રિપોર્ટર
હિતેન્દ્ર ગોસાઈ
અમદાવાદ
જાપાનના આઇચી-નાગોયા ખાતે યોજાનારી ૨૦મી એશિયન ગેમ્સ માટે પસંદગી પામેલી ભારતીય સ્વિમિંગ ટીમને સ્પોર્ટ્સ ઓથોરિટી ઓફ ઇન્ડિયા (SAI)ના નેશનલ સેન્ટર ફોર સ્પોર્ટ્સ એક્સેલન્સ (NCOE), અમદાવાદ ખાતે ભવ્ય સેન્ડ-ઑફ આપવામાં આવ્યો હતો. વીર સાવરકર સ્પોર્ટ્સ કોમ્પ્લેક્સ ખાતે યોજાયેલા આ વિદાય સમારંભમાં ખેલાડીઓ, કોચિંગ સ્ટાફ તેમજ રમતગમત ક્ષેત્રના અગ્રણીઓએ ઉપસ્થિત રહી ટીમને સફળતા માટે શુભકામનાઓ પાઠવી હતી.
અમદાવાદમાં યોજાયેલા રાષ્ટ્રીય તાલીમ કેમ્પ દરમિયાન સ્વિમર્સે સઘન શારીરિક અને માનસિક તૈયારી સાથે આંતરરાષ્ટ્રીય સ્તરની સ્પર્ધા માટે પોતાને તૈયાર કર્યા હતા. તાલીમ કેમ્પ પૂર્ણ થયા બાદ જાપાન જવા રવાના થનારી ભારતીય ટીમને પરંપરાગત તિલક કરીને વિદાય આપવામાં આવી હતી, જે સમગ્ર સમારંભનું આકર્ષણ બન્યું હતું. SAIના સપોર્ટ સ્ટાફે ખેલાડીઓનું ઉત્સાહવર્ધન કરતાં તેમને શ્રેષ્ઠ પ્રદર્શન માટે શુભેચ્છાઓ પાઠવી હતી.
આ પ્રસંગે હેડ કોચ પ્રદીપ કુમારે જણાવ્યું હતું કે તાલીમ કેમ્પ દરમિયાન તમામ સ્વિમર્સે અત્યંત સમર્પણ અને શિસ્ત સાથે મહેનત કરી છે. તેમના જણાવ્યા મુજબ ટીમ ફાઇનલ્સમાં સ્થાન મેળવવા ઉપરાંત દેશ માટે મેડલ જીતવાના લક્ષ્ય સાથે સંપૂર્ણ આત્મવિશ્વાસથી મેદાનમાં ઉતરશે.
ટીમના કેપ્ટન સાજન પ્રકાશે SAI અને સ્વિમિંગ ફેડરેશન ઓફ ઇન્ડિયાનો આભાર વ્યક્ત કરતાં જણાવ્યું હતું કે અમદાવાદમાં ઉપલબ્ધ આધુનિક સુવિધાઓ અને સતત મળેલા પ્રોત્સાહને ખેલાડીઓની તૈયારીને વધુ મજબૂત બનાવી છે. તેમણે વિશ્વાસ વ્યક્ત કર્યો હતો કે સમગ્ર ટીમ એશિયન ગેમ્સમાં ભારતનું ગૌરવ વધારવા માટે પોતાનું સર્વશ્રેષ્ઠ પ્રદર્શન કરશે.
સમારંભ દરમિયાન અર્જુન એવોર્ડી અને ઇન્ડિયન ઓલિમ્પિક એસોસિએશનના સભ્ય ડોલા બેનરજી, SAI ગાંધીનગરના રીજનલ ડાયરેક્ટર પ્રશાંત કુમાર સિંહ, SAI NCOE અમદાવાદના ડાયરેક્ટર અદિતિ સિંહ, સ્વિમિંગ ફેડરેશન ઓફ ઇન્ડિયાના જનરલ સેક્રેટરી મોનલ ચોકસી, વાઇસ પ્રેસિડેન્ટ કમલેશ નાણાવટી તેમજ ગુજરાત સ્ટેટ સ્વિમિંગ એસોસિએશનના વાઇસ પ્રેસિડેન્ટ ચિંતન પટેલ સહિતના મહાનુભાવોએ ખેલાડીઓને પ્રોત્સાહિત કર્યા હતા.
ઉપસ્થિત મહાનુભાવોએ ખેલાડીઓને દબાણમુક્ત રહી પોતાની ક્ષમતા મુજબનું શ્રેષ્ઠ પ્રદર્શન કરવા અપીલ કરી હતી. તેમણે ભારપૂર્વક જણાવ્યું હતું કે આંતરરાષ્ટ્રીય સ્પર્ધાઓમાં આત્મવિશ્વાસ, શિસ્ત અને ટીમ સ્પિરિટ જ સફળતાની સૌથી મોટી ચાવી છે. દેશભરના રમતપ્રેમીઓની અપેક્ષાઓ સાથે જાપાન જઈ રહેલી ભારતીય ટીમને મેડલ વિજય માટે હાર્દિક શુભકામનાઓ પાઠવવામાં આવી હતી.
ઉલ્લેખનીય છે કે ભારતીય સ્વિમિંગ ટીમનો રાષ્ટ્રીય તાલીમ કેમ્પ અમદાવાદના વીર સાવરકર સ્પોર્ટ્સ કોમ્પ્લેક્સ ખાતે આવેલા SAI નેશનલ સેન્ટર ફોર સ્પોર્ટ્સ એક્સેલન્સમાં 2 ઓગસ્ટથી 10 સપ્ટેમ્બર સુધી યોજાયો હતો. આ દરમિયાન ખેલાડીઓએ ટેક્નિકલ તાલીમ, સહનશક્તિ વિકાસ, સ્પર્ધાત્મક વ્યૂહરચના તેમજ માનસિક સજ્જતા પર વિશેષ ધ્યાન કેન્દ્રિત કર્યું હતું. કેમ્પ દરમિયાન ઉપલબ્ધ વિશ્વસ્તરીય તાલીમ સુવિધાઓ અને નિષ્ણાત માર્ગદર્શનના કારણે ભારતીય સ્વિમર્સ એશિયન ગેમ્સમાં વધુ મજબૂત દાવેદાર તરીકે ઉભરી આવ્યા છે.
ભારતીય સ્વિમિંગ ટીમ હવે આઇચી-નાગોયા એશિયન ગેમ્સમાં દેશનું પ્રતિનિધિત્વ કરવા માટે સંપૂર્ણ રીતે સજ્જ છે અને દેશવાસીઓને તેમની પાસેથી નોંધપાત્ર પ્રદર્શન તથા મેડલની આશા છે.
