ડેડીયાપાડાની સેન્ટ ઝેવિયર્સ સ્કૂલની U-14 બાલિકા ટીમે રાજ્ય કક્ષાએ તૃતીય સ્થાન મેળવ્યું
વાત્સલ્યમ સમાચાર
પ્રતિનિધિ : જેસિંગ વસાવા
ડેડીયાપાડા : રમતગમત ક્ષેત્રે વિદ્યાર્થીઓની પ્રતિભાને પ્રોત્સાહન આપવા અને યુવા ખેલાડીઓમાં રમતભાવના વિકસાવવાના હેતુથી School Games Federation of India (S.G.F.I.) દ્વારા આયોજિત રાજ્ય કક્ષાની શાળા રમતોત્સવ સ્પર્ધામાં ડેડીયાપાડાની સેન્ટ ઝેવિયર્સ ઇંગ્લિશ મિડિયમ સ્કૂલની અંડર-14 (U-14) બાલિકા ટીમે ઉત્કૃષ્ટ પ્રદર્શન કરી તૃતીય સ્થાન પ્રાપ્ત કર્યું છે. ટીમની આ સિદ્ધિને પગલે શાળા પરિવાર તેમજ સમગ્ર નર્મદા જિલ્લામાં આનંદ અને ગૌરવની લાગણી જોવા મળી રહી છે.
રાજ્ય કક્ષાની સ્પર્ધામાં વિવિધ શાળાઓની પ્રતિભાશાળી ટીમો વચ્ચે યોજાયેલી સ્પર્ધામાં સેન્ટ ઝેવિયર્સ સ્કૂલની બાલિકાઓએ ઉત્સાહ, શિસ્ત, ટીમવર્ક, રમતભાવના અને સતત મહેનત સાથે શ્રેષ્ઠ રમતનું પ્રદર્શન કર્યું હતું. ખેલાડીઓના સામૂહિક પ્રયાસોના પરિણામે ટીમે તૃતીય સ્થાન મેળવી ડેડીયાપાડા તથા નર્મદા જિલ્લાનું નામ રાજ્ય સ્તરે ગૌરવભેર રોશન કર્યું છે.
આ સફળતા પાછળ ખેલાડીઓની નિયમિત પ્રેક્ટિસ, રમત પ્રત્યેની લગન, અથાગ મહેનત તેમજ સ્પોર્ટ્સ કોચ અને પી.ટી. શિક્ષકના માર્ગદર્શનનું મહત્વપૂર્ણ યોગદાન રહ્યું હોવાનું શાળા પરિવાર દ્વારા જણાવાયું છે.
સ્પર્ધા દરમિયાન બાલિકા ખેલાડીઓએ દર્શાવેલી રમતભાવના, આત્મવિશ્વાસ અને ટીમવર્ક અન્ય વિદ્યાર્થીઓ માટે પણ પ્રેરણારૂપ બન્યા છે. આ સિદ્ધિથી શાળામાં રમતગમત ક્ષેત્રે વિદ્યાર્થીઓને વધુ પ્રોત્સાહન મળવાની આશા વ્યક્ત કરવામાં આવી રહી છે.
સેન્ટ ઝેવિયર્સ ઇંગ્લિશ મિડિયમ સ્કૂલના આચાર્ય, શિક્ષકગણ, સ્પોર્ટ્સ કોચ તથા વાલી મંડળે ટીમની તમામ ખેલાડીઓને તૃતીય સ્થાન મેળવવા બદલ હાર્દિક અભિનંદન પાઠવ્યા હતા. સાથે જ ભવિષ્યમાં પણ ખેલાડીઓ વધુ સફળતા પ્રાપ્ત કરી નર્મદા જિલ્લાનું નામ રાજ્ય અને રાષ્ટ્રીય કક્ષાએ રોશન કરે તેવી શુભકામનાઓ પાઠવવામાં આવી હતી.
