MORBI:: CBSE નેશનલ ક્રિકેટ ચેમ્પિયનશિપમાં મોરબીના ત્રણ પ્રતિભાશાળી ખેલાડીઓની SGFI નેશનલ ટીમમાં પસંદગી
મોરબી:તમિલનાડુના મદુરાઈ ખાતે તાજેતરમાં સંપન્ન થયેલી સેન્ટ્રલ બોર્ડ ઓફ સેકન્ડરી એજ્યુકેશન (CBSE) રાષ્ટ્રીય ક્રિકેટ સ્પર્ધામાં મોરબીના યુવા ખેલાડીઓએ શાનદાર પ્રદર્શન કરી મોરબીનું નામ રોશન કર્યું છે. આ રાષ્ટ્રીય સ્પર્ધાના ઉત્કૃષ્ટ દેખાવના આધારે મધ્યપ્રદેશના નરસિંહપુરમાં યોજાનારી આગામી 70મી SGFI (સ્કૂલ ગેમ્સ ફેડરેશન ઓફ ઈન્ડિયા) નેશનલ અંડર-19 ક્રિકેટ ચેમ્પિયનશિપ માટે CBSE ટીમમાં મોરબીના ત્રણ ખેલાડીઓની સત્તાવાર પસંદગી કરવામાં આવી છે.
મદુરાઈમાં યોજાઈ હતી ભવ્ય સ્પર્ધા – મદુરાઈ શહેરમાં 21 થી 30 ઓક્ટોબર 2026 દરમિયાન યોજાયેલી આ પ્રતિષ્ઠિત CBSE નેશનલ ક્રિકેટ ચેમ્પિયનશિપમાં ભારતના વિવિધ આઠ ઝોન ઉપરાંત ઓમાન અને દુબઈ જેવા વિદેશી દેશોની ટીમોએ પણ ઉત્સાહભેર ભાગ લીધો હતો. આ રોમાંચક ચેમ્પિયનશિપ દરમિયાન કુલ 34 મેચો રમાઈ હતી, જેમાં ખેલાડીઓએ પોતાની શ્રેષ્ઠ રમતનું પ્રદર્શન કર્યું હતું.
પસંદગી પામેલા ખેલાડીઓની વિગત:સ્પર્ધાના અંતે જાહેર કરાયેલી SGFI નેશનલ અંડર-19 CBSE ટીમમાં મોરબીના નીચે મુજબના ત્રણ ખેલાડીઓએ સ્થાન મેળવ્યું છે:અંશ ભાકર – દિલ્હી વર્લ્ડ પબ્લિક સ્કૂલ, મોરબી (તાલીમ: ધ રોર ક્રિકેટ ક્લબ)
પ્રણવ જોષી – દિલ્હી વર્લ્ડ પબ્લિક સ્કૂલ, મોરબી (તાલીમ: ધ રોર ક્રિકેટ ક્લબ)
યક્ષ ગોધાણી – નાલંદા વિદ્યાલય, મોરબી નોંધનીય છે કે આ ત્રણેય ખેલાડીઓ લાંબા સમયથી મોરબીની પ્રખ્યાત ‘ધ રોર ક્રિકેટ ક્લબ’ ખાતે પ્રોફેશનલ ક્રિકેટની સઘન તાલીમ મેળવી રહ્યા છે.
શાળા અને કોચ દ્વારા અભિનંદન વર્ષા ખેલાડીઓની આ ઐતિહાસિક સિદ્ધિ બદલ મોરબીના શૈક્ષણિક અને રમતગમત જગતમાં આનંદની લહેર દોડી ગઈ છે:
ડૉ. અલી ખાન (અંડર-19 ટીમના મુખ્ય કોચ, દિલ્હી વર્લ્ડ પબ્લિક સ્કૂલના ઓવરઓલ ઈન્ચાર્જ અને ધ રોર ક્રિકેટ ક્લબના ડિરેક્ટર) જણાવ્યું હતું કે આ પસંદગી ખેલાડીઓની સખત મહેનત, સમર્પણ, શિસ્ત અને અથાક પ્રયત્નોનું સુખદ પરિણામ છે.
મદુરાઈમાં ટીમ મેનેજર તરીકે ઉપસ્થિત રહેલા નાલંદા વિદ્યાલયના રમતગમત વિભાગના વડા રાજ નારાયણ દ્વિવેદીએ પણ તમામ વિજેતા ખેલાડીઓને અભિનંદન પાઠવી ઉજ્જવળ ભવિષ્યની કામના કરી હતી.
દિલ્હી વર્લ્ડ પબ્લિક સ્કૂલના આચાર્ય શ્રી અરવિંદ કુમારે ખેલાડીઓ, તેમના વાલીઓ અને કોચને હૃદયપૂર્વક અભિનંદન પાઠવ્યા હતા.
આજે મોરબીનું ગૌરવ બનેલા આ ત્રણેય ખેલાડીઓ આગામી 11 થી 17 નવેમ્બર 2026 દરમિયાન મધ્યપ્રદેશના નરસિંહપુરમાં યોજાનારી 70મી SGFI નેશનલ અંડર-19 ક્રિકેટ ચેમ્પિયનશિપમાં CBSE ટીમ તરફથી મેદાન પર ઉતરી પોતાની પ્રતિભાનું ઉત્કૃષ્ટ પ્રદર્શન કરશે. મોરબીવાસીઓ આ યુવા ખેલાડીઓ પાસેથી શાનદાર પ્રદર્શનની આશા રાખી રહ્યા છે.
