અલીન્દ્રા ચોકડી પાસેથી ગેરકાયદેસર રીતે લાકડાનો જથ્થો ભરીને જઈ રહેલા એક ટ્રેક્ટરને ઝડપી પાડવામાં આવ્યું છે.

મળતી માહિતી મુજબ, કાલોલ મામલતદારની ટીમે અલીન્દ્રા ચોકડી પાસે શંકાસ્પદ રીતે પસાર થઈ રહેલા એક ટ્રેક્ટરને અટકાવ્યું હતું. મામલતદાર ટીમે ટ્રેક્ટર ચાલક પાસે લાકડાના પરિવહન અંગેની જરૂરી પાસ કે પરમિટની માંગણી કરી હતી. જોકે, ચાલક પાસે કોઈ પણ પ્રકારની અધિકૃત પાસ-પરમિટ મળી આવી નહોતી.તપાસ દરમિયાન ટ્રેક્ટરનો નંબર GJ 17 CE 3089 હોવાનું અને તેના ચાલક/માલિકનું નામ ગણપતસિંહ ફતેસિંહ ગોહિલ હોવાનું ખુલવા પામ્યું હતું. મામલતદાર દ્વારા ચાલકની કડક પૂછપરછ કરવામાં આવતા તેણે જણાવ્યું હતું કે આ લાકડાનો જથ્થો મઘાસર ગામેથી ભરીને અલીન્દ્રા ખાતે લઈ જવામાં આવી રહ્યો હતો.વગર પાસ-પરમિટના લાકડાની હેરાફેરી મામલે મામલતદાર કચેરી દ્વારા તુરંત જ વન વિભાગ (ફોરેસ્ટ ડિપાર્ટમેન્ટ)ને જાણ કરવામાં આવી હતી.