યોગેશ કાનાબાર રાજુલા
*220 KV વીજ ટ્રાન્સમિશન લાઇનના વળતરના મુદ્દે રાજુલા–જાફરાબાદ ખેડૂત સંકલન સમિતિની મુખ્યમંત્રીશ્રી સમક્ષ રજૂઆત*
નવા સરકારી ઠરાવ મુજબ વળતર ચૂકવવા અને નિર્ણય ન આવે ત્યાં સુધી કામગીરી સ્થગિત રાખવાની માગણી
રાજુલા, તા. 27 ઑક્ટોબર, 2026
અમરેલી જિલ્લાના રાજુલા તાલુકાના લુણસાપુર અને લોઠપુર ગામોની ખેતીની જમીનોમાંથી પસાર થતી 220 KV GPPC કોવાયા–ઓથા વીજ ટ્રાન્સમિશન લાઇનના વળતર મુદ્દે આજે રાજુલા–જાફરાબાદ ખેડૂત સંકલન સમિતિ દ્વારા ગુજરાતના માનનીય મુખ્યમંત્રીશ્રીને સંબોધીને પ્રાંત અધિકારીશ્રી, રાજુલા મારફતે આવેદનપત્ર આપવામાં આવ્યું હતું.
સમિતિએ રજૂઆત કરી હતી કે આ પ્રોજેક્ટમાં કેટલાક સર્વે નંબરો માટે જૂના સરકારી ઠરાવ મુજબ વળતર નક્કી કરવામાં આવ્યું હોવાની અને કેટલાક જમીનમાલિકોને હજુ સુધી વળતર ચૂકવાયું ન હોવા છતાં કામગીરી શરૂ કરવામાં આવી હોવાની ફરિયાદો છે. ખેડૂતોના જણાવ્યા મુજબ, કેટલાક કિસ્સાઓમાં કામગીરી શરૂ કરતાં પહેલાં યોગ્ય નોટિસ આપવામાં આવી ન હતી તથા પોલીસ પ્રોટેક્શન હેઠળ કામગીરી હાથ ધરવામાં આવી હતી.
ગુજરાત સરકારના ઊર્જા અને પેટ્રોકેમિકલ્સ વિભાગના તા. 04/07/2026ના ઠરાવની જોગવાઈઓનો ઉલ્લેખ કરીને સમિતિએ માગણી કરી છે કે આ પ્રોજેક્ટમાં નવા ઠરાવની લાગુ પડતી જોગવાઈઓની તપાસ કરવામાં આવે અને તમામ અસરગ્રસ્ત ખેડૂતોને નિયમ મુજબ યોગ્ય વળતર મળે તે સુનિશ્ચિત કરવામાં આવે.
સમિતિએ વધુમાં માગણી કરી છે કે કામગીરી નવી ટાવર સ્થાપનાની છે કે જૂની લાઇનના રિપ્લેસમેન્ટ અથવા રેસ્ટોરેશનની છે તેની ટેકનિકલ તપાસ કરવામાં આવે. વળતરની પુનઃગણતરી, બાકી રકમની ચુકવણી અને કાયદેસર પ્રક્રિયા અંગે નિર્ણય ન આવે ત્યાં સુધી સક્ષમ અધિકારી દ્વારા સંબંધિત સ્થળે કામગીરી સ્થગિત રાખવા વચગાળાનો આદેશ કરવામાં આવે.
સમિતિએ જિલ્લા વહીવટી તંત્ર અને GETCOના સંબંધિત અધિકારીઓ દ્વારા સંયુક્ત તપાસ યોજી, અસરગ્રસ્ત ખેડૂતોના પ્રતિનિધિમંડળ સાથે બેઠક કરીને પારદર્શક અને સમયબદ્ધ ઉકેલ લાવવાની પણ માગણી કરી છે.
સમિતિના જણાવ્યા મુજબ, ખેડૂતો વિકાસલક્ષી વીજ સુવિધાઓના વિરોધી નથી; પરંતુ ખેતીની જમીનને થતું નુકસાન, વળતરની ગણતરી અને સરકારી ઠરાવના અમલમાં ખેડૂતોને ન્યાય મળવો જોઈએ. આથી રાજ્ય સરકાર આ મુદ્દે તાત્કાલિક હસ્તક્ષેપ કરી અસરગ્રસ્ત ખેડૂતોના કાયદેસર હિતોનું રક્ષણ કરે તેવી માગણી કરવામાં આવી છે.
— રાજુલા–જાફરાબાદ ખેડૂત સંકલન સમિતિ
યોગેશ કાનાબાર રાજુલા
