મહિલાની ઉંમર અંદાજે ૫૦થી ૫૫ વર્ષ; પોલીસે અકસ્માતે મોત અંગે નોંધ કરી તપાસ હાથ ધરી
વાત્સલ્યમ સમાચાર
મદન વૈષ્ણવ
પ્રાપ્ત માહિતી મુજબ તા.૧૭ ના રોજ વાંસદા તાલુકાના ગંગાપુર ગામે નિશાળ ફળિયા સ્થિત ભારત સેવા સંઘ આશ્રમના બસ સ્ટેન્ડ નજીકથી અંદાજે ૫૦થી ૫૫ વર્ષની અજાણી મહિલાનો મૃતદેહ મળી આવતાં ચકચાર મચી ગઈ છે. આ બનાવ અંગે વાંસદા પોલીસ સ્ટેશનમાં અકસ્માતે મોતની નોંધ કરી આગળની કાર્યવાહી હાથ ધરવામાં આવી છે. બનાવની જાણ થતાં પોલીસે અજાણી મહિલાની ઓળખ મેળવવા માટે વિગતો નોંધી છે. મહિલાની ઊંચાઈ અંદાજે ૪ ફૂટ ૫ ઇંચ હોવાનું દર્શાવવામાં આવ્યું છે. તેના શરીર પર જાંબલી અને સફેદ રંગની ડિઝાઇનવાળો ટૂંકી બાંયનો ડ્રેસ તથા મહેંદી રંગનો પાલવ હોવાનું જણાવાયું છે. તેના વાળ ટૂંકા અને સફેદ-કાળા રંગના હતા.
દસ્તાવેજમાં મહિલાના શરીર પર તાજી ઈજાનાં સ્પષ્ટ નિશાન જણાયાં ન હોવાનું પણ નોંધવામાં આવ્યું છે. જોકે, મહિલાના મૃત્યુનું ચોક્કસ કારણ અને તેની ઓળખ અંગે સત્તાવાર પુષ્ટિ થવાની બાકી છે.
હાલમાં અજાણી મહિલાની ઓળખ મેળવવા તથા બનાવની હકીકત જાણવા પોલીસ દ્વારા તપાસ હાથ ધરવામાં આવી હોવાનું દસ્તાવેજ પરથી જણાય છે. મહિલાની ઓળખ અંગે કોઈને માહિતી હોય તો વાંસદા પોલીસનો સંપર્ક કરવો હિતાવહ રહેશે.
