વાત્સલ્યમ્ સમાચાર,
પૂજા ઠક્કર – મુંદરા કચ્છ.
માંડવી પંથકમાં ‘બેંક’ કે ‘સહકારી મંડળી’ ના નામે ચાલતી લોભામણી સ્કીમોથી સાવધ રહેવા રતાડીયા જલારામ સખી મંડળની અપીલ: મુખ્યમંત્રી અને ગૃહમંત્રીને હસ્તક્ષેપ કરવા વિનંતી કરાઈ
૦૦૦
લાયસન્સ વિના નવી કો-ઓપરેટિવ સંસ્થાના નામે વહેંચાતી પત્રિકાઓ અને વ્યક્તિગત ગૂગલ-પે દ્વારા નાણાં ઉઘરાવવાની પદ્ધતિ સામે ઉઠ્યા સવાલો
૦૦૦
ગુજરાત સરકારના સહકાર વિભાગના પોર્ટલ પરથી ‘કચ્છ’ જિલ્લો જ ગાયબ હોવાનો ફાયદો ઉઠાવી પ્રજાને ગેરમાર્ગે દોરવાનો પ્રયાસ; પ્રમુખ તિતિક્ષાબેન ઠક્કર દ્વારા રજૂઆત કરાઈ
માંડવી (કચ્છ), તા. ૬:
કચ્છ જિલ્લાના માંડવી તાલુકાના ગ્રામ્ય વિસ્તારોમાં તાજેતરમાં નવી ‘બેંક’ અથવા ‘કો-ઓપરેટિવ ધિરાણ મંડળી’ શરૂ કરવાના બહાને ભોળા લોકોને શિકાર બનાવતી લોભામણી સ્કીમો સક્રિય થઈ હોવાની વિગતો પ્રકાશમાં આવી છે. માંડવી પંથકમાં વિવિધ વિસ્તારોમાં વહેંચવામાં આવેલી પત્રિકાઓમાં સભાસદ બનવા માટે ૧,૦૦૦, લોન મેળવવા માટે ૫,૦૦૦ (૧૦૦ રૂપિયા વાળા ૫૦ શેર) અને સીધા ડાયરેક્ટર પદ મેળવવા માટે રૂપિયા ૫,૦૦,૦૦૦ જેવી મોટી રકમના રોકાણ સામે વાર્ષિક ૧૨% ફિક્સ વ્યાજ તેમજ નવા સભ્યો બનાવવા પર ૧૦% કમિશન (ચેન સિસ્ટમ/પિરામિડ સ્કેમ) આપવાની લાલચો આપવામાં આવી રહી છે.
આ ગંભીર અને કાયદા વિરુદ્ધની પ્રવૃત્તિ બાબતે ગ્રામજનોમાં જાગૃતિ લાવવા માટે રતાડીયા જલારામ સખી મંડળના પ્રમુખ તિતિક્ષાબેન ઠક્કર દ્વારા એક મહત્વની અપીલ બહાર પાડવામાં આવી છે. આ સાથે તેમણે સ્થાનિક ધારાસભ્યશ્રી, રાજ્યના મુખ્યમંત્રીશ્રી ભુપેન્દ્રભાઈ પટેલ તેમજ ગૃહમંત્રીશ્રી હર્ષભાઈ સંઘવીને આ પ્રકારની અનધિકૃત નાણાકીય પ્રવૃત્તિઓ સામે તાત્કાલિક વહીવટી તપાસ કરાવી કડક પગલાં ભરવા માંગ કરી છે.
તિતિક્ષાબેને જણાવ્યું છે કે, “રિઝર્વ બેંક ઓફ ઇન્ડિયાના કડક નિયમો મુજબ સત્તાવાર લાયસન્સ વિના કોઈ પણ નવી સંસ્થા પોતાના નામમાં ‘બેંક’ શબ્દ વાપરી શકતી નથી. શેરના નામે સીધું ડાયરેક્ટર પદ વેચવું, ફિક્સ ૧૨% વ્યાજની ખાતરી આપવી અને મેમ્બરશીપની રકમ કોઈ સત્તાવાર સંસ્થાના કોર્પોરેટ બેંક ખાતાના બદલે વ્યક્તિગત ગૂગલ-પે નંબર પર મંગાવવી એ બેંકિંગ જગતના નિયમોનું સરેઆમ ઉલ્લંઘન છે. લોકો આવી લોભામણી જાહેરાતોમાં આવીને પોતાની કમાણી ગુમાવે નહીં.”
સરકારી વેબસાઈટની ભૂલનો લેવાતો ગેરલાભ: લિસ્ટમાંથી ‘કચ્છ’ જ ગાયબ!
આ સમગ્ર મામલાની ઓનલાઈન ખરાઈ કરવા જતાં ગુજરાત સરકારના સહકાર વિભાગના સત્તાવાર પોર્ટલ (@https://rcs.gujarat.gov.in/Home/NOCSDWATW) ઉપર જીલ્લાવાર અને પ્રકારવાર સહકારી મંડળીઓની સંખ્યા યાદીની પણ એક ગંભીર ક્ષતિ સામે આવી છે. આ સરકારી વેબસાઈટ પર મૂકવામાં આવેલા લિસ્ટમાં ક્લેરિકલ ભૂલના કારણે ગુજરાતના સૌથી મોટા એવા ‘કચ્છ’ જિલ્લાનું નામ જ ગાયબ કરી દેવાયું છે! લિસ્ટમાં એક જ જિલ્લા અમદાવાદના બે-બે નામો દર્શાવીને ૩૩ નો આંકડો પૂરો કરાયો છે પણ સરહદી કચ્છ જિલ્લાનો ડેટા જ એન્ટ્રી કરનારે છોડી દીધો છે.
રતાડીયા જલારામ સખી મંડળના પ્રમુખ તિતિક્ષાબેન ઠક્કરે સરકાર સમક્ષ માંગણી કરતાં જણાવ્યું છે કે “સરકારના ડિજિટલ પોર્ટલ પર કચ્છ જિલ્લો ન બતાવાતો હોવાથી ભોળા ગ્રામજનો ઓનલાઈન સાચી વિગતો ક્રોસ-વેરીફાય કરી શકતા નથી અને આવા ભારત ભ્રમણ કરતા લેભાગુ તત્વો તેનો ફાયદો ઉઠાવી લોકોને ભ્રમિત કરે છે. ગુજરાત સરકાર આ ગંભીર ભૂલનો તાત્કાલિક સુધારો કરે એવી વિનંતી પણ કરવામાં આવી છે.”
અંતમાં સખી મંડળ દ્વારા તમામ કચ્છીજનોને અપીલ કરવામાં આવી છે કે જ્યાં સુધી કોઈ પણ નવી સંસ્થાનું સત્તાવાર રજીસ્ટ્રેશન સર્ટિફિકેટ આંખે ન જોવાય ત્યાં સુધી આવી પત્રિકાઓ પર વિશ્વાસ કરીને કોઈના પણ વ્યક્તિગત ગૂગલ-પે પર ક્યારેય નાણાં મોકલવા નહીં અન્યથા ક્યારેક આખી જીવનમૂડી (પાંચ લાખ જેવી) જોખમમાં મુકાઈ શકે એમ છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
