સ્ટેચ્યુ ઓફ યુનિટી ખાતે રાષ્ટ્રીય એકતા દિવસની પરેડ માટે NCC કેડેટ્સની તાલીમ શરૂ

રિપોર્ટર

હિતેન્દ્ર ગોસાઈ

અમદાવાદ

ગુજરાત સહિત 22 રાજ્યોના આશરે 200 કેડેટ્સ અમદાવાદમાં સંકલિત તાલીમ લઈ રહ્યા છે

અમદાવાદ, શનિવાર, 10 ઓક્ટોબર 2026

સરદાર વલ્લભભાઈ પટેલની જન્મજયંતિ નિમિત્તે 31 ઓક્ટોબર, 2026ના રોજ કેવડિયા ખાતે યોજાનારી રાષ્ટ્રીય એકતા દિવસની ઉજવણી અંતર્ગત નેશનલ કેડેટ કોર્પ્સ (NCC)ના કેડેટ્સ દ્વારા પરેડની તૈયારી શરૂ કરવામાં આવી છે. ગુજરાત સહિત દેશનાં 22 રાજ્યોના આશરે 200 NCC કેડેટ્સ અમદાવાદમાં સંકલિત તાલીમ લઈ રહ્યા છે.

NCC નિદેશાલય, ગુજરાતના માર્ગદર્શન હેઠળ યોજાઈ રહેલી આ તાલીમમાં કેડેટ્સ બોર્ડર સિક્યોરિટી ફોર્સ (BSF), સેન્ટ્રલ ઇન્ડસ્ટ્રિયલ સિક્યોરિટી ફોર્સ (CISF), સશસ્ત્ર સીમા બળ (SSB) અને અન્ય કેન્દ્રીય સશસ્ત્ર પોલીસ દળોની ટુકડીઓ સાથે કદમતાલ મિલાવીને પરેડની કવાયત કરી રહ્યા છે. દસ દિવસ સુધી ચાલનારી આ તાલીમ દરમિયાન કેડેટ્સને પરેડની શિસ્ત, સંકલન અને સામૂહિક કવાયતનો અભ્યાસ કરાવવામાં આવશે.

તાલીમ પૂર્ણ થયા બાદ કેડેટ્સ કેવડિયા ખાતે સ્ટેચ્યુ ઓફ યુનિટીની પૃષ્ઠભૂમિમાં યોજાનારી રાષ્ટ્રીય એકતા દિવસની ઉજવણીમાં ભાગ લેશે. આ કાર્યક્રમ સરદાર વલ્લભભાઈ પટેલની જન્મજયંતિ નિમિત્તે યોજાય છે. દેશના રાજકીય એકીકરણમાં સરદાર પટેલની ભૂમિકાને યાદ કરવા માટે દર વર્ષે 31 ઓક્ટોબરે રાષ્ટ્રીય એકતા દિવસ મનાવવામાં આવે છે.

આ તાલીમ શિબિરનો હેતુ વિવિધ રાજ્યોમાંથી આવેલા કેડેટ્સને એકસાથે તાલીમ આપવાની સાથે તેમની વચ્ચે પરસ્પર સમજણ, સહકાર અને સાંસ્કૃતિક આદાનપ્રદાનને પ્રોત્સાહન આપવાનો પણ છે. શિબિર દરમિયાન કેડેટ્સને દેશના વિવિધ પ્રદેશોની પરંપરાઓ, સંસ્કૃતિ અને વારસાને જાણવાની તક મળશે. વિવિધ રાજ્યોના યુવાનો વચ્ચે મિત્રતાના સંબંધો મજબૂત બનાવવા અને રાષ્ટ્રીય એકતાની ભાવનાને પ્રોત્સાહન આપવા પર પણ ભાર મૂકવામાં આવશે.

NCC દ્વારા આ પ્રકારની તાલીમ અને રાષ્ટ્રીય કાર્યક્રમોમાં ભાગીદારીના માધ્યમથી યુવાનોમાં શિસ્ત, જવાબદારી, સહકાર અને રાષ્ટ્ર પ્રત્યેની પ્રતિબદ્ધતા વિકસાવવાનો પ્રયાસ કરવામાં આવે છે. રાષ્ટ્રીય એકતા દિવસની પરેડમાં કેડેટ્સની ભાગીદારી આ દિશામાં યોજાતી પ્રવૃત્તિઓનો એક ભાગ છે.