શિક્ષણ રાજ્ય મંત્રી શ્રીમતી રિવાબા જાડેજાના હસ્તે જામનગરના ૨૮૦થી વધુ દિવ્યાંગ લાભાર્થીઓને સાધન સહાય અને કીટનું વિતરણ કરાયું
દિવ્યાંગજનો આત્મનિર્ભર અને સશક્ત બને તેવા અભિગમ સાથે સાધન સહાય, લગ્ન સહાય અને વિવિધ યોજનાકીય લાભો એનાયત કરાયા
જામનગર
(નયના દવે દ્વારા)
જામનગર તા.૦૩, જિલ્લા વહીવટી તંત્ર અને જિલ્લા સમાજ સુરક્ષા કચેરી, જામનગરના સંયુક્ત ઉપક્રમે દિવ્યાંગજનો માટે સાધન સહાય તથા કીટ વિતરણનો કાર્યક્રમ ચિલ્ડ્રન હોમ ફોર બોયઝ ખાતે આયોજિત કરવામાં આવ્યો હતો.શિક્ષણ રાજ્ય મંત્રી શ્રીમતી રિવાબા જાડેજાના અધ્યક્ષસ્થાને યોજાયેલ આ કાર્યક્રમમાં ૨૮૦થી વધુ દિવ્યાંગ લાભાર્થીઓને રોજિંદા જીવનમાં ઉપયોગી નીવડે તેવા વિવિધ સહાયક સાધનો તથા યોજનાકીય લાભોનું વિતરણ કરવામાં આવ્યું હતું.
આ પ્રસંગે લાભાર્થીઓને વ્હીલચેર, સ્માર્ટ કેન, વૉકિંગ સ્ટીક તથા ટેકાના સાધનો, શ્રવણયંત્ર, અને ટ્રાયસિકલનું વિતરણ કરવામાં આવ્યું હતું. આ ઉપરાંત દિવ્યાંગ લગ્ન સહાય, સ્કૂટર ખરીદી માટે આર્થિક સહાય, મફત મુસાફરી પાસ, નિરામયા હેલ્થ કાર્ડ અને સંત સૂરદાસ યોજનાના મંજૂરી આદેશો પણ એનાયત કરવામાં આવ્યા હતા.
ઉલ્લેખનીય છે કે ગુજરાત સરકારની ‘દિવ્યાંગ સાધન સહાય યોજના’ હેઠળ ૨૧ પ્રકારની દિવ્યાંગતા ધરાવતા અને ૪૦ ટકા કે તેથી વધુ દિવ્યાંગતા ધરાવતા તમામ વ્યક્તિઓને આત્મનિર્ભર બનાવવાના હેતુથી સાધન સહાય પૂરી પાડવામાં આવે છે. આ યોજના હેઠળ ૩ વર્ષની મુદતમાં એક વાર દિવ્યાંગતામાં રાહતરૂપ સાધનો આપવામાં આવે છે.
આ સમારંભમાં ધારાસભ્ય શ્રી દિવ્યેશભાઈ અકબરી, મેયર શ્રીમતી મોનિકાબેન વ્યાસ, સ્ટેન્ડિંગ કમિટીના ચેરમેન શ્રી ધીરેનભાઈ મોનાણી, જિલ્લા કલેક્ટર શ્રી પી.બી. પંડ્યા, શાસક પક્ષના નેતા શ્રી અમર મોદી, દંડક શ્રીમતી પ્રવિણાબેન રૂપડીયા, મહામંત્રી શ્રી વિજયસિંહ જેઠવા તથા શ્રી ભાવેશભાઈ કાનાણી સહિતના સ્થાનિક જનપ્રતિનિધિઓ, તેમજ જિલ્લા સમાજ સુરક્ષા અધિકારી શ્રી એચ. એમ. રામાણી, જિલ્લા બાળ સુરક્ષા અધિકારી શ્રી આર. જે. શિયાર અને મોટી સંખ્યામાં લાભાર્થીઓ ઉપસ્થિત રહ્યા હતા.
