MORBI:મોરબીમાં અર્પિત મહિલા ટ્રસ્ટ અને સિમ્પોલો ફાઉન્ડેશન દ્વારા ૧૦૦ બહેનોને સિલાઈ મશીન વિતરણ: મહિલા સશક્તિકરણ તરફ મહત્વનું પગલું
મોરબી:”કૌશલ્યથી આત્મનિર્ભરતા તરફ, સશક્ત નારીનું એક પગલું!” ના સંકલ્પ સાથે મોરબી ખાતે અર્પિત મહિલા ટ્રસ્ટ અને સિમ્પોલો ફાઉન્ડેશનના સંયુક્ત ઉપક્રમે ‘સ્વરોજગારલક્ષી તાલીમ અને સિલાઈ મશીન વિતરણ’ કાર્યક્રમનું સફળ આયોજન કરવામાં આવ્યું હતું.
આ કાર્યક્રમ અંતર્ગત ગ્રામ્ય વિસ્તારની ૧૦૦ જેટલી જરૂરિયાતમંદ બહેનોને ૩૦ દિવસની સિલાઈ અને કૌશલ્ય વિકાસ તાલીમ સફળતાપૂર્વક પૂર્ણ કર્યા બાદ વિનામૂલ્યે સિલાઈ મશીન અર્પણ કરવામાં આવ્યા હતા. ઉપસ્થિત મહાનુભાવોએ તાલીમાર્થી મહિલાઓ સાથે સીધો સંવાદ સાધી તેમને પ્રોત્સાહિત કર્યા હતા.
કાર્યક્રમના મુખ્ય મુદ્દા:કૌશલ્ય વિકાસ: ગ્રામીણ મહિલાઓને ૩૦ દિવસ સુધી વ્યાવસાયિક સ્તરે સિલાઈ કામની સઘન તાલીમ આપવામાં આવી.સાધન સહાય: તાલીમ મેળવેલી ૧૦૦ બહેનોને પોતાના ઘરે જ રોજીરોટી શરૂ કરવા સિલાઈ મશીનનું વિતરણ કરાયું.
સમાજ ઉત્થાન: મહિલા આર્થિક રીતે સક્ષમ બને ત્યારે સમગ્ર પરિવાર અને સમાજનો સાચો વિકાસ થાય છે તે વિચારને બળ મળ્યું.તાલીમબદ્ધ બહેનો પોતાના પગ પર ઊભી રહી સન્માનપૂર્વક સ્વરોજગાર મેળવી શકે તે માટે બંને સંસ્થાઓ દ્વારા હાથ ધરાયેલા આ સેવાકીય પ્રયાસને ઉપસ્થિત અગ્રણીઓ અને સ્થાનિક લોકોએ બિરદાવ્યો હતો.
